Read Shona Union Version 2002 MATEU 27 Bible Online

MATEU 27 - Shona Union Version 2002 bible

MATEU 27

¹Ava mangwana, vapristi vakuru vose navakuru vavanhu vakarangana pamusoro paJesu kuti vamuuraye;

²vakamusunga, vakaenda naye, vakamuisa kuna Pirato, aiva gavhuna.

³Zvino Judhasi, uyo akamupandukira, akati achiona kuti atongerwa kufa, ndokuzvidya mwoyo, akadzosera mari iya makumi matatu esirivha kuvapristi vakuru navakuru vavanhu,

⁴achiti, “Ndatadza, ndapandukira ropa risina mhosva.” Vakati, “Tine mhaka yeiko nazvo? Imhaka yako.”

⁵Akakandira pasi mari iya mutemberi; akabva, akaenda ndokuzvisungira.

⁶Vapristi vakuru vakatora mari yesirivha, vakati, “Hazvina kufanira kuti ichengetwe munovigwa mari, zvauri mutengo weropa.”

⁷Vakarangana, vakatenga nawo munda womuumbi wehari kuzovigapo vatorwa.

⁸Naizvozvo munda uyo wakanzi, “Munda weropa” kusvikira zuva ranhasi.

⁹Zvino zvakarehwa nomuporofita Jeremiya zvakaitika, zvinoti: “Vakatora mari yesirivha makumi matatu, Mutengo womunhu aitengeswa, Wakatarwa navana vaIsiraeri;

¹⁰Vakatenga nawo munda womuumbi wehari, Sezvandakarairwa naIshe.”

¹¹Zvino Jesu akamira pamberi pagavhuna, gavhuna akamubvunza, akati, “Ndiwe mambo wavaJudha here?” Jesu akati kwaari, “Ndizvo zvamataura.”

¹²Asi akati achipomerwa mhosva navapristi vakuru navakuru, haana kupindura chinhu.

¹³Zvino Pirato akati kwaari, “Haunzwi zvinhu zvizhinji zvavanokupomedzera here?”

¹⁴Asi haana kuvapindura, kunyange neshoko rimwechete, gavhuna akashamiswa kwazvo-kwazvo nazvo.

¹⁵Zvino, pamutambo mubati aisisunungurira vanhu vazhinji musungwa mumwe, wavanenge vaida.

¹⁶Nenguva iyo vaiva nomusungwa akakurumbira, ainzi Bharabhasi.

¹⁷Naizvozvo vakati vaungana, Pirato akati kwavari, “Munoda kuti ndikusunungurirei aniko? Bharabhasi, kana Jesu, anonzi Kristu?”

¹⁸Nokuti akanga achiziva kuti vakanga vamuisa kwaari negodo.

¹⁹Zvino akati agere pachigaro chokutonga, mukadzi wake akatumira izwi kwaari, achiti, “Usava nemhaka nomunhu uyo akarurama; nokuti ndakatambudzika zvikuru nhasi pakurota nokuda kwake.”

²⁰Vapristi vakuru navakuru vakagombedzera vanhu vazhinji kuti vakumbire Bharabhasi, Jesu aurawe.

²¹Gavhuna akapindura, akati kwavari, “Munoda kuti ndikusunungurirei aniko kuna ivavo vaviri?” Vakati, “Bharabhasi.”

²²Pirato akati kwavari, “Ndichagoiteiko naJesu, anonzi Kristu?” Vose vakati kwaari, “Ngaaroverwe pamuchinjikwa.”

²³Iye akati, “Chakaipa chaakagoita ndecheiko?” Vakanyanyisa kudanidzira, vachiti, “Ngaaroverwe pamuchinjikwa!”

²⁴Zvino Pirato, achiona kuti hazvibatsiri, asi kuti potomuka bope, akatora mvura, akageza maoko ake pamberi pavanhu vazhinji, achiti, “Handine mhaka neropa romunhu uyu akarurama; imhaka yenyu!”

²⁵Vanhu vose vakapindura, vakati, “Ropa rake ngarive pamusoro pedu napamusoro pavana vedu.”

²⁶Zvino akavasunungurira Bharabhasi, asi Jesu akamurovesa kwazvo, akamuisa kwavari, kuti aroverwe pamuchinjikwa.

²⁷Zvino varwi vaPirato vakaenda naJesu mumuzinda wagavhuna hondo yose ikaunganira kwaari.

²⁸Vakamubvisa nguo dzake, vakamufukidza nguo tsvuku;

²⁹vakaruka korona yeminzwa, ndokuiisa pamusoro wake; norutsanga muruoko rwake rworudyi; vakapfugama pamberi pake, vakamuseka, vachiti, “Kwaziwai, Mambo wavaJudha!”

³⁰Vakamupfira mate, vakatora rutsanga, vakaramba vachimurova musoro.

³¹Vakati vamuseka, vakamubvisa nguo tsvuku, vakamupfekedza nguo dzake, vakaenda naye kundomurovera pamuchinjikwa.

³²Vakati vachibuda, vakawana munhu weKurini, ainzi Simoni; vakamumanikidza iye kuti atakure muchinjikwa wake.

³³Vakati vasvika panzvimbo inonzi, Gorogota, ndokuti, “Nzvimbo yedehenya,”

³⁴vakamupa waini yakavhenganiswa nenduru, kuti anwe; asi akati aravira, akaramba kunwa.

³⁵Vakati vamurovera pamuchinjikwa, vakagovana nguo dzake pakati pavo, vachikanda mijenya, (kuti zvakarehwa nomuporofita zviitike, zvinoti: Vakagovana nguo dzangu pakati pavo, vakakanda mijenya pamusoro pezvokufuka zvangu)

³⁶Vakagara, vakamurindapo.

³⁷Vakaisa pamusoro wake rugwaro rwemhosva yake, rwokuti, “UYU NDIJESU MAMBO WAVAJUDHA.”

³⁸Vakarovera pamwechete naye makororo maviri, mumwe kurudyi, mumwe kuruboshwe.

³⁹Vakanga vachipfuura, vakamunyomba, vachidzungudza misoro yavo,

⁴⁰vachiti, “Iwe wokuputsa temberi, nokuivakazve namazuva matatu, chizviponesa. Kana uri Mwanakomana waMwari, buruka pamuchinjikwa.”

⁴¹Saizvozvo vapristi vakuru, navanyori navakuru, vakamuseka, vachiti,

⁴²“Akaponesa vamwe; haagoni kuzviponesa! Ndiye Mambo wavaIsiraeri! Ngaaburuke zvino pamuchinjikwa, titende kwaari.

⁴³Aivimba naMwari; ngaachimusunungura zvino pamuchinjikwa, kana achimuda; nokuti akati, ‘Ndiri Mwanakomana waMwari.’ ”

⁴⁴Namakororo akanga aroverwa pamuchinjikwa pamwechete naye, akamuzvidza saizvozvo.

⁴⁵Zvino kubva panguva yechitanhatu kusvikira panguva yepfumbamwe, rima rakavapo panyika yose.

⁴⁶Nenguva inenge yepfumbamwe, Jesu akadana nezwi guru, achiti, “Eri, Eri, rama sabakitani?” Ndokuti, “Mwari wangu, Mwari wangu, mandisiyireiko?”

⁴⁷Vamwe vakanga vamirepo, vachinzwa, vakati, “Uyo anodana Eria.”

⁴⁸Pakarepo mumwe wavo wakamhanya, akatora chipanje, akachizadza nevhiniga, ndokuchiisa parutsanga, akamunwisa.

⁴⁹Vamwe vakati, “Regai, timboona kana Eria achizouya kumuponesa.”

⁵⁰Zvino Jesu akadanidzirazve nezwi guru, ndokubva afa.

⁵¹Ipapo tarira, chidzitiro chetemberi chakabvaruka napakati, kubva kumusoro kusvikira pasi; nyika ikadengenyeka, mabwe akatsemuka;

⁵²mabwiro akazaruka, zvitunha zvizhinji zvavarurami, vakanga vavete, zvakamutswa;

⁵³zvikabuda pamabwiro, iye akati amuka, vakapinda muguta dzvene, vakaonekwa navazhinji.

⁵⁴Zvino mukuru wezana, navagariri vaJesu naye, vakati vachiona kudengenyeka kwenyika, nezvakaitwa, vakatya zvikuru, vakati, “Zvirokwazvo uyu akanga ari Mwanakomana waMwari.”

⁵⁵Vakadzi vazhinji vakanga varipo, vakatarira vari kure, vakanga vatevera Jesu, vachibva Gariria vachimushandira.

⁵⁶Pakati pavo kwakanga kuna Maria Magadharene, naMaria mai vaJakobho naJose, namai vavanakomana vaZebhedhi.

⁵⁷Zvino ava madeko kukasvika mumwe mupfumi weArimatia, ainzi Josefa, akanga ari mudzidzi waJesu,

⁵⁸akaenda kuna Pirato, akakumbira chitunha chaJesu. Pirato akarayira kuti apiwe.

⁵⁹Josefa akatora chitunha, akachiputira nomucheka muchena,

⁶⁰akauviga mubwiro hwake hutsva, hwaakanga azvigadzirira iye; akakungurusira ibwe guru pamuromo webwiro, akabva oenda.

⁶¹Maria Magadharene, nomumwe Maria, vakanga varipo vagere vakatarisana nobwiro.

⁶²Fume mangwana ndiro zuva raitevera zuva roKugadzirira vapristi vakuru navaFarisi vakaungana kuna Pirato,

⁶³vakati, “Ishe, tinorangarira kuti munyengeri uyu, achiri mupenyu, akati, ‘Mazuva matatu apfuura, ndichamuka.’

⁶⁴“Saka rairai kuti bwiro huchengetwe kusvikira pazuva retatu, kuti vadzidzi varege kuuya kumuba, vagoti kuvanhu, akamutswa kuvakafa; kurashika kwokupedzisira kukazopfuura kwokutanga.”

⁶⁵Pirato akati kwavari, “Imi muna vagariri; endai muhuchengete sezvamunoziva.”

⁶⁶Vakaenda, vakandochengeta bwiro, vakaisa chinamatidzo chokusimbisa pabwe.