Read Shona Union Version 2002 MATEU 5 Bible Online

MATEU 5 - Shona Union Version 2002 bible

MATEU 5

¹Akati achiona vanhu vazhinji, akakwira mugomo; akagara pasi, vadzidzi vake vakaswedera kwaari.

²Akashama muromo wake, akavadzidzisa, achiti,

³“Vakaropafadzwa varombo mumweya; nokuti ushe hwedenga ndohwavo.

⁴“Vakaropafadzwa vanochema; nokuti vachanyaradzwa.

⁵“Vakaropafadzwa vakapfava; nokuti vachagara nhaka yenyika.

⁶“Vakaropafadzwa vane nzara nenyota yoururami; nokuti vachagutiswa.

⁷“Vakaropafadzwa vane ngoni; nokuti vachaitirwa ngoni.

⁸“Vakaropafadzwa vane mwoyo yakachena; nokuti vachaona Mwari.

⁹“Vakaropafadzwa vanoyananisa; nokuti vachanzi vana vaMwari.

¹⁰“Vakaropafadzwa vanotambudzwa nokuda kwokururama; nokuti ushe hwedenga ndohwavo.

¹¹“Makaropafadzwa imi, kana vachikuzvidzai, vachikutambudzai, vachikupomerai zvakaipa zvose nenhema, nokuda kwangu.

¹²Farai, mufarise kwazvo; nokuti mubayiro wenyu mukuru kudenga; nokuti vakatambudza saizvozvo vaporofita vakakutangirai.

¹³“Imi muri munyu wenyika; asi kana munyu washapa, ucharungwa neiko? Hauchabatsiri chinhu, asi kurasirwa kunze, utsikwe navanhu.

¹⁴“Imi muri chiedza chenyika. Guta rakavakwa pagomo haringavanziki.

¹⁵Nomwenje havangautungidzi, vakauisa pasi pedengu, asi pachigadziko, uvhenekere vose vari mumba.

¹⁶Naizvozvo chiedza chenyu ngachivhenekere pamberi pavanhu, kuti vaone mabasa enyu akanaka, vakudze baba venyu vari kudenga.

¹⁷“Musafunga kuti ndakauya kuparadza murayiro kana vaporofita, handina kuuya kuzoparadza, asi kuzadzisa.

¹⁸“Nokuti zvirokwazvo ndinoti kwamuri, kusvikira denga napasi zvichipfuura, yota imwe kana tsanga imwe yomurayiro hazvingatongopfuuri, zvisati zvaitika zvose.

¹⁹“Naizvozvo ani naani anotyora mumwe wemirairo miduku iyi, akadzidzisa vanhu kuita saizvozvo, achanzi muduku muushe hwedenga; asi anoiita, akaidzidzisa, achanzi mukuru muushe hwedenga.

²⁰“Nokuti ndinoti kwamuri, ‘Kana kururama kwenyu kusingapfuuri kwavanyori nokwavaFarisi, hamungatongopindi muushe hwedenga.’

²¹“Makanzwa kuti zvakanzi kunavakare, ‘Usauraya; ani naani anouraya achapara mhosva ingatongwa;’

²²asi ini ndinoti kwamuri, ‘Anotsamwira hama yake achapara mhosva ingatongwa;’ anoti kuhama yake, ‘Raka’ achapara mhosva kumakurukota; anoti, ‘Benzi,’ achapara mhosva kuti atongwerwe Gehena romoto.

²³“Naizvozvo kana iwe uchiuya nechipo chako paaritari, ukarangarira ipapo kuti hama yako ine mhosva newe,

²⁴usiye chipo chako ipapo pamberi pearitari, uende, umbondoyanana nehama yako, ugozouya woisa chipo chako.

²⁵“Kurumidza kutenderana nomudzivisi wako, uchiri munzira naye; kuti mudzivisi arege kukukwirira kumutongi, mutongi kumutariri, ukaiswa mujeri.

²⁶“Zvirokwazvo ndinoti kwauri, haungatongobudimo, usati waripa kamari kwokupedzisira.

²⁷“Makanzwa kuti zvakanzi, ‘Usaita upombwe.’

²⁸Asi ini ndinoti kwamuri, ‘Mumwe nomumwe anotarira mukadzi achimuchiva, atoita upombwe naye mumwoyo make.

²⁹Kana ziso rako rorudyi richikugumbusa, uribvise, urirasire kure kwauri; nokuti zviri nani kwauri kuti mutezo wako mumwe ufe, muviri wako wose urege kukandirwa muGehena.

³⁰Kana ruoko rwako rworudyi ruchikugumbusa, urugure ururasire kure kwauri, nokuti zviri nani kwauri kuti mutezo wako mumwe ufe, muviri wako wose urege kukandirwa muGehena.’

³¹Zvakanziwo, ‘Ani naani anoramba mukadzi wake, ngaamupe rugwaro rwokumuramba.’

³²Asi ini ndinoti kwamuri, ‘Mumwe nomumwe unoramba mukadzi wake, kunze kwemhosva youpombwe, anomuitisa upombwe; ani naani aNowana arambwa, anoita upombwe.’

³³“Makanzwawo kuti zvakanzi kunavakare, ‘Usapika nhema, asi uripire Ishe pawakapika napo.’

³⁴Asi ini ndinoti kwamuri, ‘Musatongopika, kana nokudenga, nokuti ndicho chigaro choushe chaMwari;

³⁵kana nenyika, nokuti ndicho chitsiko chetsoka dzake; kana neJerusaremu, nokuti ndiro guta raMambo mukuru.

³⁶Usapika kana nomusoro wako, nokuti haugoni kushandura ruvhudzi rumwe kuti ruve ruchena kana rutema.’

³⁷Asi shoko renyu rizoti, ‘Hongu,’ ave ‘hongu;’ ‘Kwete,’ ave ‘kwete;’ zvinopfuura izvozvo zvinobva kumuipi.

³⁸“Makanzwa kuti zvakanzi, ‘Ziso rinotsihwa neziso, zino nezino.’

³⁹Asi ini ndinoti kwamuri, ‘Musadzivisa akaipa, asi anokurova padama rorudyi, umurinzire rimwewo.’

⁴⁰Kana munhu achida kukukwirira, kuti akutorere nguo yako yomukati, umutendere nenguo yokunzewo.

⁴¹Ani naani anokumanikidza kuenda maira imwe, uende naye mbiri.

⁴²“Anokumbira kwauri mupe, usafuratira anoda kukwereta kwauri.

⁴³“Makanzwa kuti zvakanzi, ‘Ida wokwako, venga muvengi wako.’

⁴⁴Asi ini ndinoti kwamuri, ‘Ida vavengi venyu, munyengeterere vanokutambudzai;

⁴⁵kuti muve vana vaBaba venyu vari kudenga; nokuti vanobudisira zuva ravo vakanaka nevakaipa vanonisira mvura vakarurama navasakarurama.’

⁴⁶Nokuti kana muchida avo vanokudai, muno mubayiro weiko? Ko vateresi havaiti saizvozvowo here?

⁴⁷“Kana muchikwazisa hama dzenyu bedzi, munopfuura vamwe neiko? Ko vahedheni havaiti saizvozvowo here?

⁴⁸“Naizvozvo muve vakakwana, saBaba venyu vari kudenga vakakwana.