Read Shona Union Version 2002 MAKO 1 Bible Online

MAKO 1 - Shona Union Version 2002 bible

MAKO 1

¹Kutanga kweVhangeri yaJesu Kristu, Mwanakomana waMwari.

²Sezvazvakanyorwa mumuporofita Isaya, zvichinzi, “Tarira, ‘Ndinotuma munyai wangu pamberi pako,’ Achakunatsira nzira yako;

³Izwi raanodana murenje, ‘Gadzirai nzira yaIshe, Ruramisai migwagwa yake.’ ”

⁴Johani akauya achibhabhatidza murenje, achiparidza rubhabhatidzo rwokutendeuka kuti vanhu varegererwe zvivi zvavo.

⁵Nyika yose yeJudhea, navanhu veJerusaremu vose vakaenda kwaari, vakabhabhatidzwa naye muna Jorodhani, vachireurura zvivi zvavo.

⁶Johani akanga akapfeka nguo yamakushe engamera, nebhanhire reganda muchiuno chake; aidya mhashu nouchi hwesango.

⁷Akaparidza, achiti, “Shure kwango kunouya mumwe ane simba kupfuureni, wandisinokufanira kukotama kuti ndisunungure rukanda rweshangu dzake.

⁸Ini ndakakubhabhatidzai nemvura, asi iye achakubhabhatidzai naMweya Mutsvene.”

⁹Namazuva iwayo Jesu akabva Nazareta muGariria, akabhabhatidzwa naJohani muna Jorodhani.

¹⁰Pakarepo achibuda mumvura, akaona denga richizarurwa, naMweya achiburukira pamusoro pake senjiva;

¹¹izwi rikabva kudenga, richiti, “Ndiwe Mwanakomana wangu mudiwa, ndinokufarira.”

¹²Pakarepo Mweya akamubudisira kurenje;

¹³akava murenje mazuva makumi mana, achiedzwa naSatani; akagara nezvikara, vatumwa vakamushandira.

¹⁴Johani akati asungwa, Jesu akasvika Gariria, achiparidza Vhangeri yaMwari,

¹⁵achiti, “Nguva yazadziswa, ushe hwaMwari hwaswedera pedyo; tendeukai, mutende Vhangeri.”

¹⁶Akati achifamba pagungwa reGariria, akaona Simoni, naAndireya, munun'una waSimoni, vachikandira usvasvi mugungwa, nokuti vakanga vari vabati vehove.

¹⁷Jesu akati kwavari, “Nditeverei, kuti ndikuitei vabati vavanhu.”

¹⁸Vakasiya usvasvi hwavo pakarepo, vakamutevera.

¹⁹Akati apfuura zvishoma, akaona Jakobho, mwanakomana waZebhedhi, naJohani munun'una wake, vachigadzira usvasvi muigwa.

²⁰Akavadana pakarepo, vakasiya baba vavo Zebhedhi muigwa navaranda, vakamutevera.

²¹Vakapinda Kapenaume; pakarepo nomusi weSabata akapinda musinagoge, akadzidzisa.

²²Vakashamiswa nokudzidzisa kwake, nokuti akavadzidzisa somunhu ane chiremera, asingaiti savanyori.

²³Zvino musinagoge ravo makanga muno munhu akanga anomweya wakaipa, akadanidzira,

²⁴achiti, “Tine mhaka yeiko nemi, Jesu weNazareta? Mauya kuzotiparadza kanhi? Ndinokuzivai kuti ndimi ani; muri Mutsvene waMwari.”

²⁵Zvino Jesu akamuraira; akati, “Nyarara, ubude kwaari!”

²⁶Mweya wakaipa akamubvundisa, ndokudanidzira nezwi guru, ndokubuda kwaari.

²⁷Vakatya zvikuru vose, nokudaro vakaita nyaya, vachiti, “Chinyiko ichi? Kudzidzisa kutsva kune simba! Anorayira kunyange nemweya yakaipa ikamuterera.”

²⁸Pakarepo mukurumbira wake ukanzwika panyika yose yakapoteredza yeGariria.

²⁹Pakarepo vakati vachibva musinagoge, vakapinda mumba maSimoni naAndireya, Jakobho naJohani vanavo.

³⁰Vambuya vaSimoni vakanga vavete vachirwara nefivha; pakarepo vakamuudza izvozvo.

³¹Akaenda, akavabata noruoko, akavamutsa; fivha ikavarega, vakavashandira.

³²Madekwana, zuva ravira, vakaisa kwaari vose vakanga vachirwadziwa, navakanga vakabatwa nemweya yakaipa.

³³Guta rose rakanga raungana pamusuo.

³⁴Akaporesa vazhinji vakanga vachirwadziwa namarudzi ehosha, akabudisa mweya yakaipa mizhinji; asi akanga asingatenderi mweya yakaipa kutaura, nokuti yakanga ichimuziva.

³⁵Mangwanani kuchine rima, akamuka akabuda, akaenda kunzvimbo murenje, akandonyengeterapo.

³⁶Simoni, navakanga vanaye, vakamutevera.

³⁷Vakamuwana, vakati kwaari, “Vose vanokutsvakai.”

³⁸Akati kwavari, “Ngatiende kumwe, kumisha iri pedyo, kuti ndinoparidza ikokowo, nokuti ndizvo zvandakauyira.”

³⁹Akaenda, akaparidza mumasinagoge avo muGariria rose achibudisa mweya yakaipa.

⁴⁰Zvino munhu aiva namaperembudzi akauya kwaari, akakumbira zvikuru kwaari, ndokupfugama pamberi pake, akati kwaari, “Kana muchida henyu, munogona kundinatsa.”

⁴¹Akamunzwira ngoni, akatambanudza ruoko rwake, akamubata, akati kwaari, “Ndinoda, chinatswa.”

⁴²Pakarepo maperembudzi akabva kwaari, akanatswa.

⁴³Zvino akamurayira kwazvo, akamuendesa pakarepo.

⁴⁴Akati kwaari, “Chenjera kuti urege kuudza munhu chinhu; asi enda uzviratidze kumupristi, ubayire pamusoro pokunatswa kwako zvakarairwa naMosesi, chive chapupu kwavari.”

⁴⁵Asi iye akabuda, akatanga kuzviudza vanhu vazhinji, nokuparidzira shoko iro, nokudaro Jesu akanga asingagoni kupinda muguta pachena, asi akanga ari kunze panzvimbo murenje; vakauya kwaari vachibva kumativi ose.