Read Shona Union Version 2002 MAKO 10 Bible Online

MAKO 10 - Shona Union Version 2002 bible

MAKO 10

¹Zvino akasimukapo, akasvika munyika yeJudhea, nemhiri kwaJorodhani, vanhu vazhinji-zhinji vakaunganirazve kwaari; akavadzidzisazve sezvaakanga achisiita.

²VaFarisi vakauya kwaari, vakamubvunza, vachimuedza, vachiti, “Murume akatenderwa kuramba mukadzi wake here?”

³Akapindura, akati kwavari, “Mosesi akakuraireiko?”

⁴Vakati, “Mosesi akatendera murume kunyora rugwaro rwokumuramba, agorambwa.”

⁵Jesu akati kwavari, “Akakunyorerai murayiro iwoyo nokuda kwoukukutu hwemwoyo yenyu.

⁶Asi kubva pakutanga kwokusikwa akavaita, ‘Munhurume nomunhukadzi.’

⁷‘Nokuda kwaizvozvo murume achasiya baba vake namai vake, akanamatira mukadzi wake;

⁸ava vaviri vachava nyama imwe; nokudaro havachiri vaviri; asi nyama imwe.’

⁹Zvino izvo Mwari zvaakasanganisa, munhu ngaarege kuzviparadzanisa.”

¹⁰Zvino mumba vadzidzi vakamubvunzazve pamusoro paizvozvo.

¹¹Akati kwavari, “Ani naani anoramba mukadzi wake, akawana mumwe, anoita upombwe kwaari.

¹²Uye kana iye mukadzi akaramba murume wake, akawanikwa nomumwe, anoita upombwe.”

¹³Zvino vakauya navana vaduku kwaari, kuti avanyangate; asi vadzidzi vakavaraira.

¹⁴Zvino Jesu akati achizviona, akatsamwa, akati kwavari, “Regai vana vaduku vauye kwandiri, musavadzivisa, nokuti ushe hwaMwari ndohwavakadai.

¹⁵Zvirokwazvo ndinoti kwamuri, ani naani usingagamuchiri ushe hwaMwari somwana muduku, haangatongopindi mahuri.”

¹⁶Ipapo akavafungatira mumaoko, akavaropafadza, ndokuisa maoko pamusoro pavo.

¹⁷Zvino akati achibuda kunzira, mumwe akamhanyira kwaari, akapfugama pamberi pake akamubvunza, achiti, “Mudzidzisi Wakanaka, ndingaiteiko kuti ndigare nhaka yohupenyu husingaperi?”

¹⁸Jesu akati kwaari, “Anondiidzireiko wakanaka? Hakuna akanaka, asi mumwechete, iye Mwari.

¹⁹Mirayiro unoiziva, inoti, usauraya, usaita upombwe, usaba, usapupura nhema, usanyengera, kudza baba vako namai vako.”

²⁰Akati kwaari, “Mudzidzisi, izvi zvose ndakazvichengeta kubva pauduku hwangu.”

²¹Jesu akamutarira akamuda, akati kwaari, “Unoshaiwa chinhu chimwechete; enda, utengese zvose zvaunazvo, upe varombo, uve nepfuma kudenga; ugouya, unditevere.”

²²Asi akasuwa kwazvo neshoko iro, ati hurududu nokuti akanga ane pfuma zhinji.

²³Ipapo Jesu akaringa-ringa, akati kuvadzidzi vake, “Vane pfuma vacharemerwa sei kupinda muushe hwaMwari!”

²⁴Vadzidzi vakashamiswa namashoko ake. Asi Jesu akapindurazve, akati kwavari, “Vana, zvinorema sei kuna vanovimba nepfuma kupinda muushe hwaMwari!

²⁵Ngamera ingarerukirwa kupinda paburi retsono, kumupfumi kupinda muushe hwaMwari.”

²⁶Ipapo vakakahadzika zvikuru, vakati kwaari, “Ndianiko angagoponeswa?”

²⁷Zvino Jesu akati achivatarira, akati, “Kuvanhu izvi hazvibviri, asi kuna Mwari zvinobvira.”

²⁸Petirosi akatanga kutaura kwaari, achiti, “Tarirai isu takasiya zvose tikakuteverai.”

²⁹Jesu akati, “Zvirokwazvo ndinoti kwamuri, hakuna munhu akasiya imba, kana vakoma kana vanun'una, kana hanzvadzi, kana mai, kana baba, vana, kana minda, nokuda kwangu nokweVhangeri,

³⁰asingazopiwi zvine zana nenguva ino, zvedzimba vakoma navanun'una, nehanzvadzi, namadzimai, navana, neminda, pamwechete nokuvengwa, noupenyu husingaperi nenguva inouya.

³¹Asi vazhinji vokutanga vachava vokupedzisira, novokupedzisira vachava vokutanga.”

³²Zvino vakanga vari munzira, vachikwira Jerusaremu; Jesu akanga achivatungamirira; vakashamiswa; navakanga vachitevera, vakatya. Ipapo akatorazve vane gumi navaviri, akatanga kuvaudza izvo zvaakanga oda kuitirwa, achiti,

³³“Tarirai tinokwira Jerusaremu, Mwanakomana womunhu achaiswa kuvapristi vakuru navanyori; vachamutongera rufu, nokumuisa kuvahedheni.

³⁴Vachamuseka, nokumupfira mate, nokumurova kwazvo, nokumuuraya; kana mazuva matatu apfuura, achamukazve.”

³⁵Zvino Jakobho naJohani, vanakomana vaZebhedhi, vakauya, kwaari, vakati kwaari, “Mudzidzisi, tinoda kuti mutiitire sezvatinokumbira kwamuri.”

³⁶Akati kwavari, “Munoda kuti ndikuitireiko?”

³⁷Vakati kwaari, “Tigarisei mukubwinya kwenyu, mumwe kuruoko rwenyu rworudyi, mumwe kuruboshwe.”

³⁸Asi Jesu akati kwavari, “Hamuzivi zvamunokumbira. Mungagona kunwira mumukombe wandinonwira ini, nokubhabhatidzwa norubhabhatidzo rwandinobhabhatidzwa narwo here?”

³⁹Vakati kwaari, “Tingagona.” Jesu akati kwavari, “Muchanwira henyu mumukombe wandinonwira ini, nokubhabhatidzwa norubhabhatidzo rwandinobhabhatidzwa narwo ini;

⁴⁰asi kugara kuruoko rwangu rworudyi, kana kuruboshwe, handisini ndinopa, asi ndezvavakazvigadzirirwa izvo.”

⁴¹Vane gumi vakati vachizvinzwa, vakatanga kutsamwira Jakobho naJohani.

⁴²Ipapo Jesu akavadanira kwaari, akati kwavari, “Munoziva kuti avo vanonzi machinda avahedheni vanovaita mukundo navakuru vakuru vano vanovaitira zvesimba.

⁴³“Zvino pakati penyu ngazvirege kuva kudaro; asi ani naani anoda kuva mukuru pakati penyu, ngaave mushandiri wenyu;

⁴⁴ani naani anoda kuva wokutanga pakati penyu, ngaave muranda wavose.

⁴⁵“Nokuti Mwanakomana womunhu naiye haana kuuya kuzoshandirwa, asi kuzoshandira, nokupa hupenyu hwake ruve rudzikinuro rwavazhinji.”

⁴⁶Vakasvika Jeriko; zvino akati achibuda Jeriko navadzidzi vake navazhinji-zhinji, Bhatimeo, mwanakomana waTimeo, raiva bofu riri rombe, wakanga agere panzira.

⁴⁷Iye akati anzwa, kuti ndiJesu weNazareta, akatanga kudanidzira, achiti, “Mwanakomana waDhavhidhi, ndinzwirei ngoni!”

⁴⁸Vazhinji vakamuraira kuti anyarare, asi iye akanyanya kudanidzira kwazvo, achiti, “Mwanakomana waDhavhidhi, ndinzwirei ngoni!”

⁴⁹Ipapo Jesu akamira, akati, “Mudanei.” Vakadana bofu, vachiti kwariri, “Tsunga mwoyo, simuka, anokudana.”

⁵⁰Ipapo akarasira nguo yake, akasimuka, akaenda kuna Jesu.

⁵¹Jesu akamupindura, akati kwaari, “Unoda kuti ndikuitireiko?” Bofu rikati kwaari, “Rabhoni, kuti ndione.”

⁵²Jesu akati kwaari, “Enda hako, kutenda kwako kwakuponesa.” Pakarepo akaona, akatevera Jesu munzira.