Read Shona Union Version 2002 MAKO 15 Bible Online

MAKO 15 - Shona Union Version 2002 bible

MAKO 15

¹Pakarepo mangwanani vapristi vakuru vakarangana navakuru navanyori namakurukota ose, vakasunga Jesu, vakaenda naye, vakamuisa kuna Pirato.

²Pirato akamubvunza, akati, “Ndiwe Mambo wavaJudha here?” Akapindura, akati kwaari, “Ndizvo zvamataura.”

³Vapristi vakuru vakaramba vachimupomera zvizhinji.

⁴Pirato akamubvunzazve akati, “Haupinduri chinhu here? Chinzwa, vanokupomera zvizhinji seiko!”

⁵Asi Jesu haana kuzopindura chinhu, Pirato akashamiswa nazvo.

⁶Zvino pamutambo waisivasunungurira musungwa mumwe, wavanenge vaikumbira.

⁷Zvino kwakanga kuno mumwe wainzi Bharabhasi, akanga asungwa pamwechete navamwe vakanga vamutsa bope, vakauraya vanhu pabope iroro.

⁸Vanhu vazhinji vakakwira, vakatanga kukumbira kuna Pirato kuti avaitire saizvozvo.

⁹Pirato akavapindura, akati, “Munoda kuti ndikusunungurirei Mambo wavaJudha here.”

¹⁰Nokuti akanga achiziva kuti vapristi vakuru vakanga vamuisa kwaari negodo.

¹¹Zvino vapristi vakuru vakakurudzira vanhu vazhinji, kuti vati zviri nani avasunungurire Bharabhasi.

¹²Pirato akapindurazve, akati kwavari, “Ndichagoiteiko naiye, wamunoti ndiye Mambo wavaJudha?”

¹³Vakadanidzirazve, vachiti, “Murovere pamuchinjikwa!”

¹⁴Pirato akati kwavari, “Akagotadzeiko?” Vakanyanyisa kudanidzira, vachiti, “Muroverei pamuchinjikwa!”

¹⁵Zvino Pirato, nokuti akanga achida kufadza vanhu vazhinji, akavasunungurira Bharabhasi, asi Jesu akamurovesa, akamuisa kwavari kuti aroverwe pamuchinjikwa.

¹⁶Zvino varwi vakamuisa mukati moruvazhe, imo muimba yomubati, vakaunganidza hondo yose;

¹⁷vakamupfekedza nguo tsvuku, vakaruka korona yeminzwa, vakamudzika iyo.

¹⁸Vakatanga kumukwazisa, vachiti, “Kwaziwai, Mambo wavaJudha!”

¹⁹Vakamurova musoro norutsanga, vakamupfira mate, vakapfugama namabvi, vakamunamata.

²⁰Vakati vamuseka, vakamubvisa nguo tsvuku, ndokumupfekedza nguo dzake, vakaenda naye kundomurovera pamuchinjikwa.

²¹Zvino vakamanikidza mumwe, akanga achipfuura achibva kuruwa, ainzi Simoni weKurini, baba vaArekizanda naRufosi, kuti atakure muchinjikwa wake.

²²Vakamuisa kunzvimbo inonzi, Gorogota, ndokuti, “Nzvimbo yeDehenya,” kana zvichishandurwa.

²³Vakamupa waini, yakavhenganiswa nemura, asi iye akazviramba.

²⁴Vakati vamurovera pamuchinjikwa, vakagovana nguo dzake, vachikanda mijenya pamusoro padzo, kuti mumwe nomumwe apiwe chake.

²⁵Yakanga iri nguva yechitatu, vakamurovera pamuchinjikwa.

²⁶Norugwaro rwemhosva yake rwakanga rwakanyorwa pamusoro pake, ruchiti, “MAMBO WAVAJUDHA.”

²⁷Vakarovera pamuchinjikwa pamwechete naye makororo maviri, mumwe kurudyi rwake, mumwe kuruboshwe. [

²⁸Rugwaro rukaitika, runoti, “Akarovererwa navadariki vomurayiro.”]

²⁹Navaipfuura vakamutuka, vachidzungudza misoro yavo, vachiti, “Iwe, wokuputsa temberi, nokuivakazve namazuva matatu,

³⁰chizviponesa iwe, uburuke pamuchinjikwa!”

³¹Saizvozvo vapristi vakuru navanyori vakamuseka pakati pavo, vachiti, “Akaponesa vamwe, zvino haagoni kuzviponesa.

³²Kristu, Mambo wavaIsiraeri, ngaaburuke zvino pamuchinjikwa, kuti tione titende.” Navakanga varoverwa pamwechete naye vakamuzvidza.

³³Zvino yakati yava nguva yechitanhatu, rima rikavapo panyika yose kusvikira panguva yepfumbamwe.

³⁴Nenguva yepfumbamwe Jesu akadana nezwi guru, achiti, “Eroi, Eroi, rama Sabhakitani!” Ndokuti kana zvichishandurwa, “Mwari wangu, Mwari wangu, mandisiyireiko?”

³⁵Vamwe vakanga vamirepo vakati vachizvinzwa, vakati, “Chinzwai, anodana Eria.”

³⁶Ipapo mumwe akamhanya, akazadza chipanje nevhiniga, achiisa parutsanga, ndokumunwisa, achiti, “Regai timboona kana Eria achizouya kumuburusa.”

³⁷Ipapo Jesu akadana nezwi guru, ndokubva afa.

³⁸Chidzitiro chetemberi chikabvaruka napakati, kubva kumusoro kusvikira pasi.

³⁹Zvino mukuru wezana akanga amirepo, akatarisana naye, akati achiona mutowo wokufa kwake, akati, “Zvirokwazvo, munhu uyu akanga ari Mwanakomana waMwari.”

⁴⁰Navakadzi vakanga varipo, vakatarira vari kure; pakati pavo kwakanga kuna Maria Magadharina, naMaria mai vaJakobho muduku naJose, naSarome;

⁴¹ndivo vaimutevera achiri muGariria vachimushandira, navamwe vakadzi vazhinji vakanga vakwira Jerusaremu naye.

⁴²Zvino ava madeko, zvarakanga riri zuva rokugadzirira, ndokuti rinotangira Sabata,

⁴³Josefa weArimatia, mumwe wamakurukota, munhu akakudzwa iye amene akanga achigarirawo ushe hwaMwari akauya akapinda nokutsunga kuna Pirato, akakumbira chitunha chaJesu.

⁴⁴Pirato akashamiswa achinzwa kuti akanga atofa; akadana mukuru wezana, akamubvunza kana anguva afa.

⁴⁵Zvino akati achinzwa kumukuru wezana, akapa Josefa chitunha.

⁴⁶Iye akatenga mucheka, akamuburusa, akamuputira nomucheka, ndokumuviga mubwiro hwakanga hwakacherwa pabwe, ndokukungurusira ibwe pamuromo wobwiro.

⁴⁷Maria Magadharina, naMaria mai vaJose, vakaona paakavigwa.