Read Shona Union Version 2002 MAKO 16 Bible Online

MAKO 16 - Shona Union Version 2002 bible

MAKO 16

¹Sabata yakati yapfuura, Maria Magadharina, naMaria mai vaJakobho, naSarome, vakatenga zvinonhuwira, kuti vaende kuzomuzodza.

²Mangwanani nomusi wokutanga wevhiki, vakaenda kubwiro, zuva robuda.

³Vakataurirana, vachiti, “Ndianiko achatikungurusira ibwe pamusuo webwiro?”

⁴Zvino vakati vachitarira, vakaona kuti ibwe rakanga ratokunguruswa, nokuti raiva guru-guru.

⁵Vakapinda mubwiro, vakaona jaya, rakanga rigere kurudyi, rakapfeka nguo chena yakarehwa, vakavhunduka.

⁶Rikati kwavari, “Musavhunduka, munotsvaka Jesu weNazareta, akanga aroverwa pamuchinjikwa; amuka, haapo pano; tarirai pavakanga vamuisa.

⁷“Asi endai, mundoudza vadzidzi vake naPetirosi, kuti anokutungamirirai Gariria, muchandomuonako, sezvaakakuudzai.”

⁸Vakabuda, vakatiza vachibva pabwiro, nokuti vakanga vabatwa nokudedera nokushamiswa; vakasaudza munhu chinhu, nokuti vakanga vachitya. [

⁹Zvino akati amuka mangwanani nomusi wokutanga wevhiki, akazviratidza pakutanga kuna Maria Magadharina, waakanga abudisa mweya yakaipa minomwe kwaari.

¹⁰Iye akaenda kundoudza avo vaiva naye, vakanga vachichema nokusuwa.

¹¹Ivo vakati vachinzwa kuti ari mupenyu, uye kuti akaonekwa naye, vakasatenda.

¹²Shure kwaizvozvo wakazviratidza nomumwe mutowo kuna vaviri vavo, vakanga vachifamba muruwa.

¹³Naivowo vakaenda, vakandoudza vamwe; naivo vakasavatendawo.

¹⁴Pashure wakazviratidza kuna vane gumi nomumwe, vagere pakudya; akavapa mhaka pamusoro pokusatenda kwavo noukukutu hwemwoyo yavo, nokuti havana kutenda vaya vakanga vamuona amuka.

¹⁵Akati kwavari, “Endai munyika yose, muparidzire zvisikwa zvose Vhangeri.

¹⁶Anotenda, akabhabhatidzwa, achaponeswa; asi asingatendi achatongwa.

¹⁷Zviratidzo izvi zvichava navanotenda, vachabudisa mweya yakaipa nezita rangu, vachataura nendimi itsva;

¹⁸vachabata nyoka; kunyange vakanwa chinhu chinouraya, hachingavarwadzi; vachaisa maoko pamusoro pavarwere, vakapora.”

¹⁹Zvino Ishe Jesu akati ataura navo, akagamuchirwa kudenga, akagara kuruoko rworudyi rwaMwari.

²⁰Ivo vakaenda, vakaparidza kwose-kwose, Ishe achibatsirana navo, achisimbisa shoko nezviratidzo zvaiteverana navo.]