Read Shona Union Version 2002 MAKO 4 Bible Online

MAKO 4 - Shona Union Version 2002 bible

MAKO 4

¹Zvino akatangazve kudzidzisa pagungwa; vanhu vazhinji-zhinji vakaunganira kwaari, nokudaro akapinda muigwa, akagaramo; vazhinji vose vakanga vari pedyo negungwa pamhenderekedzo.

²Akavadzidzisa zvizhinji nemifananidzo, akati kwavari pakudzidzisa kwake,

³“Teererai, Mukushi akabuda kundokusha.

⁴Akati achikusha, dzimwe mbeu dzakawira panzira; shiri dzikauya dzikadzidya.

⁵Dzimwe dzakawira parukangarabwe, padzakanga dzisina ivhu zhinji; dzikamera pakarepo, nokuti dzakanga dzisina ivhu rakadzika;

⁶asi zuva rakati rabuda, dzikapiswa; dzikaoma, nokuti dzakanga dzisina mudzi.

⁷“Dzimwe dzakawira muminzwa; minzwa ikamera, ikadzivhunga, dzikasaita vana.

⁸Dzimwe dzakawira muvhu rakanaka, dzikaita vana, nokuti dzakakura, dzikawanza; dzikabereka makumi matatu, namakumi matanhatu, nezana.”

⁹Akati, “Ane nzeve dzokunzwa, ngaanzwe.”

¹⁰Akati ari oga, vakanga vanaye vane gumi navaviri vakamubvunza zvemifananidzo.

¹¹Akati kwavari, “Imi makapiwa kuziva zvakavanzika zvoushe hwaMwari, asi kuna ava, vari kunze, zvose zvinoitwa nemifananidzo,

¹²kuti, kuona vaone, asi varege kuonesesa, nokunzwa vanzwe, asi varege kunzwisisa, kuti zvimwe varege kutendeuka, vakaregererwa zvivi zvavo.”

¹³Zvino akati kwavari, “Hamuzivi here mufananidzo uyu? Muchaziva seiko mifananidzo yose?

¹⁴Mukushi ndiye anokusha shoko.

¹⁵Vari munzira panokushwa shoko ndivo vanoti kana vanzwa, pakarepo Satani anouya, ndokubvisa shoko rakakushwa mavari.

¹⁶Navakakushwa parukangarabwe vakaita saizvozvo, ndivo vanoti kana vanzwa shoko rakakushwa, vanorigamuchira pakarepo nomufaro,

¹⁷asi havana mudzi mavari, asi ndivo vechinguva chiduku; pashure kana kutambudzika nokuvengwa zvichiuya nokuda kweshoko, pakarepo vanogumburwa.

¹⁸“Vamwe vanokushwa muminzwa, ndivo vanonzwa shoko,

¹⁹asi kufunganya kwenyika nokunyengera kwepfuma, nokuchiva zvimwe, kunopinda, kuchivhunga shoko, rikashaiwa zvibereko.

²⁰“Vakakushwa muvhu rakanaka, ndivo vanonzwa shoko, vakarigamuchira, vakabereka, mumwe makumi matatu, mumwe makumi matanhatu, mumwe zana.”

²¹Zvino akati kwavari, “Mwenje uripo kuti uiswe pasi pedengu, kana pasi pomubhedha here? Hausipo kuti uiswe pachigadziko here?

²²Nokuti hapana chinhu chakavanzika chisingazooneswi, hapana chavigwa chisingazobudi pachena.

²³Kana munhu ane nzeve dzokunzwa, ngaanzwe.”

²⁴Zvino akati kwavari, “Chenjerai zvamunonzwa. Chiero chamunoera nacho, nemi muchaerwa nacho; mukawedzerwa.

²⁵Nokuti uya ane chaanacho achapiwa, asi uya asina, achatorerwa kunyangwe nechaanacho.”

²⁶Zvino akati, “Ushe hwaMwari hwakafanana nomunhu anodyara mbeu muvhu,

²⁷akavata, akamuka, usiku namasikati; mbeu inomera, ichikura, iye asingazivi kuti zvinoitika sei;

²⁸ivhu rinongobereka haro, pakutanga chipande, pashure hura, pashure zviyo zvakakora pahura.

²⁹Kana yaibva, pakarepo anocheka nejeko, nokuti kukohwa kwasvika.”

³⁰Zvino akati, “Ushe hwaMwari tichahufananidza neiko? Tichahuenzanisira nomufananidzo upiko?

³¹Hwakafanana netsanga yemasitadhi, iyo kana ichidyarwa muvhu iduku kumbeu dzose dzapanyika;

³²asi kana yadyarwa, inomera, ichiva huru kumiriwo yose ichiita matavi makuru, akadaro kuti shiri dzedenga dzinovakira matendere adzo imomo.”

³³Akasireva shoko kwavari nemifananidzo mizhinji yakadaro, pavaigona kunzwa napo.

³⁴Haana kutaura navo kunze kwemifananidzo, asi waizodudzira vadzidzi vake zvose vari voga.

³⁵Zvino nezuva iro, ava madekwana, akati kwavari, “Ngatiyambukire mhiri.”

³⁶Vakasiya vanhu vazhinji, vakaenda naye muigwa akangodaro; mamwe magwa akanga aiva naye.

³⁷Zvino dutu guru remhepo rakamuka, mafungu emvura akarova achipinda muigwa, rikanga roda kuzara.

³⁸Asi iye akanga ari mushure megwa avete pamutsago; vakamumutsa, vakati kwaari, “Mudzidzisi, hamune hanya kuti tofa here?”

³⁹Akamuka, akarayira mhepo, akati kugungwa, “Nyarara, ugadzikame!” Mhepo ikanyarara, kudzikama kukuru kukavapo.

⁴⁰Zvino akati kwavari, “Munotyireiko kudaro? Hamuna kutenda here?”

⁴¹Vakatya nokutya kukuru, vakataurirana vachiti, “Ndianiko uyu, nokuti mhepo kunyange negungwa zvinomuteerera?”