Read Shona Union Version 2002 MAKO 5 Bible Online

MAKO 5 - Shona Union Version 2002 bible

MAKO 5

¹Vakasvika mhiri kwegungwa kunyika yavaGerasa.

²Zvino akati abuda muigwa, pakarepo akasangana nomunhu aiva nomweya wakaipa, achibva kumarinda.

³Uyo aigara mumarinda; kwakanga kusino munhu akanga achagona kumusunga kunyange nengetani.

⁴Nokuti kazhinji aisungwa nezvisungo zvamakumbo nengetani, asi aidambura ngetani, nokudashura zvisungo; kwakanga kusino munhu aigona kumudzikamisa.

⁵Nguva dzose, usiku namasikati, aigara mumarinda nomumakomo, achiridza mhere, achizvicheka namabwe.

⁶Zvino akati achiona Jesu ari kure, akamhanya, ndokumupfugamira;

⁷akadanidzira nezwi guru, akati, “Ndine mhaka yeiko nemi Jesu, Mwanakomana waMwari Wokumusoro-soro? Ndinokupikirai naMwari kuti murege kunditambudza.”

⁸Nokuti akati kwaari, “Buda pamunhu, iwe mweya wakaipa!”

⁹Akamubvunza, akati, “Zita rako ndianiko?” Akati kwaari, “Ndinonzi Regioni, nokuti tiri vazhinji.”

¹⁰Akakumbira zvikuru kwaari kuti arege kuidzinga panyika iyo.

¹¹Zvino kwakanga kuine pagomo boka guru renguruve dzakanga dzichifura.

¹²Ikakumbira zvikuru kwaari, ichiti, “Titumirei kunguruve, kuti tindopinda madziri.”

¹³Akaitendera. Mweya yakaipa ikabuda, ikapinda munguruve; boka rikamhanyira kumawere kugungwa, dzinenge dzaiva zviuru zviviri, dzikafira mugungwa.

¹⁴Vaidzifudza vakatiza, vakandoudza izvozvo muguta nomumaruwa. Vanhu kauya kuzoona zvaitwa.

¹⁵Vakauya kuna Jesu, vakaona akanga ane mweya yakaipa agere, apfeka, ari munhu kwaye iye aiva neRegioni; vakatya.

¹⁶Vaya vakanga vazviona, vakarondedzera zvaakaitirwa iye akanga anemweya yakaipa, nenguruvewo.

¹⁷Vakatanga kukumbira zvikuru kwaari kuti abve munyika yavo.

¹⁸Zvino akati achipinda muigwa, iye aiva nemweya yakaipa akakumbira zvikuru kwaari kuti agare naye.

¹⁹Asi haana kumutendera, asi akati kwaari, “Enda kumba kwako, kuhama dzako, uvaudze zvinhu zvikuru zvawakaitirwa naIshe, napawakaitirwa ngoni napo.”

²⁰Akaenda, akatanga kuparidza munyika yeDhekapori zvinhu zvikuru zvaakaitirwa naJesu; vakashamiswa vose.

²¹Jesu akati ayambukirazve mhiri negwa, vanhu vazhinji vakaunganira kwaari; akanga ari pagungwa.

²²Mumwe wavakuru vesinagoge, wainzi Jairosi, akasvika; akati achimuona, akazviwisira pasi petsoka dzake,

²³akakumbira zvikuru kwaari, achiti, “Mukunda wangu muduku wotandadza, uyai, muise maoko enyu pamusoro pake aporeswe, ararame.”

²⁴Akaenda naye; vanhu vazhinji vakamutevera, vachimutsikirira.

²⁵Zvino mumwe mukadzi aiva nokurwara kwokubuda ropa makore ane gumi namaviri,

²⁶akanga aoneswa nhamo nevarapi vazhinji, akapedza zvose zvaakanga anazvo asina kutongobatsirwa, asi kungonyanyiswa,

²⁷akati anzwa zvaJesu, akauya pakati pavanhu vazhinji vaiva mashure, akabata nguo yake.

²⁸Nokuti akati, “Kana ndikabata nguo yake bedzi, ndichaponeswa.”

²⁹Pakarepo tsime rake reropa rikapwa, akanzwa pamuviri wake kuti aporeswa pakurwara kwake.

³⁰Pakarepo Jesu akati achiziva mukati make kuti simba rakabuda kwaari, akatendeuka pakati pavanhu vazhinji, akati, “Ndianiko abata nguo dzangu?”

³¹Vadzidzi vake vakati kwaari, “Munoona vanhu vazhinji vanokutsikirirai, zvino mungati seiko, ndiani andibata?”

³²Zvino akaringa-ringa kuti aone akaita izvozvo.

³³Mukadzi akatya, akadedera, achiziva zvaaitirwa, akauya, ndokuzviwisira pamberi pake, ndokumuudza zvirokwazvo zvose.

³⁴Akati kwaari, “Mukunda, kutenda kwako kwakuponesa; enda norugare, upore pakurwara kwako.”

³⁵Akati achataura, vamwe veimba yomukuru wesinagoge vakasvika, vakati, “Mukunda wenyu afa; muchatambudzireiko Mudzidzisi?”

³⁶Jesu akati achinzwa shoko rataurwa, akati kumukuru wesinagoge, “Usatya, tenda bedzi.”

³⁷Akasatendera munhu kumutevera, asi Petirosi, naJakobho, naJohani munun'una waJakobho.

³⁸Vakasvika mumba momukuru wesinagoge; akawana iri mhere-mhere, navanochema zvikuru, navanorira.

³⁹Akapinda, akati kwavari, “Munoitireiko mhere-mhere, muchichema? Mwana haana kufa, asi avete.”

⁴⁰Vakamuseka. Akavabudisa vose, akatora baba vomwana namai, navaakanga anavo, akapinda kwakanga kuno mwana.

⁴¹Akabata ruoko rwomwana, akati kwaari, “Tarita kumi!” Ndokuti, “Kana zvichishandurwa, Musikana, ndinoti kwauri, muka!”

⁴²Pakarepo musikana akasimuka, akafamba; nokuti waiva namakore ane gumi namaviri; vakashamiswa nokushama kukuru.

⁴³Akavarayira zvikuru kuti zvirege kuziikanwa nomunhu; akati musikana ungaapiwe zvokudya.