Read Shona Union Version 2002 RUKA 1 Bible Online

RUKA 1 - Shona Union Version 2002 bible

RUKA 1

¹Vazhinji zvavakaedza kurondedzera mashoko ezvinhu izvo zvakaitika pakati pedu,

²sezvavakatipa ivo vakazviona nameso avo kubva pakutanga, navaiva vanyai veshoko,

³neniwo, ndakati ndanatsofeya zvose kubva pakutanga, ndakati zvakanaka kuti ndikunyorereiwo nokutevedzanisa, imi Teofiro, makakurumbira;

⁴kuti muzive kuti mashoko amakadzidziswa ndeezvokwadi.

⁵Namazuva aHerodhi, mambo weJudhea, mumwe mupristi aivapo, ainzi Zekariya, wegovero raAbhia; mukadzi wake aiva wavanasikana vaAroni, zita rake rainzi Erizabheti.

⁶Vakanga vakarurama vose, vari vaviri, pamberi paMwari, vachifamba nemirairo nezvakarurama zvose zvaIshe, vasina chavangapomerwa.

⁷Vakanga vasina mwana, nokuti Erizabheti akanga asingabereki, uye vakanga vachembera vose vari vaviri.

⁸Zvino, akati achibata basa roupristi pamberi paMwari, padzoro regovero rake,

⁹akagoverwa netsika dzoupristi, kuti apinde mutemberi yaIshe, kuzopisa zvinonhuwira.

¹⁰Vanhu vazhinji vose vakanga vachinyengetera kunze nenguva yokupisa zvinonhuwira.

¹¹Ipapo mutumwa waIshe akaonekwa naye, amire kurudyi rwearitari yezvinonhuwira.

¹²Zekariya akatambudzika achimuona; kutya kukamuwira.

¹³Mutumwa akati kwaari, “Usatya Zekariya, nokuti kukumbira kwako kwanzwika. Mukadzi wako Erizabheti achakuberekera mwanakomana, ugomutumidza zita rinonzi Johani.

¹⁴Iwe uchava nomufaro nokufarisisa, navazhinji vachafarira kuberekwa kwake.

¹⁵Nokuti iye achava mukuru pamberi paIshe; haangatongonwi waini nezvinodhaka; achazadzwa noMweya Mutsvene kubva mudumbu ramai vake.

¹⁶Achadzorera vazhinji vavana vaIsiraeri kuna Ishe, Mwari wavo.

¹⁷“Achafamba pamberi pake noMweya nesimba raEria, kuti adzorere mwoyo yamadzibaba kuvana, navasingateereri kuuchenjeri hwavakarurama, agadzirire Ishe vanhu vakamugadzirirwa kwazvo.”

¹⁸Zekariya akati kumutumwa, “Izvozvi ndichazviziva seiko? Nokuti ini ndava harahwa, nomukadzi wangu achembera.”

¹⁹Mutumwa akapindura, akati kwaari, “Ndini Gabhurieri, ndinomira pamberi paMwari; ndatumwa kuti nditaure newe, ndikuparidzire mashoko awa akanaka.

²⁰“Tarira, uchanyarara, usingagoni kutaura, kusvikira zuva rinoitwa zvinhu izvi, nokuti hauna kutenda mashoko angu, achaitika nenguva yawo.”

²¹Vanhu vakanga vakamirira Zekariya vakashamiswa nokunonoka kwake mutemberi.

²²Zvino akati achibuda, akasagona kutaura navo; vakaziva kuti akanga aona chiratidzo mutemberi; iye akaramba achininira namaoko, akaramba ari mbeveve.

²³Zvino mazuva okushumira kwake akati apera, akaenda kumba kwake.

²⁴Mazuva iwayo akati apfuura, Erizabheti mukadzi wake akava napamuviri, akazvivanza mwedzi mishanu, achiti,

²⁵“Ndizvo zvandakaitirwa naIshe namazuva aakanditarira, kuti abvise kunyadzwa kwangu pakati pavanhu.”

²⁶Nomwedzi wechitanhatu mutumwa Gabhurieri akatumwa naMwari kuguta reGariria, rinonzi Nazareta,

²⁷kumhandara yakanga yakaroorwa nomurume, ainzi Josefa, weimba yaDhavhidhi; zita remhandara rainzi Maria.

²⁸Mutumwa akapinda kwaari, akati, “Kwaziwa, iwe wakaropafadzwa, Ishe anewe!”

²⁹Iye akavhunduswa kwazvo neshoko iro, akafunga kuti kukwazisa kwakadaro ndokweiko.

³⁰Ipapo mutumwa akati kwaari, “Usatya Maria, nokuti wanzwirwa nyasha naMwari.

³¹Tarira, uchava napamuviri, uchazvara mwanakomana, ugomutumidza zita rinonzi Jesu.

³²Iye achava mukuru, achanzi Mwanakomana woWokumusorosoro; Ishe Mwari achamupa chigaro choushe chababa vake Dhavhidhi.

³³Achatonga imba yaJakobho nokusingaperi, noushe hwake hahungavi nomugumo.”

³⁴Ipapo Maria akati kumutumwa, “Izvozvi zvingava seiko, zvandisingazivi murume?”

³⁵Mutumwa akapindura, akati kwaari, “Mweya Mutsvene achauya pamusoro pako, nesimba roWokumusorosoro richakufukidza; saka icho chitsvene chichaberekwa chichanzi, Mwanakomana waMwari.

³⁶Uye tarira, Erizabheti, hama yako, naiye wava napamuviri pomwanakomana pakuchembera kwake; mwedzi uno wava wechitanhatu kuna iye ainzi haabereki.

³⁷“Nokuti hakuna shoko raMwari richashaiwa simba.”

³⁸Ipapo Maria akati, “Tarirai, ndiri mushandiri waIshe; ndiitirwe hangu sezvamataura.” Mutumwa akabva kwaari.

³⁹Namazuva iwayo Maria akasimuka, akakurumidza kuenda kunyika yamakomo, kuguta reJudhea;

⁴⁰akapinda mumba maZekariya, akakwazisa Erizabheti.

⁴¹Zvino Erizabheti akati achinzwa kukwazisa kwaMaria, mwana akakwakuka mudumbu rake; ipapo Erizabheti akazadzwa noMweya Mutsvene,

⁴²akadana nezwi guru, akati, “Wakaropafadzwa iwe pakati pavakadzi, nomwana wemimba yako akakomborerwazve!

⁴³Zvaita seiko kwandiri, kuti ndamutswa namai vaIshe wangu?

⁴⁴Nokuti, tarira, izwi rokukwazisa kwako rakati richisvika munzeve dzangu, mwana akakwakuka nomufaro mudumbu rangu.

⁴⁵Wakaropafadzwa iwe nokuti wakatenda, kuti zvakataurwa naIshe kwauri zvichaitika.”

⁴⁶Maria akati, “Mwoyo wangu unokudza Ishe,

⁴⁷Mweya wangu wakafara naMwari, Muponesi wangu;

⁴⁸Zvaakaona urombo hwomushandiri wake; Nokuti, tarira, kubva zvino marudzi ose achanditi, ndakaropafadzwa;

⁴⁹Nokuti uyo anamasimba akandiitira zvinhu zvikuru; Zita rake idzvene.

⁵⁰Ngoni dzake dziri kumarudzi namarudzi Avanhu vanomutya.

⁵¹Wakaratidza simba rake noruoko rwake; Akaparadza vaizvikudza mundangariro dzemwoyo yavo;

⁵²Wakabvisa madzimambo pazvigaro zvavo zvoushe, Akasimudza vakaninipiswa;

⁵³Vane nzara akavagutsa nezvakanaka, Akadzosera vapfumi vasina;

⁵⁴Akabatsira Isiraeri, muranda wake, Kuti arangarire ngoni dzake,

⁵⁵Sezvaakareva kumadzibaba edu, Kuna Abhurahamu nokurudzi rwake nokusingaperi.”

⁵⁶Maria akagara naye mwedzi inenge mitatu, akadzokera kumusha kwake.

⁵⁷Zvino nguva yaErizabheti yokusunguka kwake yakasvika; akabereka mwanakomana.

⁵⁸Zvino vakavakidzana navo nehama dzavo vakati vanzwa kuti Ishe akanga amuitira ngoni huru, vakafara naye.

⁵⁹Zvino nezuva rorusere vakauya kuzodzingisa mwana, vakada kumutumidza zita rababa vake, Zekariya.

⁶⁰Ipapo mai vakapindura, vakati, “Kwete, achatumidzwa Johani.”

⁶¹Vakati kwaari, “Hakuna munhu kuhama dzenyu akatumidzwa zita iro.”

⁶²Vakabvunza baba vake, vachidudzira namaoko, kuti anzi aniko?

⁶³Vakakumbira chinyorero vakanyora kuti, “Johani, ndiro zita rake.” Vakashamiswa vose.

⁶⁴Kamwe-kamwe muromo wake ukashamiswa, norurimi rwake rukasununguka, akataura, akarumbidza Mwari.

⁶⁵Kutya kukawira vose vakanga vagere navo; namashoko iwayo ose akanzwika kunyika yose yamakomo eJudhea.

⁶⁶Vose vakaanzwa, vakaachengeta mumwoyo mavo, vachiti, “Achazova mwana wakadiniko?” Nokuti ruoko rwaIshe rwakava naye.

⁶⁷Baba vake, Zekariya, vakazadzwa noMweya Mutsvene, vakaporofita, vachiti,

⁶⁸“Ishe, Mwari wavaIsiraeri, ngaakudzwe; Nokuti aakamutsa vanhu vake, nokuvadzikinura,

⁶⁹Akatisimudzira runyanga rwokuponeswa Mumba momuranda wake, Dhavhidhi;

⁷⁰Sezvaakataura nomuromo wavaporofita vake vatsvene, vakanga varipo kubva pakuvamba kwenyika,

⁷¹Kutiponesa pavavengi vedu, napamaoko avose vanotivenga;

⁷²Kunzwira madzibaba edu ngoni, Nokurangarira sungano yake tsvene;

⁷³Kupika kwaakapika nako kuna baba vedu Abhurahamu,

⁷⁴Kutipa simba isu, tasunungurwa mumaoko avavengi vedu, Kuti timushumire tisingatyi,

⁷⁵Nohutsvene nokururama pamberi pake mazuva edu ose.

⁷⁶Iwe, Mwana, uchanzi muporofita woWokumusorosoro, Nokuti iwe uchatungamira pamberi paIshe, kumugadzirira nzira dzake;

⁷⁷Kuzivisa vanhu vake nzira yokuponeswa nayo, Vachiregererwa zvivi zvavo,

⁷⁸Nomwoyo munyoro waMwari wedu, Achatishanyira namambakwedza okudenga,

⁷⁹Kuvhenekera vagere murima nomumumvuri worufu; Nokuraramisa tsoka dzedu munzira yorugare.”

⁸⁰Mwana akakura, akasimba mumweya, akagara mumarenje, kusvikira zuva rokuratidzwa kwake kuvaIsiraeri.