Read Shona Union Version 2002 RUKA 10 Bible Online

RUKA 10 - Shona Union Version 2002 bible

RUKA 10

¹Shure kwaizvozvo Ishe akagadzazve vamwe vana makumi manomwe, akavatuma vaviri vaviri pamberi pake mumaguta ose, uye kwose kwaakanga achida kuenda.

²Akati kwavari, “Kukohwa kukuru, asi vakohwi vashoma; naizvozvo kumbirai kuna Ishe wokukohwa kuti abudise vakohwi mukukohwa kwake.

³Fambai henyu; tarirai, ndinokutumai samakwayana pakati pamapere.

⁴Musatora chikwama, kana hombodo, kana shangu; musakwazisa munhu panzira.

⁵Paimba ipi neipi yamunopinda, mutange kuti, ‘Rugare ngaruve neimba ino.’

⁶Kana munhu worugare anenge aripo, rugare rwenyu ruchazorora pamusoro pake; kana kusina, ruchadzokera kwamuri.

⁷Garai muimba iyo, muchidya nokunwa zvavanazvo; nokuti mubati akafanirwa nomubayiro wake; musapota-pota nedzimba.

⁸“Paguta ripi neripi, pamunopinda, kana vakakugamuchirai, idyai zvamunopakurirwa.

⁹Poresai varwere varimo, muchiti kwavari, ‘Ushe hwaMwari hwaswedera kwamuri.’

¹⁰Asi guta ripi neripi pamunopinda, kana vasingakugamuchiriyi, budirai munzira dzaro, muti,

¹¹‘Kunyange neguruva reguta renyu rakanamatira tsoka dzedu, tinorikuhumurira kwamuri; asi muzive chinhu ichi kuti ushe hwaMwari hwaswedera.’

¹²“Ndinoti kwamuri, Sodhoma richarerukirwa nezuva iro kupfuura guta iro.

¹³Une nhamo, iwe Korazini! Une nhamo, iwe Bhetisaidha! Nokuti mabasa esimba akaitwa mukati menyu dai akaitwa muTire neSidhoni, vangadai vatendeuka kare, vakagara vana masaga nedota.

¹⁴Asi Tire neSidhoni acharerukirwa pakutongwa kupfuuremi.

¹⁵Newe Kapenaume, uchasimudzirwa kudenga here? Uchadzika kuHadhesi.”

¹⁶“Anokunzwai imi, anondinzwa ini; anokurambai imi, anondiramba ini; anoramba ini, anoramba iye akandituma.”

¹⁷Vana makumi manomwe vakadzoka nomufaro, vachiti, “Ishe, kunyange nemweya yakaipa inozviisa pasi pedu muzita renyu.”

¹⁸Akati kwavari, “Ndakaona Satani achiwa kudenga semheni.

¹⁹“Tarirai, ndakakupai simba rokutsika pamusoro penyoka nezvinyavada, napamusoro pesimba rose romuvengi; hakuna chinhu chingatongokukuvadzai.

²⁰Asi, musafara bedzi nechinhu ichi, kuti mweya inozviisa pasi penyu; asi mufare kuti mazita enyu akanyorwa kudenga.”

²¹Nenguva iyo akafara noMweya Mutsvene, akati, “Ndinokuvongai baba, Ishe wokudenga napasi, kuti makavanzira vakachenjera navakangwara zvinhu izvi, mukazvizarurira vacheche. Hongu Baba, nokuti ndizvo zvakakufadzai.

²²“Zvinhu zvose ndakazvipiwa naBaba vangu; hakuna anoziva kuti Mwanakomana ndiani, asi Baba, uye kuti Baba ndiani, asi Mwanakomana, naiye Mwanakomana waanenge achida kumuzarurira iye.”

²³Ipapo akatendeukira kuvadzidzi vake, akati kwavari, vari voga, “Meso, anoona zvamunoona, akaropafadzwa.

²⁴“Nokuti ndinoti kwamuri, vaporofita vazhinji namadzimambo vaida kuona zvamunoona, vakasazviona, nokunzwa zvamunonzwa, vakasazvinzwa.”

²⁵Zvino mumwe mududziri womurayiro akasimuka, akamuedza, achiti, “Mudzidzisi, ndingaiteiko kuti ndigare nhaka yohupenyu husingaperi?”

²⁶Akati kwaari, “Pamurayiro pakanyorweiko? Unorava sei?”

²⁷Iye akapindura, akati, “Ida Ishe, Mwari wako, nomwoyo wako wose, nomweya wako wose, nesimba rako rose, nokufunga kwako kwose, nowokwako sezvaunozvida iwe.”

²⁸Akati kwaari, “Wapindura zvakanaka; ita izvozvo, ugorarama.”

²⁹Asi iye, achida kuzviruramisa, akati kuna Jesu, “Wokwangu ndianiko?”

³⁰Jesu akapindura, akati, “Mumwe munhu akabva Jerusaremu, akaburukira Jeriko, akawirwa namakororo, akamupamba nguo, akamurova, akaenda, ndokumusiya oda kufa.

³¹Zvino mumwe mupristi akanga achingoburuka hake nenzira iyo; akati achimuona, akamunyenyeredza.

³²Nokudaro muRevhiwo akasvikapo, akamuona, akamunyenyeredza.

³³Zvino mumwe muSamaria, akanga ari parwendo, akasvika kwaari; akati achimuona, akamunzwira tsitsi,

³⁴akaenda kwaari, ndokupombera mavanga ake, akaadira mafuta newaini; akamukwidza pachipfuwo chake, ndokumuisa kuimba yavaeni, ndokumuchengeta.

³⁵“Zvino, ava mangwana, akabudisa madhenari maviri, akaapa muridzi weimba, akati, ‘Muchengete, zvose zvaunomupa kupfuura izvi, ndichakupazve, kana ndichidzoka.’ ”

³⁶“Unofungei, ndoupiko kuna vatatu ava akanga ari wokwake waiye akawirwa namakororo?”

³⁷Akati, “Ndiye akamuitira ngoni.” Jesu akati kwaari, “Enda, unoita saizvozvo.”

³⁸Zvino vakati vachifamba, akapinda muno mumwe musha; mumwe mukadzi ainzi Marita, akamugamuchira mumba make.

³⁹Iye akanga anomunun'una ainzi Maria, akagarawo pamakumbo aJesu, akanzwa shoko rake.

⁴⁰Asi Marita akanga achitambudzika nokushanda zvikuru, akauya, akati, “Ishe, hamuna hanya muchiona munun'una wangu achindirega ndichishanda ndoga here? Muudzei andibatsire.”

⁴¹Ishe akapindura, akati kwaari, “Marita! Marita! Unofunganya, nokuzvitambudza nezvinhu zvizhinji,

⁴²asi chinhu chimwe chinodikanwa; nokuti Maria akasanangura mugove wakanaka, waasingazotorerwi.”