Read Shona Union Version 2002 RUKA 17 Bible Online

RUKA 17 - Shona Union Version 2002 bible

RUKA 17

¹Zvino akati kuvadzidzi vake, “Hazvingaitiki kuti zvigumbuso zvisauya. Asi ane nhamo iye azvinouya naye.

²Zvaiva nani kwaari, kuti guyo risungirirwe mumutsipa wake, awisirwe mugungwa, pakuti agumbuse mumwe wavaduku ava.

³“Chenjerai; kana hama yako ikatadza, umurayire; kana akatendeuka, umukanganwire.

⁴Kunyange akutadzira kanomwe nezuva rimwe, akadzokera kwauri kanomwe, achiti, ‘Ndatendeuka;’ umukanganwire.”

⁵Zvino vapostori vakati kuna Ishe, “Tiwedzerei kutenda kwedu.”

⁶Ishe akati, “Kana maiva nokutenda kwakaita setsanga yemasitadhi, maiti kumuonde uyu, ‘Dzurwa, usimwe mugungwa!’ Uchakuteererai.

⁷“Ndiani kwamuri angava nomuranda anorima, kana anofudza makwai, akati kwaari, achibva kumunda, Uya, ugare pakudya?

⁸“Handiti angati kwaari, ‘Ndigadzirire zvokudya, uzvisunge chiuno, undishandire, kusvikira ini ndadya, ndikanwa; iwe ugozodya, nokunwa?’

⁹Ko angatenda muranda, zvaaita zvakanga zvarayirwa here?

¹⁰“Saizvozvo nemiwo, kana maita zvose zvamarayirwa, muti, ‘Tiri varanda pasina, takaita sezvataifanira kuita.’ ”

¹¹Zvino vakati vachienda Jerusaremu, akapfuura napaSamaria neGariria.

¹²Zvino achipinda munomumwe musha, akasangana navarume vane gumi vaiva namaperembudzi, vamire kure.

¹³Vakadanidzira, vachiti, “Jesu, Tenzi, tinzwirei ngoni!”

¹⁴Zvino akati achivaona, akati kwavari, “Endai mundozviratidza kuvapristi.” Vakati vachienda, vakapora.

¹⁵Zvino mumwe wavo, akati achiona kuti ndaporeswa, akadzoka, achikudza Mwari nezwi guru;

¹⁶akawira pasi nechiso patsoka dzake, akamuvonga. Zvino iye akanga ari muSamaria.

¹⁷Ipapo Jesu akapindura, akati, “Havana kuporeswa vane gumi here? Vapfumbamwe varipiko?

¹⁸Hapana akawanikwa adzokera kuzokudza Mwari, asi uyu mutorwa here?”

¹⁹Ipapo akati kwaari, “Simuka, uende; kutenda kwako kwakuponesa.”

²⁰Zvino akati achibvunzwa naFarisi kuti ushe hwaMwari hunosvika rini, akapindura, akati, “Ushe hwaMwari hahuuyi huchionekwa.

²¹Havangati, ‘Tarirai pano!’ Kana, ‘Uko!’ Nokuti tarirai, ushe hwaMwari huri mukati menyu.”

²²Akati kuvadzidzi vake, “Mazuva achasvika amuchatsvaka kuona zuva rimwe ramazuva oMwanakomana womunhu, asi hamungarioni.

²³Vachati kwamuri, ‘Tarirai uko! Tarirai pano!’ Regai kuenda, kana kuvatevera;

²⁴nokuti semheni inopenya, ichibva kune rumwe rutivi pasi pedenga, ichivhenekera kusvikira kune rumwe rutivi pasi pedenga; ndizvo zvichaita Mwanakomana womunhuo nezuva rake.

²⁵Asi anofanira kumbotambudzika zvizhinji, nokurambwa norudzi urwu.

²⁶Sezvazvakanga zvakaita namazuva aNoa, ndizvo zvazvichaitawo namazuva oMwanakomana womunhu;

²⁷vaidya, nokunwa, nokuwana, nokuwaniswa, kusvikira zuva rakapinda Noa muareka, mvura zhinji ikasvika, ikaparadza vose.

²⁸Sezvazvakanga zvakaitawo namazuva aRoti; vaidya, nokunwa, nokutenga, nokutengesa, nokusima, nokuvaka;

²⁹asi nomusi wakabuda Roti muSodhoma, moto nesurufa zvakanaya, zvichibva kudenga, zvikavaparadza vose.

³⁰Ndizvo zvazvichaitawo nezuva iro, Mwanakomana womunhu raachaonekwa naro.

³¹“Nezuva iro, ari pamusoro peimba, nhumbi dzake dziri mumba, ngaarege kuburuka kundodzitora; saizvozvowo, ari kumunda ngaarege kudzokera kunezviri shure.

³²“Rangarirai mukadzi waRoti.

³³Ani naani anotsvaka kungwarira upenyu hwake, acharasikirwa nahwo, uye ani naani anorasikirwa nahwo, achahuraramisa.

³⁴Ndinoti kwamuri, usiku uhwo varume vaviri vachava panhoo imwe, mumwe achatorwa, mumwe achasiyiwa.

³⁵Vakadzi vaviri vachakuya pamwechete, mumwe achatorwa, mumwe achasiyiwa. [

³⁶Vaviri vachava kumunda, mumwe achatorwa, mumwe achasiyiwa.]”

³⁷Ipapo vakapindura, vakati kwaari, “Ipiko, Ishe?” Akati kwavari, “Apo pano mutumbi, ndipo panounganirawo magora.”