Read Shona Union Version 2002 RUKA 2 Bible Online

RUKA 2 - Shona Union Version 2002 bible

RUKA 2

¹Zvino namazuva iwayo chirevo chakaitwa naKesari Augusto, kuti nyika yose inyorwe mazita.

²Uku ndokwaiva kunyorwa kwokutanga, kwakaitwa Kuriniosi ari mubati weSiria.

³Vanhu vose vakaenda kundonyorwa, mumwe nomumwe kuguta rake.

⁴NaJosefawo akabva Gariria, muguta reNazareta, akaenda Judhea, kuguta raDhavhidhi, rinonzi Bheterehemu, nokuti aiva weimba yaDhavhidhi, noworudzi rwake;

⁵kuti anyorwe naMaria, wakanga arooorwa, ava napamuviri.

⁶Zvino vakati varipo, mazuva okusununguka kwake akasvika;

⁷akasununguka dangwe rake mwanakomana, akamuputira nemicheka, akamuvanzarika muchidyiro chezvipfuwo, nokuti vakashaiwa nzvimbo mumba mavaeni.

⁸Zvino kwakanga kuna vafudzi munyika iyo, vaigara kuhuragu vachirinda mapoka avo usiku.

⁹Mutumwa waIshe akamira navo, nokubwinya kwaIshe kukavakomba, vakatya nokutya kukuru.

¹⁰Ipapo mutumwa akati kwavari, “Musatya; nokuti tarirai, ndinokuparidzirai mashoko omufaro mukuru, uchava wavanhu vose;

¹¹nokuti nhasi mazvarirwa muguta raDhavhidhi Muponesi, ndiye Kristu Ishe.

¹²Ichi ndicho chiratidzo kwamuri, muchandowana mwana mucheche, akaputirwa nemicheka, avete muchidyiro chezvipfuwo.”

¹³Ipapo kamwe-kamwe kukavapo pamwechete nomutumwa, vazhinji vehondo yokudenga, vachirumbidza Mwari, vachiti,

¹⁴“Mwari ngaarumbidzwe kumusoro, Norugare ngaruve navanhu vaanofarira.”

¹⁵Zvino vatumwa vakati vabva kwavari, vaenda kudenga, vafudzi vakataurirana, vachiti, “Ngatiende hedu Bheterehemu, tindoona chinhu ichi chakaitwa; chatakaziviswa naIshe.”

¹⁶Ipapo vakakurumidza kuenda, vakawana Maria naJosefa, nomwana mucheche avete muchidyiro chezvipfuwo.

¹⁷Vakati vaona, vakazivisa kwose shoko ravakanga vaudzwa rezvomwana uyo.

¹⁸Vose vakanzwa vakashamiswa nezvavakaudzwa navafudzi.

¹⁹Asi Maria akachengeta mashoko iwayo ose, achifungisisa mumwoyo make.

²⁰Zvino vafudzi vakadzokera kwakare, vachikudza nokurumbidza Mwari pamusoro pezvose zvavakanzwa nezvavakaona, sezvavakanga vaudzwa.

²¹Mazuva masere akati apfuura, musi wokudzingiswa wasvika, vakatumidza zita rake Jesu, iro raakanga atumidzwa nomutumwa, asati agamuchirwa mudumbu ramai.

²²Zvino mazuva okuzvinatsa kwavo nomurayiro waMosesi akati apera, vakaenda naye Jerusaremu, kuti vamuise pamberi paIshe;

²³sezvazvakanyorwa pamurayiro waIshe, zvichinzi, “Mwanarume mumwe nomumwe anotanga kuzarura chizvaro, achanzi mutsvene waIshe,”

²⁴uye kubayira chibayiro; sezvazvakarehwa pamurayiro waIshe, zvinoti, njiva mbiri, kana hangaiwa mbiri duku.

²⁵Zvino, kwakanga kune munhu paJerusaremu, ainzi Simioni; aiva munhu akarurama aida Mwari, aitarira kunyaradzwa kwavaIsiraeri; noMweya Mutsvene wakanga anaye.

²⁶Iye akanga aratidzwa noMweya Mutsvene, kuti haangaoni rufu, asati aona Kristu waIshe.

²⁷Iye akauya mutemberi achifambirwa noMweya; zvino vabereki vakati vachiuya nomwana Jesu, kuti vaite naye nomutoo womurayiro,

²⁸akamubata mumaoko ake akarumbidza Mwari, achiti,

²⁹“Zvino, Tenzi, muranda wenyu ngaaende hake Norugare sezvamakareva;

³⁰Nokuti meso angu aona ruponeso rwenyu,

³¹Rwamakagadzira pamberi pavanhu vose;

³²Chiedza chokuvhenekera vahedheni, Nokurumbidzwa kwavanhu venyu vaIsiraeri.”

³³Baba vake namai vake vakashamiswa nezvakarehwa pamusoro pake.

³⁴Ipapo Simioni akavaropafadzwa, akati kuna Maria, mai vake, “Tarira, mwana uyu akaisirwa kuwa nokumuka kwavazhinji pakati pavaIsiraeri, chichava chiratidzo chicharambwa;

³⁵uye munondo uchabaya mweya wakowo; kuti ndangariro dzemwoyo mizhinji dzizikanwe.”

³⁶Zvino kwakanga kuna Anawo, muporofitakadzi, mukunda waFanueri, worudzi rwaAsheri; iye wakanga achembera kwazvo, akanga anomurume makore manomwe kubvira pahumhandara hwake,

³⁷akanga ari chirikadzi yaiva namakore makumi masere namana, akanga asingabvi mutemberi, achishumira Mwari nokuzvinyima zvokudya nokukumbira usiku namasikati.

³⁸Naiye akati achisvika nenguva iyo, akatenda Mwari, akataura pamusoro pake kuna vose vakanga vachitarira kusunungurwa kweJerusaremu.

³⁹Zvino vakati vapedza zvose zvomurayiro waIshe, vakadzokera Gariria, kuguta ravo Nazareta.

⁴⁰Mwana akakura, akasimba, akazara nenjere; nenyasha dzaMwari dzikava pamusoro pake.

⁴¹Zvino vabereki vake vaisienda Jerusaremu makore ose kumutambo wePasika.

⁴²Zvino iye akati ava namakore ane gumi namaviri, akakwirako netsika yomutambo.

⁴³Vakati vapedza mazuva, pakudzoka kwavo mwana Jesu akasara Jerusaremu, vabereki vake vasingazivi.

⁴⁴Asi zvavaiti zvimwe ari kuna vamwe vakanga vari panzira navo, vakafamba zuva rimwe, vakazomutsvaka kuhama dzavo nokushamwari dzavo.

⁴⁵Vakati vamushaiwa, vakadzokera Jerusaremu vachimutsvaka.

⁴⁶Mazuva matatu akati apfuura, vakamuwana ari mutemberi, agere pakati pavadzidzisi achiteerera nokuvabvunza.

⁴⁷Vose vakanga vachimunzwa, vakashamiswa nokuziva kwake uye nokupindura kwake.

⁴⁸Zvino vakati vamuona, vakakatyamara; mai vake vakati kwaari, “Mwana, watiitireiko zvakadai? Tarira, baba vako neni takakutsvaka tichichema.”

⁴⁹Akati kwavari, “Makanga muchinditsvakireiko? Makanga musingazivi kuti ndinofanira kuva pazvinhu zvaBaba vangu here?”

⁵⁰Vakasanzwisisa shoko raakavaudza.

⁵¹Ipapo akaburuka navo, akasvika Nazareta, akavateerera. Mai vake vakachengeta mashoko iwayo ose mumwoyo mavo.

⁵²Jesu akaramba achienda mberi pakuchenjera, napakukura, napakufadza Mwari navanhu.