Read Shona Union Version 2002 RUKA 20 Bible Online

RUKA 20 - Shona Union Version 2002 bible

RUKA 20

¹Zvino pane rimwe ramazuva iwayo, achidzidzisa vanhu mutemberi, achivaparidzira Vhangeri, vapristi vakuru navanyori navakuru vakasvika,

²vakataura, vakati kwaari, “Tiudzei, kuti munoita zvinhu izvi nesimba ripi, kana ndianiko akakupai simba iri?”

³Akapindura, akati kwavari, “Neni ndichakubvunzaiwo shoko; ndiudzei.

⁴Rubhabhatidzo rwaJohani rwakabva kudenga kana kuvanhu here?”

⁵Vakataurirana pakati pavo, vachiti, “Kana tikati, ‘Kudenga,’ achati, ‘Makagoregerei kumutenda?’

⁶Asi kana tikati, ‘Kuvanhu,’ vanhu vose vachatitaka namabwe; nokuti ivo vanotenda kuti Johani aiva muporofita.”

⁷Vakapindura, vachiti, “Hatizivi kwarwakabva.”

⁸Zvino Jesu akati kwavari, “Neniwo handingakuudziyi simba randinoita naro zvinhu izvi.”

⁹Zvino akatanga kuudza vanhu mufananidzo uyu, “Mumwe munhu akanga asima munda wemidzambiringa; akaupa varimi; akandogara kumwe nguva refu.

¹⁰Nenguva yezvibereko akatuma muranda kuvarimi, kuti vamupe zvibereko zvomunda wemidzambiringa; asi varimi vakamurova, vakamudzosa asina.

¹¹“Akatumazve mumwe muranda; naiyewo vakamurova, vakamunyadzisa, vakamudzosa asina.

¹²Akatumazve wechitatu; naiye vakamukuvadza, vakamubudisa kunze.

¹³Zvino muridzi womunda wemidzambiringa akati, ‘Ndichaiteiko? Ndichatuma mwanakomana wangu anodikanwa, zvimwe vachamukudza iye.’

¹⁴Asi varimi vakati vachimuona, vakarangana, vakati, ‘Uyu ndiye mugari wenhaka; ngatimuuraye, nhaka igova yedu.’

¹⁵Vakamubudisa kunze kwomunda wemidzambiringa, vakamuuraya. Zvino, muridzi womunda wemidzambiringa achavaiteiko?

¹⁶Achauya, akaparadza varimi ivava; munda wemidzambiringa akaupa vamwe.” Zvino vachinzwa izvozvo, vakati, “Haisva!”

¹⁷Wakati avatarisisa, akati, “Zvino chinyiko icho chakanyorwa, chinoti, ‘Ibwe rakaraswa navavaki, Ndiro rakazova musoro wekona?’

¹⁸“Mumwe nomumwe anowira pamusoro pebwe iro, achavhunikanya; asi richaparadza warinowira.”

¹⁹Zvino vanyori navapristi vakuru vakatsvaka nenguva iyo kumubata, asi vakatya vanhu; nokuti vakaziva kuti akareva ivo nomufananidzo uyo.

²⁰Vakamucherechedza, vakatuma vashori, vakazviita savanhu vakarurama, kuti vamubate pakutaura kwake, vamuise kuushe nesimba romutongi.

²¹Vakamubvunza, vachiti, “Mudzidzisi, tinoziva kuti munotaura nokudzidzisa zvakarurama, musingatendi zvinoonekwa zvomunhu, asi munodzidzisa nzira yaMwari nezvokwadi.

²²Ko zvino takatenderwa kuterera Kesari mutero here, kana kwete.”

²³Asi iye achiziva kunyengera kwavo, akati kwavari,

²⁴“Ndiratidzei dhenari. Rinomufananidzo norunyoro rwaaniko?” Vakati, “ZvaKesari.”

²⁵Ipapo akati kwavari, “Naizvozvo ipai Kesari zvaKesari, naMwari zvaMwari.”

²⁶Vakakoniwa kumubata pakutaura kwake pamberi pavanhu; vakashamiswa nokupindura kwake, ndokunyarara.

²⁷Zvino vamwe vaSadhusi, ivo vanoramba kumuka kwavakafa vachiti hakuna, vakauya kwaari, vakamubvunza,

²⁸vachiti, “Mudzidzisi, Mosesi akatinyorera kuti, ‘Kana mukoma womunhu akafa, anomukadzi, asi iye asina vana, munun'una wake atore mukadzi wake, amutsire mukoma wake vana.’

²⁹Zvino, kwakanga kuna vanakomana vomunhu mumwe vanomwe; wedangwe akatora mukadzi, akafa asina vana;

³⁰nowechipiri;

³¹nowechitatu akamutorawo; nokudaro navanomwe vose, vakasasiya vana, vakafa.

³²Pashure mukadzi akafawo.

³³Zvino pakumuka achava mukadzi waaniko kwavari? Nokuti akanga ari mukadzi wavose vanomwe.”

³⁴Jesu akati kwavari, “Vanakomana venyika ino vanowana, uye vanowaniswa;

³⁵asi avo vachanzi naMwari vakafanira kuwana nyika iyo nokumuka kwavakafa, havawani, uye havawaniswi.

³⁶Nokuti havazofizve; nokuti vachaenzana navatumwa; vava vana vaMwari zvavari vana vokumuka.

³⁷Naiye Mosesiwo akaratidza pashoko reGwenzi kuti vakafa vanomutswazve, paakati, ‘Ishe ndiye Mwari waAbhurahamu, naMwari waIsaka, naMwari waJakobho.’

³⁸“Zvino Mwari haazi Mwari wavakafa, asi wavapenyu; nokuti vose vapenyu kwaari.”

³⁹Ipapo vamwe vanyori vakamupindura, vakati, “Mudzidzisi, mataura zvakanaka.”

⁴⁰Nokuti vakanga vachitya kuzomubvunza chinhu.

⁴¹Zvino akati kwavari, “Vanoreva seiko kuti Kristu ndiye Mwanakomana waDhavhidhi?

⁴²Nokuti Dhavhidhi akareva amene mubhuku yaMapisarema, achiti, ‘Ishe akati kuna Ishe wangu: Gara kurudyi rwangu,

⁴³Kusvikira ndaisa vavengi vako vave chitsiko chetsoka dzako.’

⁴⁴“Naizvozvo, Dhavhidhi anomuti, ‘Ishe,’ zvino angagova Mwanakomana wake seiko?”

⁴⁵Zvino akati kuvadzidzi vake, vanhu vose vachizvinzwa,

⁴⁶“Chenjerai vanyori, vanoda kufamba nenguo refu, vachifarira kukwaziswa padare, nezvigaro zvapamberi mumasinagoge, nougaro hwapamberi pamitambo;

⁴⁷vanoparadza dzimba dzechirikadzi, vachiita manomano eminyengetero mirefu; ivavo vachatongerwa zvakaipa zvinopfuurisa.”