Read Shona Union Version 2002 RUKA 21 Bible Online

RUKA 21 - Shona Union Version 2002 bible

RUKA 21

¹Zvino akati achitarira, akaona vapfumi vachiisa zvipo zvavo muchivigiro chemari.

²Akaona imwe chirikadzi, yaiva murombo, achiisamo tumari tuviri tuduku.

³Akati, “Zvirokwazvo ndinoti kwamuri, chirikadzi iyi, iri murombo, yakaisa kupfuura vamwe vose;

⁴nokuti avo vose vakaisa zvipo, vachitora pazvizhinji zvavanazvo, asi uyu akaisa, achitora pakushayiwa kwake, zvaayifanira kurarama nazvo, zvose zvaakanga anazvo.”

⁵Zvino vamwe vakati vachitaura pamusoro petemberi, kuti yakanga yakashongedzwa namabwe akanaka nezvipo, iye akati,

⁶“Kana zviri izvi zvamunoona, mazuva achasvika, asingazoregwi ibwe pamusoro pebwe, risingazowisirwi pasi.”

⁷Zvino vakamubvunza, vachiti, “Mudzidzisi, izvozvi zvichagova riniko? Nechiratidzo chichava chipi, kana izvozvi zvoda kuitwa?”

⁸Akati, “Chenjerai, kuti murege kutsauswa; nokuti vazhinji vachauya nezita rangu, vachiti, ‘Ndini Kristu’; ‘Nguva yaswedera.’ Musavatevera.

⁹“Kana muchinzwa zvokurwa, nenyonganiso, musavhunduka henyu, nokuti izvozvi zvinofanira kumboitwa; asi kuguma hakusi pakarepo.”

¹⁰Akati kwavari, “Rudzi rumwe ruchamukira rumwe rudzi, noushe humwe huchamukira humwe ushe.

¹¹Kudengenyeka kukuru kwenyika kuchavapo, nokune dzimwe nzvimbo nzara nehosha, nezvinotyisa, uye zviratidzo zvikuru, zvichabva kudenga, zvichavapo.

¹²Asi izvozvi zvose zvisati zvasvika, vachakubatai, nokukutambudzai, vachikuisai kumasinagoge nomumatorongo, nokukuisai pamberi pamadzimambo namadzishe, nokuda kwezita rangu.

¹³Ichi chichava chapupu kwamuri.

¹⁴Naizvozvo simbai mumwoyo menyu, kuti murege kumbofungisisa pamuchapindura napo.

¹⁵Nokuti ndichakupai muromo nokuchenjera, kuchakonesa vavengi venyu vose kukukundai nokuramba zvamunoreva.

¹⁶Muchaiswa kuvatongi kunyange navabereki, navanun'una, nehama, neshamwari; vamwe venyu vachaurawa.

¹⁷Muchavengwa navanhu vose nokuda kwezita rangu.

¹⁸“Asi ruvhudzi rumwe rwomusoro wenyu harungarasiki.

¹⁹Nokutsungirira kwenyu muchawana upenyu hwenyu.

²⁰“Zvino kana muchiona Jerusaremu rakombwa nehondo, zivai kuti roda kuparadzwa.

²¹Musi uyo vari muJudhea ngavatizire kumakomo; navari mukati maro ngavabude; navari kuruwa ngavarege kupindamo.

²²Nokuti iwayo ndiwo mazuva okutsiva, kuti zvose zvakanyorwa zviitike.

²³Asi vachava nenhamo vane pamuviri navanoyamwisa namazuva iwayo, nokuti kutambudzika kukuru kuchavapo panyika, nokutsamwa pamusoro pavanhu ivavo.

²⁴Vachaparadzwa nomunondo, nokutapwa kumarudzi ose; Jerusaremu richatsikwa navahedheni, kusvikira nguva dzavahedheni dzazadzika.

²⁵“Zviratidzo zvichavapo pazuva napamwedzi, napanyeredzi; napanyika hurombo hwavanhu, vachikanganiswa nokutinhira kwegungwa namafungu;

²⁶vanhu vachapera nokutya nokutarira zvinowira nyika; nokuti masimba okudenga achadengenyeka.

²⁷Ipapo vachaona Mwanakomana womunhu achiuya negore, nesimba nokubwinya kukuru.

²⁸Asi kana izvozvi zvichitanga kuitika, tarirai kumusoro, musimudze misoro yenyu, nokuti kusunungurwa kwenyu kwaswedera.”

²⁹Zvino akavataurira mufananidzo, achiti, “Tarirai muonde nemiti yose.

³⁰Kana yotunga, mukazviona, munoziva kuti zvino zhizha rava padyo.

³¹“Saizvozvo, nemiwo, kana moona izvozvo zvoitwa, zivai kuti ushe hwaMwari hwava padyo.

³²“Zvirokwazvo, ndinoti kwamuri, rudzi urwu harungatongopfuuri, kusvikira zvose zvaitika.

³³Denga nenyika zvichapfuura, asi mashoko angu haangatongopfuuri.

³⁴“Chenjerai, kuti mwoyo yenyu irege kuremedzwa nokudyisa nokuraradza, nokufunganya pamusoro pezvinhu zvoupenyu huno, kuti zuva iro rirege kukuwirai seriva.

³⁵Nokuti richawira vose vagere panyika yose.

³⁶Asi rindai nenguva dzose, mukumbire, kuti mugone kupukunyuka pazvinhu izvi zvose zvinozoitwa, mugomira pamberi poMwanakomana womunhu.”

³⁷Zvino aidzidzisa masikati mutemberi, asi usiku aibuda, akandovata mugomo rinonzi reMiorivhi.

³⁸Vanhu vose vakauya kwaari mutemberi mangwanani, kuzomunzwa.