Read Shona Union Version 2002 RUKA 22 Bible Online

RUKA 22 - Shona Union Version 2002 bible

RUKA 22

¹Zvino mutambo wezvingwa zvisina mbiriso, unonzi Pasika, wakaswedera.

²Vapristi vakuru navanyori vakatsvaka kuti vangamuuraya sei; nokuti vakanga vachitya vanhu.

³Zvino Satani akapinda kuna Judhasi ainzi Isikarioti, mumwe wavane gumi navaviri.

⁴Akaenda, akandorangana navapristi vakuru navakuru vetemberi, kuti angamuisa kwavari sei.

⁵Vakafara, vakatenderana naye vose kuti vamupe mari.

⁶Akatenda, akatsvaka nguva yokumuisa nayo kwavari pasina vanhu vazhinji

⁷Zvino zuva rezvingwa zvisina mbiriso rakati rasvika, rakafanira kubayirwa Pasika naro,

⁸akatuma Petirosi naJohani, achiti, “Endai, mundotigadzirira Pasika, kuti tidye.”

⁹Vakati kwaari, “Munoda kuti tigadzirirepiko?”

¹⁰Akati kwavari, “Tarirai, kana mapinda muguta, muchasangana nomunhu akatakura chirongo chemvura; mumutevere iye kumba kwaanoenda;

¹¹muti kumuridzi weimba, ‘Mudzidzisi anoti kwauri, imba yavaeni iripiko, mandingadyira Pasika navadzidzi vangu?

¹²Achakuratidzai imba huru iri kumusoro, yakarongedzwa; gadzirai ipapo.’ ”

¹³Vakaenda, vakandowana sezvaakanga avaudza; vakagadzira Pasika.

¹⁴Zvino nguva yakati yasvika, akagara pakudya navapostori.

¹⁵Akati kwavari, “Ndakanga ndichida zvikuru kudya Pasika iyi nemi ndisati ndatambudzika.

¹⁶Nokuti ndinoti kwamuri, handichazoidyi, kusvikira yaitika muushe hwaMwari.”

¹⁷Zvino akatora mukombe; akavonga, akati, “Torai ichi, mugovane pakati penyu.

¹⁸Nokuti ndinoti kwamuri, kubva zvino handichatongonwizve michero yomudzambiringa, kusvikira ushe hwaMwari hwasvika.”

¹⁹Akatora chingwa, akavonga, akamedura, akavapa, achiti, “Ichi muviri wangu, unopirwemi; itai izvi, mugondirangarira.”

²⁰Nokudarowo, vapedza kurayira, akatora mukombe, akati, “Mukombe uyu isungano itsva muropa rangu, rinoteurirwemi.

²¹“Asi tarirai, ruoko rwaiye, anondipandukira, runeni patafura.

²²“Nokuti Mwanakomana womunhu anoenda hake, sezvazvakatemwa; asi anenhamo munhu uyo waanopandukirwa naye.”

²³Ipapo vakatanga kubvunzana kuti ndianiko kwavari angaita chinhu icho.

²⁴Zvino nharo dzakamuka pakati pavo kuti ndiani kwavari achanzi mukuru.

²⁵Akati kwavari, “Madzimambo avahedheni ane simba pamusoro pavo, navabati vavo vanonzi, ‘Vabatsiri.’

²⁶Zvino imi musadaro, asi mukuru kwamuri ngaave somuduku, nomutungamiri soanoshandira.

²⁷Nokuti ndianiko mukuru, agere pakudya, kana anoshandira? Haazi iye ugere pakudya here? Asi ini ndiri pakati penyu sounoshumira.

²⁸“Zvino imi ndimi mavakugara neni pamiedzo yangu.

²⁹Ndinokugarisai nhaka youshe saBaba vangu vakandigarisa nhaka,

³⁰kuti mugodya nokunwa patafura rangu muushe hwangu; muchagara pazvigaro zvoushe, muchitonga marudzi ane gumi namaviri avaIsiraeri.”

³¹“Simoni! Simoni! Tarira Satani akakumbira kuti akuzungurei imi sezviyo;

³²asi ini ndakakukumbirira iwe, kuti kutenda kwako kurege kupera; iwe kana watendeuka, usimbise hama dzako.”

³³Akati kwaari, “Ishe, ndakazvigadzirira kuenda nemi mutorongo, kunyange kurufu.”

³⁴Akati, “Petirosi, ndinoti kwauri, nhasi, jongwe risati rarira, uchandiramba katatu uchiti haundizivi.”

³⁵Zvino akati kwavari, “Musi wandakakutumai, musina chikwama nehombodo neshangu, makashayiwa chinhu here?” Vakati, “Hakuna.”

³⁶Akati kwavari, “Asi zvino, ane chikwama, ngaachitore, nokudarowo ane hombodo; asinamunondo, ngaatengese nguo yake, autenge.

³⁷“Nokuti ndinoti kwamuri, kuti izvi zvakanyorwa zvinofanira kuitika kwandiri, zvinoti, ‘Akaverengwa pamwechete navadariki vomurayiro;’ nokuti izvo zvakanyorwa pamusoro pangu zvoitika.”

³⁸Ipapo vakati, “Ishe, tarirai, heyi minondo miviri.” Akati kwavari, “Zvaringana.”

³⁹Zvino akabuda, akaenda kugomo reMiorivhi, sezvaaisiita; navadzidzi vake vakamutevera.

⁴⁰Akati asvika panzvimbo iyo, akati kwavari, “Nyengeterai kuti murege kupinda pakuedzwa.”

⁴¹Akaparadzana navo, chinhambo chingasvika ibwe, kana rikaposherwa; akapfugama, akanyengetera,

⁴²achiti, “Baba, kana muchida, bvisai mukombe uyu kwandiri! Asi kuda kwangu kurege kuitwa, asi kwenyu.”

⁴³Ipapo mutumwa akaonekwa naye, akabva kudenga, akamusimbisa.

⁴⁴Zvino, ari pakutambudzika kukuru, akanyanya kunyengetera; ziya rake rikaita samadonhwe eropa, akadonhera pasi.

⁴⁵Akasimuka pakunyengetera, akaenda kuvadzidzi, akavawana vavata neshungu dzomwoyo.

⁴⁶Akati kwavari, “Mavatireiko? Mukai, munyengetere, kuti murege kupinda pakuedzwa.”

⁴⁷Akati achataura, tarira, vanhu vazhinji, naiye ainzi Judhasi, mumwe wavane gumi navaviri, akavatungamirira; akaswedera kuna Jesu, kuti amutsvode.

⁴⁸Jesu akati kwaari, “Judhasi, unopandukira Mwanakomana womunhu nokumutsvoda here?”

⁴⁹Zvino vaiva naye vakati vachina zvichaitika, vakati, “Ishe, totema neminondo here?”

⁵⁰Ipapo mumwe wavo akatema muranda womupristi mukuru, akamugura nzeve yorudyi.

⁵¹Jesu akapindura, akati, “Regai, zvaringana.” Akabata nzeve yake, akamuporesa.

⁵²Zvino Jesu akati kuvapristi vakuru navakuru vetemberi, navakuru vakanga vauya kwaari kumubata, “Mabuda neminondo netsvimbo sokugororo here?

⁵³Ndaiva nemi mutemberi mazuva ose mukasandibata; asi zvino inguva yenyu nesimba rerima.”

⁵⁴Zvino vakamubata, vakaenda naye, vakandomuisa kumba kwomupristi mukuru. Petirosi akatevera ari kure.

⁵⁵Vakati vavesa moto pakati poruvazhe, vakagara pasi pamwechete, naPetirosi akagara pakati pavo.

⁵⁶Zvino mumwe mushandiri akati achimuona agere muchiedza chomoto, akamutarisisa, akati, “Nouyuwo akanga anaye.”

⁵⁷Asi iye akaramba achiti, “Iwe mukadzi handimuzivi.”

⁵⁸Garegare, mumwezve akamuona, akati, “Iwe uri mumwe wavo.” Petirosi akati, “Iwe munhu, handizati.”

⁵⁹Nguva inenge seimwe yakati yapfuura, mumwezve akasimbisa, achiti, “Zvirokwazvo, uyu akanga anayewo; nokuti muGariria.”

⁶⁰Petirosi akati, “Iwe munhu, handizivi zvaunoreva!” Pakarepo, achataura, jongwe rikarira.

⁶¹Ipapo Ishe akatendeuka, akatarira Petirosi. Petirosi akarangarira shoko raIshe, raakanga amuudza, achiti, “Jongwe risati rarira nhasi, uchandiramba katatu.”

⁶²Akabuda, akachema zvikuru.

⁶³Varumewo vakanga vabata Jesu, vakamuseka, nokumurova.

⁶⁴Vakafukidzira meso ake, vakamubvunza, vachiti, “Porofita kuti ndiani akurova.”

⁶⁵Nezvimwe zvizhinji vakareva kwaari, vachimutuka.

⁶⁶Zvino kwakati kwaedza, vakuru vavanhu navapristi vakuru navanyori vakaungana, vakamuisa kumakurukota avo,

⁶⁷vachiti, “Kana uri Kristu, utiudze.” Iye akati kwavari, “Kana ndikakuudzai, hamungatendi.

⁶⁸Kana ndikakubvunzai, hamungandipinduri.

⁶⁹“Asi kubva zvino Mwanakomana womunhu achagara kurudyi rwesimba raMwari.”

⁷⁰Ipapo vose vakati, “Uri Mwanakomana waMwari kanhi?” Akati kwavari, “Mareva kuti ndini iye.”

⁷¹Ivo vakati, “Tichatsvakireiko chapupu? Nokuti tazvinzwira pachedu pamuromo wake.”