Read Shona Union Version 2002 RUKA 23 Bible Online

RUKA 23 - Shona Union Version 2002 bible

RUKA 23

¹Zvino vose vakanga vakaungana, vakasimuka, vakaenda naye kuna Pirato.

²Vakatanga kumupomera mhosva, vachiti, “Takawana munhu uyu achitsausa rudzi rwedu, achivadzivisa kuti varege kuvigira Kesari kuterera; uye achizviti ndini Kristu Mambo.”

³Ipapo Pirato akamubvunza, akati, “Ko uri Mambo wavaJudha here?” Akamupindura, akati, “Ndizvo zvamareva.”

⁴Pirato akati kuvapristi vakuru nokuvazhinji, “Handiwani mhosva kumunhu uyu.”

⁵Ivo vakanyanya, vachiti, “Anomutsa vanhu, achidzidzisa muJudhea rose, achitanga paGariria kusvikira pano.”

⁶Pirato wakati achinzwa izvozvo, akabvunza kana munhu uyu ari muGarirea.

⁷Akati anzwa kuti anobva kunyika yakatongwa naHerodhi, akamutumira kuna Herodhi, nokuti akanga ari muJerusaremu pamazuva iwayo.

⁸Zvino Herodhi akafara kwazvokwazvo achiona Jesu; nokuti aida kumuona kare, zvaakanga anzwa zvake; akafunga kuti achaona chimwe chiratidzo chingaitwa naye.

⁹Akamubvunza mashoko mazhinji; asi iye haana kumupindura chinhu.

¹⁰Vapristi vakuru navanyori vakamira vakamupomera mhosva zvikuru.

¹¹NaHerodhi navarwi vake vakamuzvidza, nokumuseka; vakazomupfekedza nguo dzinobwinya, vakamudzosera kuna Pirato.

¹²Nomusi uyo Pirato naHerodhi vakayanana; nokuti vaivengana.

¹³Zvino Pirato akaunganidza vapristi vakuru namakurukota navanhu,

¹⁴akati kwavari, “Mauya kwandiri nomunhu uyu, muchiti, anotsausa vanhu; tarirai ini ndamubvunzisisa pamberi penyu, ndikasawana kumunhu uyu mhosva yezvinhu zvamunomupomera nazvo;

¹⁵kunyange naHerodhiwo; nokuti wamudzosera kwatiri; tarirai, hakuna chinhu chakaitwa naye, chakafanira rufu.

¹⁶“Naizvozvo ndichamurova, ndigomusunungura. [

¹⁷Nokuti aifanira kuvasunungurira mumwe pamutambo.]”

¹⁸Asi vose vakadanidzira pamwechete, vachiti, “Bvisai munhu uyu, mutisunungurire Bharabhasi!”

¹⁹Iye akanga asungwa mutorongo nemhaka yebope rakanga ramutswa muguta, neyokuuraya.

²⁰Zvino Pirato akataurazve navo, achida kusunungura Jesu.

²¹Asi ivo vakaramba vachidanidzira, vachiti, “Roverai pamuchinjikwa, mumurovere pamuchinjikwa!”

²²Akati kwavari rwechitatu, “Uyu akagotadzeiko? Handina kuwana mhosva yorufu kwaari.”

²³Asi ivo vakasimbisa namazwi makuru, vachikumbira kuti aroverwe pamuchinjikwa. Mazwi avo akakunda.

²⁴Zvino Pirato akatonga kuti zvavakakumbira zviitwe;

²⁵akavasunungurira uyo wavakakumbira, akanga asungwa mutorongo nemhaka yebope neyokuuraya; akavapa Jesu vaite nokuda kwavo.

²⁶Vakati vachienda naye, vakabata mumwe, ainzi Simoni weKurini, achibva kuruwa, vakamutakudza muchinjikwa, kuti autakure shure kwaJesu.

²⁷Akateverwa navanhu vazhinji-zhinji, navakadzi vaimuririra nokumuchema.

²⁸Asi Jesu akatendeukira kwavari, akati, “Vakunda veJerusaremu, musandichema ini, asi muzvicheme imi navana venyu;

²⁹nokuti tarirai, mazuva anouya, avachati, ‘Vakaropafadzwa vasingaponi, nezvizvaro zvisina kutongobereka, namazamu asina kuyamwisa.’

³⁰Musi uyo muchatanga kureva kumakomo, muchiti, ‘Wirai pamusoro pedu,’ nokuzvikomo, ‘Tifukidzei.’

³¹Nokuti kana vachiita izvi kumuti munyoro, wakaoma uchaitirweiko?”

³²Kwakanga kuna vamwe vatadzi vaviri, vavakaenda navo pamwechete naye kundourawa.

³³Zvino vakati vasvika panzvimbo inonzi, “Dehenya,” vakamuroverapo navatadzi, mumwe kurudyi mumwe kuruboshwe.

³⁴Ipapo Jesu akati, “Baba, muvakanganwire, nokuti havazivi chavanoita.” Vakagovana nguo dzake, vachikanda mijenya pamusoro padzo.

³⁵Vanhu vakamira, vachitarira; namakurukota vakamusekawo, vachiti, “Wakaponesa vamwe; ngaazviponese, kana ari Kristu waMwari, Mutsanangurwa wake.”

³⁶Navarwiwo vakamuseka, vakauya kwaari, vakamupa vhiniga,

³⁷vachiti, “Kana uri Mambo wavaJudha, uzviponese.”

³⁸Zvino kwakanga kune runyoro pamusoro pake rwaiti, “UYU NDIMAMBO WAVAJUDHA.”

³⁹Mumwe wavatadzi vakanga vakaturikwa, akamutuka, achiti, “Hauzi Kristu here? Uzviponese, nesuo.”

⁴⁰Mumwe akapindura, akamurayira, achiti, “Hautyi kunyange naMwari kanhi, zvauri pakutongwa kamwe naye?

⁴¹Kana tirisu, takaitirwa patakafanirwa napo; nokuti isu tinopiwa zvakafanira mabasa edu; asi uyu haana kuita chinhu chisakafanira.”

⁴²Ipapo akati, “Jesu mundirangarire, kana mosvika muushe hwenyu!”

⁴³Iye akati kwaari, “Zvirokwazvo, nhasi uchava neni muParadhiso.”

⁴⁴Zvino yakanga yava nguva inenge yechitanhatu; rima rikavapo panyika yose, kusvikira panguva yepfumbamwe.

⁴⁵Zuva rikasviba; chidzitiro chetemberi chikabvaruka napakati.

⁴⁶Zvino Jesu akadana nezwi guru, achiti, “Baba, ndinoisa mweya wangu pamaoko enyu!” Akati areva izvozvo, akabudisa mweya wake.

⁴⁷Ipapo mukuru wezana akati aona zvaitwa, akarumbidza Mwari achiti, “Zvirokwazvo, munhu uyu akanga akarurama.”

⁴⁸Vazhinji vose vakanga vakaungana kuzoona izvozvo, vakati vaona zvaitwa, vakadzoka vachirova zvipfuva zvavo.

⁴⁹Navazikanwi vake vose, navakadzi, vaimutevera vachibva Gariria, vakamira kure, vachiona izvozvo.

⁵⁰Zvino kwakanga kuno mumwe munhu, ainzi Josefa, mumwe wamakurukota, murume akanaka akarurama,

⁵¹iye akanga asina kutenderana navo pakurangana, nokuita kwavo, aiva weArimatia, guta ravaJudha, akanga achimirira ushe hwaMwari;

⁵²iye akaenda kuna Pirato, akandokumbira chitunha chaJesu,

⁵³akachiburusa, akachiputira nomucheka, akachiuisa mubwiro hwakanga hwakacherwa pabwe, makanga musina kumbovigwa munhu.

⁵⁴Waiva musi woKugadzirira, Sabata roda kutanga.

⁵⁵Navakadzi vakanga vauya naye, vachibva Gariria, vakavatevera, vakaona bwiro, nomuisirwo womutumbi wake.

⁵⁶Vakadzoka, vakagadzira zvinonhuwira namafuta. Vakazorora nomusi weSabata vachiterera murayiro.