Read Shona Union Version 2002 RUKA 24 Bible Online

RUKA 24 - Shona Union Version 2002 bible

RUKA 24

¹Nomusi wokutanga wevhiki, mambakwedza, vakauya kubwiro, vakabata zvinonhuwira, zvavakanga vagadzira.

²Vakawana ibwe rakunguruswa, rabviswa pabwiro,

³vakapinda, vakashayiwa chitunha chashe Jesu.

⁴Zvino vakati vachakanganiswa nazvo, tarira, varume vaviri vakamira navo vane nguo dzinopenya;

⁵zvino nokutya kwavo vakakotamira pasi nezviso zvavo, ivo vakati kwavari, “Munotsvakireiko mupenyu pakati pavakafa?

⁶“Haapo pano, amuka. Fungai zvaakakuudzai achiri Gariria,

⁷kuti, ‘Mwanakomana womunhu anofanira kuiswa mumaoko avanhu vakaipa aroverwe pamuchinjikwa, agomuka nezuva retatu.’ ”

⁸Ipapo vakarangarira mashoko ake,

⁹vakadzoka vachibva kubwiro, vakaudza vane gumi nomumwe navamwe vose zvinhu izvozvo zvose.

¹⁰Vaiva Maria Magadharina naJohana naMaria, mai vaJakobho, navamwe vakadzi vaiva navo, vakandoudza vapostori izvozvo.

¹¹Mashoko awa akaita soupenzi kwavari; vakasaatenda.

¹²Zvino Petirosi akasimuka, akamhanyira kubwiro; akakotama, akaona micheka iri yoga; ndokudzoka kumba, ashamiswa nezvakanga zvaitwa.

¹³Pazuva iroro vamwe vaviri vavo vakanga vachienda kumusha wainzi Emausi, wakanga uri kure neJerusaremu masitadhi ana makumi matanhatu;

¹⁴vakanga vachitaurirana pamusoro pezvinhu zvose zvakanga zvaitika.

¹⁵Zvino vakati vachataurirana nokubvunzana, Jesu amene akaswedera, akafamba navo.

¹⁶Asi meso avo akanga abatwa, vakasamuziva.

¹⁷Akati kwavari, “Mashoko amunotaurirana pamusoro pawo muchifamba, ndeeiko?” Vakamira vane shungu pamwoyo.

¹⁸Mumwe wavo, wainzi Kiropasi, akapindura, akati kwaari, “Ko ndiwe woga ugere muJerusaremu somutorwa, asingazivi zvakaitwamo mazuva ano here?”

¹⁹Akati kwavari, “Zvinyiko?” Vakati kwaari, “ZvaJesu weNazareta, aiva muporofita ane simba pabasa napashoko pamberi paMwari napavanhu vose;

²⁰uye kuti vapristi vakuru navashandi vedu vakamuisa kuvatongi kuti atongerwe rufu, vakamurovera pamuchinjikwa.

²¹Takanga tichiti ndiye aizodzikinura vaIsiraeri; uye pamusoro paizvozvo zvose, nhasi rava zuva retatu kubva pakuitwa kwazvo.

²²“Uyezve, vamwe vakadzi vokwedu, vakanga vafumira kubwiro, vakatishamisa;

²³nokuti vakati vachishayiwa chitunha chake, vakauya vachiti, vaona chiratidzo chavatumwa vaiti mupenyu.

²⁴“Zvino vamwe vaiva nesu, vakaenda kubwiro, vakandozviwana sezvavakareva vakadzi; asi iye havana kumuona.”

²⁵Zvino iye akati kwavari, “Imi vokusafunga, mune mwoyo inononoka kutenda zvose zvakarehwa navaporofita!

²⁶“Kristu akanga asingafaniri kutambudzika saizvozvo, agopinda mukubwinya kwake here?”

²⁷Ipapo akatanga kuna Mosesi navaporofita vose, akavadudzira zvakanyorwa pamusoro pake muMagwaro ose.

²⁸Zvino vakaswedera kumusha kwavakanga vachienda; iye akaita sooda kupfuura.

²⁹Vakamugombedzera, vachiti, “Garai nesu, nokuti ava madekwana, zuva ravira.” Ipapo akapinda kundogara navo.

³⁰Zvino akati agara navo pakudya, akatora chingwa, akachiropafadza, akachimedura, ndokuvapa.

³¹Ipapo meso avo akasvinudzwa, vakamuziva; akanyangarika kwavari.

³²Vakataurirana, vachiti, “Ko mwoyo yedu yakanga isingapisi mukati medu, achitaura nesu munzira, nokutizarurira Magwaro here?”

³³Vakasimuka nenguva iyo, vakadzokera Jerusaremu, vakawana vane gumi nomumwe navaiva navo vakaungana.

³⁴Ivo vakati, “Ishe amuka zvirokwazvo; aonekwa naSimoni.”

³⁵Vakarondedzera zvakaitika munzira, uye kuti akazikanwa navo sei pakumedura chingwa.

³⁶Vakati vachataura izvozvo, akamira pakati pavo amene, akati kwavari, “Rugare ngaruve nemi!”

³⁷Asi vakavhunduka, vakatya kwazvo, vakati zvimwe vaona mweya.

³⁸Akati kwavari, “Munotambudzika neiko? Mifungo inomukireiko mumwoyo yenyu?

³⁹Tarirai zvanza zvangu netsoka dzangu, kuti ndini ndimene. Ndibatei, muone, nokuti mweya hauna nyama namapfupa, sezvamunondiona ndinazvo ini.”

⁴⁰Akati areva izvozvo, akavaratidza zvanza zvake netsoka dzake.

⁴¹Zvino vakati vachigere kutenda nokufara kwavo, vachashamiswa, akati kwavari, “Mune zvokudya pano here?”

⁴²Vakamupa nhindi yehove yakagochwa.

⁴³Akatora, akadya vachizviona.

⁴⁴Akati kwavari, “Ndiwo mashoko angu, andakakuudzai ndichiri nemi, kuti zvose zvakanyorwa pamusoro pangu pamurayiro waMosesi, napavaporofita, napaMapisarema, zvinofanira kuitika.”

⁴⁵Ipapo akadziura kuziva kwavo, kuti vanzwisise Magwaro.

⁴⁶Akati kwavari, “Ndizvo zvakanyorwa, kuti Kristu achatambudzika, agomuka kuvakafa nezuva retatu;

⁴⁷kuti marudzi ose aparidzirwe nezita rake kutendeuka nokukanganwirwa zvivi, vachitanga muJerusaremu.

⁴⁸Imi muri zvapupu zvezvinhu izvi.

⁴⁹Tarirai, ndinotuma pamusoro penyu chipikirwa chaBaba vangu; asi imi garai muguta, kusvikira mapiwa simba rinobva kumusoro.”

⁵⁰Zvino akavatungamirira kunze kweguta kusvikira pakatarisana neBhetania, ndokutambanudza maoko ake, akavaropafadza.

⁵¹Akati achavaropafadza, akaparadzana navo, akakwidzwa kudenga.

⁵²Ipapo vakamunamata, vakadzokera Jerusaremu vanomufaro mukuru.

⁵³Vakarambira mutemberi, vachirumbidza Mwari.