Read Shona Union Version 2002 RUKA 3 Bible Online

RUKA 3 - Shona Union Version 2002 bible

RUKA 3

¹Negore regumi namashanu rokutonga kwaTibherio Kesari, Pontio Pirato ari ishe weJudhea, Herodhi ari ishe weGariria, Firipi munun'una wake, ari ishe weIturea neTirakoniti, Risanio ari ishe weAbhirene,

²Anasi naKayafasi vari vapristi vakuru, shoko raMwari rakauya kuna Johani, mwanakomana waZekariya, murenje.

³Iye akaenda munyika yose yakapoteredza Jorodhani, akaparidza rubhabhatidzo rwokutendeuka kuzokanganwirwa zvivi;

⁴sezvazvakanyorwa mubhuku yamashoko aIsaya muporofita, zvichinzi, “Izwi roanodana murenje, ‘Gadzirai nzira yaIshe, Ruramisai migwagwa yake.

⁵Mipata yose ichafusirwa, Makomo ose nezvikomo zvose zvichaderedzwa; Zvakakombama zvicharuramiswa, Pasikaenzana pachaitwa nzira dzakaenzaniswa;

⁶Munhu wose ichaona ruponeso rwaMwari.’ ”

⁷Naizvozvo akati kuvazhinji vaiuya kuzobhabhatidzwa naye, “Imi vana venyoka, ndianiko akakunyeverai kuti mutize kutsamwa kunouya?

⁸Naizvozvo berekai zvibereko zvakafanira kutendeuka; musatanga kureva mumwoyo menyu, muchiti, Abhurahamu ndibaba vedu; nokuti ndinoti kwamuri, Mwari angamutsira Abhurahamu vana pamabwe awa.

⁹Zvino sanhu ratoiswa pamudzi wemiti; naizvozvo muti mumwe nomumwe usingabereki michero yakanaka, unotemwa, ukakandirwa mumoto.”

¹⁰Vanhu vazhinji vakamubvunza, vachiti, “Zvino todiniko?”

¹¹Akapindura, akati kwavari, “Anenguo mbiri ngaagovane noasina; noane zvokudya ngaaite saizvozvo.”

¹²Navateresi vakauyawo kuzobhabhatidzwa, vakati kwaari, “Mudzidzisi, todiniko?”

¹³Akati kwavari, “Musareva mari kupfuura pamakarayirwa napo.”

¹⁴Navarwiwo vakamubvunza, vachiti, “Nesuo todiniko?” Akati kwavari, “Musatorera munhu chinhu nesimba, kana kupomera munhu nhema; mutende nomubayiro wenyu.”

¹⁵Zvino vanhu vakati vagere vachatarisira, vose vachirangarira mumwoyo mavo pamusoro paJohani, kuti zvimwe ndiKristu,

¹⁶Johani akapindura, akati kuna vose, “Ini ndinokubhabhatidzai nemvura, asi uyo anouya, ane simba kupfuureni, wandisina kufanira kusunungura rukanda rweshangu dzake; iye achakubhabhatidzai noMweya Mutsvene nomoto.

¹⁷Rusero rwake ruri muruoko rwake; achanatsa buriro rake kwazvo; achaunganidzira zviyo mudura rake; asi hundi achaipisa nomoto usingadzimwi.”

¹⁸Akaparidzira vanhu Vhangeri, achivaraira namamwe mashoko mazhinji;

¹⁹asi ishe Herodhi, akati arairwa naye pamusoro paHerodhiasi, mukadzi womunun'una wake, nezvakaipa zvose zvaakanga aita iye Herodhi,

²⁰akawedzera pamusoro pezvose chinhu ichi, kuti akapfigira Johani mutorongo.

²¹Vanhu vose vakati vabhabhatidzwa, naiye Jesu abhabhatidzwawo, achinyengetera, denga rikazarurwa,

²²Mweya Mutsvene akaburukira pamusoro pake nomufananidzo wakaita sowenjiva, izwi rikabva kudenga, richiti, “Ndiwe Mwanakomana wangu, unodikanwa; ndinokufarira.”

²³Zvino iye Jesu akanga ana makore anenge makumi matatu, nguva yaakatanga kudzidzisa, ari, pakufunga kwavanhu, mwanakomana waJosefa, mwanakomana waHeri,

²⁴mwanakomana waMatati, mwanakomana waRevhi, mwanakomana waMereki, mwanakomana waJanai, mwanakomana waJosefa,

²⁵mwanakomana waMatatiasi, mwanakomana waAmosi, mwanakomana waNaumi, mwanakomana waEsiri, mwanakomana waNagai,

²⁶mwanakomana waMaati, mwanakomana waMatatiasi, mwanakomana waSimioni, mwanakomana waJoseki, mwanakomana waJodha,

²⁷mwanakomana waJoanani, mwanakomana waResa, mwanakomana waZerubhabheri, mwanakomana waSaratieri, mwanakomana waNeri,

²⁸mwanakomana waMereki, mwanakomana waAdhi, mwanakomana waKosamu, mwanakomana waErimadhamu, mwanakomana waEri,

²⁹mwanakomana waJese, mwanakomana waEriezeri, mwanakomana waJorimu, mwanakomana waMatati, mwanakomana waRevhi,

³⁰mwanakomana waSimioni, mwanakomana waJudha, mwanakomana waJosefa, mwanakomana waJonamu, mwanakomana waEriakimu,

³¹mwanakomana waMerea, mwanakomana waMena, mwanakomana waMatata, mwanakomana waNatamu, mwanakomana waDhavhidhi,

³²mwanakomana waJese, mwanakomana waJobhedhi, mwanakomana waBhoasi, mwanakomana waSara, mwanakomana waNasoni,

³³mwanakomana waAminadhabhi, mwanakomana waAdhimini, mwanakomana waArini, mwanakomana waEsiromi, mwanakomana waFaresi, mwanakomana waJudha,

³⁴mwanakomana waJakobho, mwanakomana waIsaka, mwanakomana waAbhurahamu, mwanakomana waTara, mwanakomana waNahori,

³⁵mwanakomana waSeruki, mwanakomana waRagau, mwanakomana waFareki, mwanakomana waEbheri, mwanakomana waSara,

³⁶mwanakomana waKainami, mwanakomana waArifakisadhi, mwanakomana waSemu, mwanakomana waNoa, mwanakomana waRameki,

³⁷mwanakomana waMatusara mwanakomana waEnoki, mwanakomana waJareti, mwanakomana waMahareeri, mwanakomana waKainami,

³⁸mwanakomana waEnosi, mwanakomana waSeti, mwanakomana waAdhamu, mwanakomana waMwari.