Read Shona Union Version 2002 DHUTERONOMI 20 Bible Online

DHUTERONOMI 20 - Shona Union Version 2002 bible

DHUTERONOMI 20

¹“Kana ukabuda kundorwa navavengi vako, ukaona mabhiza, nengoro navanhu vakawanda kupfuura iwe, usavatya; nokuti Jehovha Mwari wako unewe, iye wakakubudisa panyika yeIjipiti.

²Zvino kana moswedera pakurwa, mupristi anofanira kuuya kuzotaura navanhu,

³achiti kwavari, ‘Inzwai imi Isiraeri, nhasi moswedera pakurwa navavengi venyu, mwoyo yenyu ngairege kupera simba; regai kutya kana kudedera, kana kuvhunduka pamberi pavo;

⁴nokuti Jehovha Mwari wenyu ndiye unoenda nemi, kukurwirai pavavengi venyu, kukuponesai.’

⁵“Navakuru vanofanira kutaura navanhu, vachiti, ‘Pano munhu here wakavaka imba itsva, uchigere kutanga kuigara? Ngaadzokere kumba kwake; kuti arege kufa pakurwa, mumwe akatanga kuigara.

⁶Uye, pano munhu here wakarima munda wemizambiringa, uchigere kudya michero yawo? Ngaadzokere kumba kwake; kuti arege kufa pakurwa, mumwe akadya michero yawo.

⁷Uye, pano munhu here wakanyenga musikana, uchigere kumuwana? Ngaadzokere kumba kwake; kuti arege kufa pakurwa, mumwe akamuwana.’

⁸“Uye vakuru vanofanira kutaurawo kuvanhu, vachiti, ‘Pano munhu here unotya, unomwoyo unovhunduka? Ngaadzokere kumba kwake; kuti mwoyo yehama dzake irege kunyauka somwoyo wake.’

⁹Zvino kana vakuru vapedza kutaura navanhu, vanofanira kugadza vatariri vehondo vangatungamirira vanhu.

¹⁰“Kana woswedera pedyo neguta kuti urwe naro, unofanira kuriparidzira rugare.

¹¹Zvino kana ivo vachikupindura norugare, vakakuzarurira masuo avo, ipapo vanhu vose vanowanikwa mukati maro vanofanira kukuteerera mutero nokukubatira.

¹²Kana vasingadi kuyanana newe, asi kurwa newe, iwe unofanira kurikomba;

¹³kana Jehovha Mwari wako akariisa mumaoko ako, unofanira kuparadza varume vose varimo nomunondo unopinza;

¹⁴asi vakadzi, nepwere, nemombe, nezvose zviri muguta, zvose zvingapambwa, unofanira kuzvitapira izvo; iwe uchadya zvakapambwa kuvavengi vako, zvaunopiwa naJehovha Mwari wako.

¹⁵Unofanira kuita saizvozvo namaguta ose ari kure kwazvo newe, asati ari maguta endudzi idzi.

¹⁶“Asi kana ari maguta avanhu ava, vaunopiwa naJehovha Mwari wako, kuti vave nhaka yako, haufaniri kurega chinhu chimwe chinofema chiri chipenyu;

¹⁷asi unofanira kuvaparadza chose, ivo vaHeti, navaAmori, naKenani, navaPerezi, navaHivhi, navaJebhusi; sezvawakarairwa naJehovha Mwari wako;

¹⁸kuti varege kukudzidzisai kuita zvose zvavo zvinonyangadza, zvavakaitira vamwari vavo; imi mukatadzira Jehovha Mwari wenyu.

¹⁹“Kana ukakomba guta nguva refu, uchirwa naro, kuti urikunde, haufaniri kuparadza miti yaro, uchiitema nesanhu; ungaidya, haufaniri kuitema; nokuti muti womusango munhu here, kuti ukombwe newe?

²⁰Asi miti yaunoziva kuti miti isingadyiwi, unofanira kuiparadza uchiitema; guta rinorwa newe unofanira kurivakira mhanda kusvikira rakundwa.