Read Shona Union Version 2002 DHUTERONOMI 22 Bible Online

DHUTERONOMI 22 - Shona Union Version 2002 bible

DHUTERONOMI 22

¹“Haufaniri kuona nzombe yehama yako, kana gwai rake, zvichirashika, ukazvinyenyeredza; zvirokwazvo unofanira kuzvidzosera kuhama yako.

²Kana hama yako iri kure newe, zvimwe usingachizivi, unofanira kuenda nacho kumusha kwako, chigare kwauri kusvikira hama yako ichichitsvaka, ugochidzosera kwaari.

³Unofanira kuita saizvozvowo nembongoro yake; unofanira kuita saizvozvowo nenguo yake; unofanira kuita saizvozvowo nezvinhu zvose zvehama yako zvakarashika, chaakanga arashikirwa nacho, chikawanikwa newe; haufaniri kuzvinyenyeredza.

⁴“Haufaniri kuona mbongoro, kana nzombe, zvehama yako zvawira pasi panzira, ukazvinyenyeredza; unofanira kumubatsira zvirokwazvo kuzvimutsa.

⁵“Mukadzi haafaniri kufuka nguo dzomurume, nomurume haafaniri kufuka nguo dzomukadzi; nokuti ani naani unoita izvozvo unonyangadza Jehovha Mwari wako.

⁶“Kana ukawana dendere reshiri panzira, pamuti upi noupi, kana pasi, rina vana kana mazai, mai ichivhuvhatira vana kana mazai, haufaniri kutora mai navana;

⁷unofanira kurega mai, asi vana ungatora hako; kuti zvive zvakanaka newe, uwedzerwe mazuva ako.

⁸“Kana ukavaka imba itsva, unofanira kuisa rumhanda padenga rako, kuti urege kuuyisa mhosva yeropa pamusoro peimba yako, kana mumwe munhu akawapo.

⁹Haufaniri kudyara mbeu dzamarudzi maviri pamunda wako wemizambiringa, kuti zvibereko zvose zvirege kutsaurirwa nzvimbo tsvene, idzo mbeu dzawadyara, nezvibereko zvomunda wemizambiringa.

¹⁰“Usarima nenzombe nembongoro zvakasungwa pamwechete.

¹¹Usafuka nguo dzakarukwa nezvinhu zvakavhenganiswa, mvere pamwechete nomucheka.

¹²Unofanira kuzviitira masa pamiromo mina yenguo yako yaunozvifukidza nayo.

¹³“Kana munhu akawana mukadzi, akapinda kwaari, akazomuvenga,

¹⁴akamupomera zvinonyadza, nokutaura zvakaipa pamusoro pake, achiti, ‘Ndakawana mukadzi uyu, asi ndakati ndichiswedera kwaari, handina kuwana zviratidzo zvoumhandara hwake kwaari’;

¹⁵zvino baba vomusikana namai vake vanofanira kuenda nezviratidzo zvoumhandara hwake kuvakuru veguta pasuo;

¹⁶zvino baba vomusikana vanofanira kuti kuvakuru, ‘Ndakapa murume uyu mwanasikana wangu, kuti ave mukadzi wake, asi zvino womuvenga;

¹⁷tarirai, wamupomera zvinhu zvinonyadza,’ achiti, ‘Handina kuwana zviratidzo zvoumhandara kumwanasikana wako; asi hezvi zviratidzo zvoumhandara hwomwanasikana wangu.’ Zvino vanofanira kuwarira nguo pamberi pavakuru veguta.

¹⁸Ipapo vakuru veguta iro vanofanira kubata murume uyo, vamurove;

¹⁹nokumuripisa mashekeri esirivha ane zana, vagoapa baba vomusikana, nokuti wakataura zvakaipa pamusoro pomusikana waIsiraeri; zvino iye anofanira kuva mukadzi wake, haangamurashi mazuva ake ose.

²⁰“Asi kana riri shoko rezvokwadi, kuti zviratidzo zvoumhandara zvakashaikwa kumusikana,

²¹vanofanira kubudisira musikana kumukova weimba yababa vake, varume veguta rake vagomutaka namabwe, afe; nokuti wakaita sebenzi pakati paIsiraeri, pakupata kwake paimba yababa vake; saizvozvo anofanira kubvisa zvakaipa pakati pako.

²²“Kana murume akawanikwa achivata nomukadzi wakawanikwa nomurume wake, ivavo vose vanofanira kuurawa, murume wakavata nomukadzi naiye mukadziwo; saizvozvo iwe unofanira kubvisa zvakaipa pakati paIsiraeri.

²³“Kana kuno musikana, ichiri mhandara, wakanyengwa nomurume, mumwe murume akamuwana muguta, akavata naye;

²⁴ipapo munofanira kuvabudisa vose vari vaviri pasuo reguta, mugovataka namabwe, vafe, musikana nokuti haana kuridza mhere, ari muguta hake, uye murume, nokuti wanyadzisa mukadzi wowokwake; saizvozvo iwe unofanira kubvisa zvakaipa pakati pako.

²⁵“Asi kana murume akawana musikana uyo wakanyengwa ari kusango, murume akaita simba naye, akavata naye, iye murume wakavata naye anofanira kufa, iye oga;

²⁶asi musikana haufaniri kumuita chinhu; musikana haana kuita chivi chinofanirwa norufu; nokuti shoko iri rakafanana neromurume wakamukira wokwake akamuuraya;

²⁷nokuti wakamuwana kusango, musikana wakanyengwa akaridza mhere, asi kwakanga kusino munhu kumurwira.

²⁸“Kana murume akawana musikana, ichiri mhandara, ugere kunyengwa, akaita simba naye, akavata naye, vakaonekwa;

²⁹ipapo murume wakavata naye anofanira kupa baba vake mashekeri ana makumi mashanu esirivha, zvino iye unofanira kuva mukadzi wake, nokuti wamunyadzisa; haafaniri kuzomurasha paupenyu hwake hwose.

³⁰“Murume haafaniri kutora mukadzi wababa vake, haafaniri kufukura nhere yababa vake.