Read Shona Union Version 2002 DHUTERONOMI 27 Bible Online

DHUTERONOMI 27 - Shona Union Version 2002 bible

DHUTERONOMI 27

¹Zvino Mosesi navakuru vaIsiraeri vakaraira vanhu, vakati, chengetai mirairo yose yandinokurairai nhasi.

²Zvino nomusi wamunoyambuka Jorodhani muchipinda munyika yaunopiwa naJehovha Mwari wako, unofanira kuzvimisira mabwe makuru nokuachenesa nesuko;

³ugonyora pamusoro pawo mashoko ose omurayiro uyu, kana wayambuka; kuti upinde munyika yawakapiwa naJehovha Mwari wako, nyika inoyerera mukaka nouchi, sezvawakapikirwa naJehovha Mwari wamadzibaba ako.

⁴Zvino kana mayambuka Jorodhani, munofanira kumisa mabwe iwayo, sezvandinokurairai nhasi, pagomo reEbhari, nokuachenesa nesuko.

⁵Ipapo unofanira kuvakirapo Jehovha Mwari wako atari, atari yamabwe; haufaniri kusimudzira nhumbi yedare pamusoro payo.

⁶Unofanira kuvaka atari yaJehovha Mwari wako namabwe asina kuvezwa, ugobayirapo Jehovha Mwari wako zvipiriso zvinopiswa.

⁷Unofanira kubayirapo zvipiriso zvokuyananisa, nokudyapo; unofanira kufara pamberi paJehovha Mwari wako.

⁸Unofanira kunyora pamusoro pamabwe awo mashoko ose omurayiro uyu, zvionekwe kwazvo.

⁹Zvino Mosesi navapristi navaRevhi vakataura navaIsiraeri vose, vakati, “Iwe Isiraeri, nyarara, unzwe; nhasi waitwa rudzi rwaJehovha Mwari wako.

¹⁰Naizvozvo unofanira kuteerera izwi raJehovha Mwari wako, uite mirairo yake nezvaakatema, zvandinokuraira nhasi.”

¹¹Mosesi akaraira vanhu nomusi uyo, akati,

¹²“Ndivo vanofanira kundomira pamusoro pegomo reGerizimi, kuti varopafadze vanhu, kana mayambuka Jorodhani: Simeoni, naRevhi, naJudha, naIsakari; naJosefa, naBhenjamini.

¹³Uye ndivo vanofanira kundomira pagomo reEbhari, kuti vavatuke: Rubheni, naGadhi, naAsheri, naZebhuruni, naDhani, naNafutari.”

¹⁴Zvino vaRevhi vanofanira kupindura, vachiti kuvarume vose vaIsiraeri nezwi guru,

¹⁵“Ngaatukwe munhu unoita mufananidzo wakavezwa, kana wakaumbwa, unonyangadza Jehovha, riri basa ramaoko emhizha, achiumisa pakavanda. “Zvino vanhu vose vanofanira kupindura, vachiti, Ameni.

¹⁶“Ngaatukwe munhu unozvidza baba vake kana mai vake. “Zvino vanhu vose vanofanira kuti, Ameni.

¹⁷“Ngaatukwe munhu unoshandura muganhu wehama yake. “Zvino vanhu vose vanofanira kuti, Ameni.

¹⁸“Ngaatukwe munhu unotsausa bofu panzira. “Zvino vanhu vose vanofanira kuti, Ameni.

¹⁹“Ngaatukwe munhu unotongera “Mutorwa nenherera nechirikadzi zvisakarurama. “Zvino vanhu vose vanofanira kuti, Ameni.

²⁰“Ngaatukwe munhu unovata nomukadzi wababa vake, nokuti wafukura nhere yababa vake. “Zvino vanhu vose vanofanira kuti, Ameni.

²¹“Ngaatukwe munhu unovata nemhuka ipi neipi. “Zvino vanhu vose vanofanira kuti, Ameni.

²²“Ngaatukwe munhu unovata nehanzvadzi yake, kana nomwanasikana wababa vake, kana nomwanasikana wamai vake. “Zvino vanhu vose vanofanira kuti, Ameni.

²³“Ngaatukwe munhu unovata namai vomukadzi wake. “Zvino vanhu vose vanofanira kuti, Ameni.

²⁴“Ngaatukwe munhu unorova wokwake pakavanda. “Zvino vanhu vose vanofanira kuti, Ameni.

²⁵“Ngaatukwe munhu unogamuchira fufuro kuti auraye mumwe usine mhosva. “Zvino vanhu vose vanofanira kuti, Ameni.

²⁶“Ngaatukwe munhu asingasimbisi mashoko omurayiro uyu, nokuaita. “Zvino vanhu vose vanofanira kuti, Ameni.