Read Shona Union Version 2002 DHUTERONOMI 29 Bible Online

DHUTERONOMI 29 - Shona Union Version 2002 bible

DHUTERONOMI 29

¹Ndiwo mashoko esungano yakarairwa Mosesi naJehovha, kuti aiite navana vaIsiraeri panyika yaMoabhu, kunze kwesungano yaakaita navo paHorebhu.

²Zvino Mosesi akadana vaIsiraeri vose, akati kwavari, “Makaona zvose zvakaitwa naJehovha pamberi penyu panyika yeIjipiti kuna Farao navaranda vake vose, nokunyika yake yose;

³miidzo iya mikuru yamakaona nameso enyu, nezviratidzo, nezvishamiso zviya zvikuru.

⁴Asi Jehovha haana kukupai mwoyo inoziva, nameso anoona, nenzeve dzinonzwa kusvikira nhasi.

⁵Ndakakutungamirirai murenje makore ana makumi mana; nguo dzenyu hadzina kukusakarirai, neshangu dzako hadzina kusakara patsoka dzako.

⁶Hamuna kudya chingwa, kana kunwa waini nezvinobata; kuti muzive kuti ndini Jehovha Mwari wenyu.

⁷Zvino makati muchisvika panzvimbo ino, Sihoni, mambo weHeshibhoni, naOgi, mambo weBhashani, vakauya kuzorwa nesu, tikavakunda;

⁸tikatora nyika yavo, tikaipa vaRubheni navaGadhi nehafu yorudzi rwaManase, kuti ive nhaka yavo.

⁹Naizvozvo chengetai mashoko esungano iyi, muiite, kuti mufare pazvose zvamunoita.

¹⁰“Mumire nhasi mose pamberi paJehovha Mwari, vatungamiriri venyu, namarudzi enyu, navakuru venyu, navatariri venyu, ivo varume vose vaIsiraeri,

¹¹nepwere dzenyu, navakadzi venyu, navatorwa vako vari pakati pemisasa yako, kubva pavatemi vehuni dzako kusvikira kuvacheri vemvura yako;

¹²kuti upinde pasungano yaJehovha Mwari wako, napakupika kwake kwaanokupikira nhasi iye Jehovha Mwari wako;

¹³kuti akusimbise nhasi uve rudzi rwake, iye ave Mwari wako, sezvaakataura kwauri, uye sezvaakapikira madzibaba ako, Abhurahamu, naIsaka, naJakobho.

¹⁴Handiiti sungano iyi nokupika uku nemi moga;

¹⁵asi naivo vamire pano nesu nhasi pamberi paJehovha Mwari wedu, uye navasipo nesu nhasi;

¹⁶“(Nokuti munoziva kugara kwedu panyika yeIjipiti, nokufamba kwedu pakati pendudzi, dzamakapfuura pakati padzo;

¹⁷mukaona zvinonyangadza zvavo, nezvifananidzo zvavo zvamatanda nezvamabwe, nesirivha nendarama, zvakanga zviri pakati pavo;)

¹⁸kuti pakati penyu parege kuva nomurume, kana mukadzi, kana mhuri, kana rudzi, vano mwoyo unotsauka kuna Jehovha Mwari wedu nhasi, kuti vandoshumira vamwari vendudzi idzo; kuti pakati penyu parege kuva nomudzi unobereka zvinouraya negavakava;

¹⁹zvino kana achinzwa mashoko okupika uku, azvirumbidze pamwoyo wake, achiti, ‘Ndichava norugare, kunyange ndichifamba hangu noukukutu hwomwoyo wangu, kuti zvakanyorova nezvakaoma zviparadzwe pamwechete’;

²⁰Jehovha haangamukanganwiri, asi nenguva iyo kutsamwa kwaJehovha neshungu dzake zvichapfungairira munhu uyo, nokutukwa kwose kwakanyorwa mubhuku iyi kuchamunamatira; Jehovha uchadzima zita rake pasi pokudenga.

²¹Jehovha uchamutsaurira zvakaipa zvose pakati pamarudzi ose aIsiraeri, kuti atukwe nokutuka kwose kwesungano yakanyorwa mubhuku iyi yomurayiro.

²²Zvino rudzi runotevera, ivo vana venyu vachamuka pashure penyu, navatorwa vanobva kunyika iri kure, kana vachiona madambudziko enyika iyo, namatenda aicharwadziswa nawo naJehovha;

²³uye kuti nyika yose isuferi, nomunyu, nokutsva, kuti haidyarwi, haimedzi, uye kuti uswa hahumerimo, sapakuparadzwa kweSodhoma neGomora, neAdhama neZebhoimu, aya maguta akaparadzwa naJehovha pakutsamwa kwake neshungu dzake;

²⁴uye ndudzi dzose dzichati, ‘Jehovha wakaitira nyika iyo saizvozvo neiko? Kupisa kwokutsamwa uku kukuru kunoti kudiniko?’

²⁵Zvino vanhu vachati, ‘Nokuti vakasiya sungano yaJehovha Mwari wamadzibaba avo, yaakaita navo nguva yaakavabudisa panyika yeIjipiti;

²⁶vakashumira vamwe vamwari, vakanamata kwavari, vamwari vavakanga vasingazivi, vavasina kupiwa naye’;

²⁷naizvozvo kutsamwa kwaJehovha kwakamukira nyika iyi, kuti aituke nokutuka kwose kwakanyorwa mubhuku iyi.

²⁸Jehovha akavadzipura panyika yavo nokutsamwa kwake neshungu dzake nehasha dzake huru, akavarashira kune imwe nyika, sezvazvakaita nhasi.

²⁹“Zvinhu zvakavanzwa ndezvaJehovha Mwari wedu; asi zvinhu zvakaratidzwa pachena ndezvedu, isu navana vedu nokusingaperi, kuti tiite mashoko ose omurayiro uyu.