Read Shona Union Version 2002 DHUTERONOMI 30 Bible Online

DHUTERONOMI 30 - Shona Union Version 2002 bible

DHUTERONOMI 30

¹“Zvino kana zvinhu izvi zvose zvichikuwira, iko kuropafadzwa nokutukwa, kwandakaisa pamberi pako, ukazvirangarira pakati pendudzi dzose, pawakadzingirwa naJehovha Mwari wako,

²ukadzokera kuna Jehovha Mwari wako, ukateerera izwi rake, sezvandinokuraira zvose nhasi, iwe navana vako, nomwoyo wako wose, nomweya wako wose;

³ipapo Jehovha Mwari wako uchashandura kutapwa kwako, nokukunzwira tsitsi, nokukuunganidzazve pandudzi dzose, kwaakakurashanyira kwadziri, iye Jehovha Mwari wako.

⁴Kunyange vamwe venyu vakanga vadzingirwa kumagumisiro okudenga, Jehovha Mwari wako uchakuunganidzapo, uchandokutorapo;

⁵Jehovha Mwari wako uchakuuyisa munyika, yakanga iri yamadzibaba ako, kuti ive yako; uchakuitira zvakanaka, nokukuwanza kupfuura madzibaba ako.

⁶Jehovha Mwari wako uchadzingisa mwoyo wako, nemwoyo yavana vako, kuti ude Jehovha Mwari wako nomwoyo wako wose, nomweya wako wose, kuti urarame.

⁷Jehovha Mwari wako uchatuka vavengi vako nokutuka uku kwose, navose vanokuvenga vanokutambudza.

⁸Zvino iwe uchadzoka nokuteerera izwi raJehovha, nokuita mirairo yake yose, yandinokuraira nhasi.

⁹Jehovha Mwari wako uchawanza zvinobatwa namaoko ako, nezvibereko zvomuviri wako, nezvibereko zvemombe dzako, nezvibereko zvevhu rako, kuti zvifare; nokuti Jehovha uchakufarirazve zvakanaka, sezvaakafarira madzibaba ako;

¹⁰kana uchiteerera izwi raJehovha Mwari wako, nokuchengeta mirairo yake nezvaakatema, zvakanyorwa mubhuku iyi yomurayiro; kana ukadzokera kuna Jehovha Mwari wako nomwoyo wako wose nomweya wako wose.

¹¹“Nokuti murayiro uyu wandinokuraira nhasi haungakuremeri zvikuru, uye hauzi kure.

¹²Hauzi kudenga, kuti uti, ‘Ndianiko uchatikwirira kudenga, kundotitorera iwo, nokutinzwisa iwo, kuti tiuite?’

¹³Hauzi mhiri kwegungwa, kuti uti, ‘Ndianiko uchatiyambukira mhiri kwegungwa, andotitorera iwo, nokutinzwisa iwo, tiuite?’

¹⁴Asi shoko riri pedyo kwazvo newe, mumuromo mako, nomumwoyo mako, kuti uriite.

¹⁵“Tarira ndaisa pamberi pako nhasi upenyu nezvakanaka, norufu nezvakaipa.

¹⁶Zvandinokuraira nhasi ndizvo, kuti ude Jehovha Mwari wako, nokufamba munzira dzake, nokuchengeta mirairo yake nezvaakatema nezvaakatonga, kuti urarame, uwande, uye kuti Jehovha Mwari wako akuropafadze kunyika kwaunoenda kwairi, kuti ive yako.

¹⁷Asi kana mwoyo wako ukatsauka, ukaramba kuteerera, ukatsauswa kunamata vamwe vamwari nokuvashumira,

¹⁸ndinokuudzai nhasi, kuti muchaparadzwa zvirokwazvo; hamungavi namazuva mazhinji kunyika kwaunoyambukira nhasi, kuti ive yako.

¹⁹Ndinodana kudenga napasi kukupupurirai nhasi, kuti ndaisa pamberi pako upenyu norufu, kuropafadzwa nokutukwa; naizvozvo tsaura upenyu, kuti urarame, iwe navana vako;

²⁰kuti ude Jehovha Mwari wako, nokuteerera izwi rake, nokumunamatira; nokuti ndihwo upenyu hwako, nokuwanzwa kwamazuva ako; kuti ugare munyika yakapikira Jehovha madzibaba ako, Abhurahamu naIsaka naJakobho, kuti uchavapa iyo.”