Read Shona Union Version 2002 DHUTERONOMI 33 Bible Online

DHUTERONOMI 33 - Shona Union Version 2002 bible

DHUTERONOMI 33

¹Zvino ndiko kuropafadza kwaMosesi, munhu waMwari, kwaakaropafadza nako vana vaIsiraeri, asati afa.

²Akati, “Jehovha wakabva Sinai, Akavabudira achibva Seiri; Akapenya ari pagomo reParani, Akauya achibva pazviuru zvine gumi zvavatsvene; Paruoko rwake rworudyi pakanga pano murayiro womoto kwavari.

³Zvirokwazvo unoda ndudzi; Vatsvene vake vose vari paruoko rwenyu; Vakagara pasi patsoka dzenyu; Mumwe nomumwe uchagamuchira mashoko enyu.

⁴Mosesi wakatiraira murayiro, Ndiyo nhaka yeungano yaJakobho.

⁵Wakanga ari mambo paJeshuruni, Pakuungana kwavakuru vavanhu, Marudzi ose avaIsiraeri pamwechete.

⁶Rubheni ngaararame, arege kufa, Asi vanhu vake ngavave vashoma hako.

⁷Kuropafadzwa kwaJudha ndiko”: Akati, “Inzwai Jehovha izwi raJudha, Mumusvitse kuvanhu vake; Wakavarwira namaoko ake; Imi muchamubatsira kurwa navavengi vake.”

⁸Pamusoro paRevhi wakati, “Tumimu yenyu neUrimi yenyu ndezva unodikanwa nemi, Iye wamakaidza paMasa, Wamakarwa naye pamvura yeMeribha”;

⁹Iye wakati pamusoro pababa vake namai vake, “Handina kumuona; Nehama dzake haana kudzirangarira, Kana kuziva vana vake, Nokuti vakaita shoko renyu, Nokuchengeta sungano yenyu.

¹⁰Vachadzidzisa Jakobho zvamakatonga, NaIsiraeri murayiro wenyu; Vachaisa zvinonhuwira pamberi penyu, Nezvipiriso zvinopiswa zvakakwana paatari dzenyu.

¹¹Jehovha, ropafadzai simba rake, Gamuchirai basa ramaoko ake; Gurai zviuno zvavanomumukira, Nezvavanomuvenga, kuti varege kusimukazve.”

¹²Pamusoro paBhenjamini wakati, “Mudikanwa waJehovha uchagara kwaari akachengetwa; Unomufukidza zuva rose, Unogara pakati pamafudzi ake.”

¹³Pamusoro paJosefa wakati, “Nyika yake ngairopafadzwe naJehovha; Ipiwe zvinhu zvakanakisa zvokudenga, nedova, Nemvura inogara makadzika;

¹⁴Nezvinhu zvakanakisa zvezvibereko zvezuva, Nezvinhu zvakanakisa zvinomedzwa nomwedzi;

¹⁵Nezvinhu zvakanaka zvamakomo ekare, Nezvinhu zvakanakisa zvezvikomo zvingaperi,

¹⁶Nezvinhu zvakanakisa zvenyika nokuzara kwayo, Nomwoyo wakanaka waiye wakanga agere mugwenzi; Kuropafadzwa ngakuuye pamusoro waJosefa, Napamusoro pomusoro waiye wakatsaurwa pakati pehama dzake.

¹⁷Mwana wemhongora wemombe dzake, ndihwo umambo hwake; Nyanga dzake inyanga dzenyati; Nadzo uchabaya ndudzi dzose dzavo, namagumisiro enyika; Ndivo vane zviuru zvamazana zvine gumi zvaEfuremu, Ndivo vane zviuru zvaManase.”

¹⁸Pamusoro paZebhuruni wakati, “Chifara, Zebhuruni, pakubuda kwako, Newe Isakari, pamatende ako.

¹⁹Vachadanira vanhu kumakomo; Ipapo vachauya nezvibayiro zvokururama; Nokuti vachanwa pfuma zhinji yamakungwa, Nepfuma zhinji yakavanzwa nejecha.”

²⁰Pamusoro paGadhi wakati, “Unokurisa Gadhi ngaaropafadzwe; Iye unogara seshumbakadzi, Unobvambura ruoko, kunyange nomusoro.

²¹Wakazvitsaurira mugove wokutanga; Nokuti ndipapo pakachengetwa mugove womubati; Wakauya navakuru vavanhu; Wakaita zvakarurama zvaJehovha, Nezvaakatonga pamusoro paIsiraeri.”

²²Pamusoro paDhani wakati, “Dhani ndiye mwana weshumba, Unokwakuka achibva Bhashani.”

²³Pamusoro paNafutari wakati, “Iwe Nafutari, wakaguta nyasha, Uzere nokuropafadzwa naJehovha; Tora mavirazuva nenyasi zvive zvako.”

²⁴Pamusoro paAsheri wakati, “Asheri ngaaropafadzwe apiwe vana; Ngaadikanwe nehama dzake, Ngaanyike rutsoka rwake mumafuta.

²⁵Zvipfigiso zvako zvichava zvamatare nendarira; Nesimba rako richaenzana namazuva ako.

²⁶Iwe Jeshuruni, hakuna wakafanana naMwari, Iye unotasva denga kuti akubatsire, Napamusoro pamakore noukuru hwake.

²⁷Mwari usingaperi ndihwo ugaro hwako, Pasi pako kuna maoko asingaperi; Iye wakadzinga vavengi pamberi pako”, Akati, “Paradzai.

²⁸Isiraeri unogara akachengetwa, Tsime raJakobho riri roga, Panyika yezviyo newaini; Denga rake rose rinonisa dova.

²⁹Isiraeri, iwe wakaropafadzwa; Ndiani wakatodzana newe, rudzi rwakachengetwa naJehovha? Ndiye nhoo inokubatsira, Nomunondo waunokudzwa nawo! Vavengi vako vachazviisa pasi pako, Newe uchatsika panzvimbo dzavo dzakakwirira.”