Read Shona Union Version 2002 DHUTERONOMI 6 Bible Online

DHUTERONOMI 6 - Shona Union Version 2002 bible

DHUTERONOMI 6

¹“Zvino ndiwo mirairo, nezvakatemwa, nezvakatongwa, zvandakarairwa naJehovha Mwari wenyu kuti ndikudzidzisei, kuti muzviite kunyika kwamunoenda kuti ive yenyu;

²kuti utye Jehovha Mwari wako, uchengete zvose zvaakatema nemirairo yake, yandinokuraira, iwe, nomwanakomana wako, nomwanakomana womwanakomana wako, mazuva ose oupenyu hwako, kuti mazuva ako ave mazhinji.

³Naizvozvo chinzwa Isiraeri, uchenjere kuti uzviite; kuti zvive zvakanaka newe, muwande kwazvo, sezvamakapikirwa naJehovha Mwari wamadzibaba ako, panyika inoyerera mukaka nouchi.

⁴“Chinzwa Isiraeri, Jehovha Mwari wedu ndiJehovha mumwe chete.

⁵Ude Jehovha Mwari wako nomwoyo wako wose, nomweya wako wose, nesimba rako rose.

⁶Zvino mashoko awa andinokuraira nhasi, anofanira kuva mumwoyo mako;

⁷unofanira kushingaira kuadzidzisa vana vako, nokuataura kana ugere mumba mako, kana uchifamba munzira, kana uchivata pasi, kana uchimuka.

⁸Unofanira kuasungira paruoko rwako, chive chiratidzo; uye anofanira kuva rundanyara pakati pameso ako.

⁹Unofanira kuanyora pamagwatidziro emikova yeimba yako, napamasuo ako.

¹⁰“Zvino kana Jehovha Mwari wako achinge akupinza munyika, yaakapikira madzibaba ako, Abhurahamu, naIsaka, naJakobho, kuti uchakupa iyo, namaguta makuru akanaka, ausina kuvaka iwe,

¹¹nedzimba dzizere nezvinhu zvose zvakanaka, dzausina kuzadza iwe, namakangwa akacherwa, ausina kuchera iwe, neminda yemidzambiringa nemiorivhi, yausina kusima iwe; iwe ukadya ukaguta,

¹²zvino chenjera kuti urege kukanganwa Jehovha, wakakubudisa panyika yeIjipiti, paimba youranda.

¹³Unofanira kutya Jehovha Mwari wako, nokumushumira, nokupika nezita rake.

¹⁴Regai kutevera vamwe vamwari, vamwari vendudzi dzinokupoteredzai;

¹⁵nokuti Jehovha Mwari wako, ari pakati pako, ndiMwari ane godo; kuti Jehovha Mwari wako arege kukutsamwira, akuparadze panyika pose.

¹⁶“Musaidza Jehovha Mwari wenyu, sezvamakamuidza paMasa.

¹⁷Munofanira kushingaira kuchengeta mirairo yaJehovha Mwari wenyu, nezvipupuriro zvake, nezvaakatema, zvaakakuraira.

¹⁸Uye unofanira kuita zvakarurama nezvakanaka pamberi paJehovha, kuti zvive zvakanaka newe, upinde munyika yakanaka ive yako, iyo yakapikirwa madzibaba ako naJehovha,

¹⁹kuti iye uchadzinga vavengi vako vose pamberi pako, sezvakataurwa naJehovha.

²⁰“Zvino kana mwanakomana wako akakubvunza pashure, achiti, ‘Ko izvi zvipupuriro, nezvakatemwa, nezvakatongwa, zvamakarairwa naJehovha Mwari wedu, zvinodiniko?’

²¹Unofanira kuti kumwanakomana wako, ‘Isu takanga tiri varanda vaFarao, Jehovha akatibudisa paIjipiti nechanza chine simba;

²²Jehovha akaita zviratidzo nezvinoshamisa kwazvo, zvakaipa, paIjipiti, nokuna Farao, nokuimba yake yose, tichizviona;

²³akatibudisapo, kuti atipinze pano, atipe nyika yaakapikira madzibaba edu.

²⁴Jehovha akaraira kuti tiite izvi zvose zvaakatema, titye Jehovha Mwari wedu, kuti tiitirwe zvakanaka nguva dzose, atichengete tive vapenyu, sezvatakaita nhasi.

²⁵Zvichava zvakarurama kwatiri, kana tichichenjerera kuti tiite murayiro wose pamberi paJehovha Mwari wedu, sezvatakarairwa naye.’