Read Shona Union Version 2002 JOHANI 1 Bible Online

JOHANI 1 - Shona Union Version 2002 bible

JOHANI 1

¹Pakutanga Izwi rakanga riripo, Izwi rakanga riri kuna Mwari, Izwi rakanga riri Mwari.

²Irori pakutanga rakanga riri kuna Mwari.

³Zvinhu zvose zvakaitwa naye; kunze kwake hakuna kuitwa kunyange chinhu chimwe chakaitwa.

⁴Upenyu hwaiva maari; upenyu hwaiva chiedza chavanhu.

⁵Chiedza chinovhenekera murima; asi rima harina kugona kuchikunda.

⁶Kwakanga kune munhu akatumwa naMwari, zita rake rainzi Johani.

⁷Iye akauya kuzopupura, kuti apupurire chiedza, kuti vose vatende naye.

⁸Uyu akanga asati ari icho chiedza, asi akatumwa kuti apupurire chiedza.

⁹Ichi chaiva chiedza chechokwadi, chinovhenekera munhu mumwe nomumwe, pakusvika kwake panyika.

¹⁰Akanga ari panyika, asi nyika haina kumuziva.

¹¹Akauya kunezvake, asi vanhu vake havana kumugamuchira.

¹²Asi vose vakamugamuchira, akavapa simba kuti vave vana vaMwari, ivavo vanotenda kuzita rake;

¹³avo vasina kuberekwa neropa, kana nokuda kwenyama, kana nokuda kwomurume, asi naMwari.

¹⁴Izwi rakazova munhu, rikagara pakati pedu, tikaona kubwinya kwake, kubwinya sokwowakaberekwa mumwechete wababa, azere nenyasha nechokwadi.

¹⁵Johani akamupupurira, akadanidzira, achiti, “Ndiye wandaireva, ndichiti, ‘Uyo, anouya shure kwangu, akavapo mberi kwangu; nokuti akanditangira.’ ”

¹⁶Nokuti pakuzara kwake isu tose takapiwa nyasha pamusoro penyasha.

¹⁷Nokuti murayiro wakapiwa naMosesi, nyasha nechokwadi zvakauya naJesu Kristu.

¹⁸Hakuna munhu akatongoona Mwari; mwanakomana akabereka ari mumwe oga, ari pachifuva chababa, ndiye akamuzivisa isu.

¹⁹Uku ndiko kupupura kwaJohani, musi vaJudha vakatumira kwaari vapristi navaRevhi, vachibva Jerusaremu, kundomubvunza, kuti, “Iwe ndiwe aniko?”

²⁰Akatenda pachena, haana kuramba, akatenda pachena, achiti, “Handisi Kristu.”

²¹Vakamubvunza, vachiti, “Asi kudiniko? Ndiwe Eria here?” Akati, “Handisi iye.” “Ko uri uya muporofita here?” Akapindura, akati, “Kwete.”

²²Zvino vakati kwaari, “Ndiwe aniko? Tigondopindura vakatituma. Unozviti aniko?”

²³Akati, “Ndini izwi roanodana murenje, richiti, ‘Ruramisai nzira yaIshe; sezvakarehwa nomuporofita Isaya.’ ”

²⁴Ava vakanga vatumwa vaiva vavaFarisi.

²⁵Vakamubvunza, vakati kwaari, “Kana usiri Kristu, kana Eria, kana muporofita uya, unogobhabhatidzireiko?”

²⁶Johani akapindura, akati, “Ini ndinobhabhatidza nemvura; asi pakati penyu pamire mumwe wamusingazivi;

²⁷ndiye anouya shure kwangu, wandisina kufanira kuti ndisunungure rukanda rweshangu yake.”

²⁸Izvozvi zvakaitwa paBhetania, mhiri kwaJorodhani, kwaibhabhatidza Johani.

²⁹Ava mangwana akaona Jesu achiuya kwaari, akati, “Tarirai, Hwayana yaMwari, inobvisa zvivi zvenyika.

³⁰Ndiye wandaireva, ndichiti, ‘Shure kwangu kunouya mumwe, akavapo mberi kwangu, nokuti akanditangira.’

³¹Neni ndakanga ndisingamuzivi; asi ndizvo zvandakauyira, ndichibhabhatidza nemvura, kuti aoneswe kuvaIsiraeri.”

³²Johani akapupura, akati, “Ndakaona Mweya achiburuka kudenga senjiva akagara pamusoro pake.

³³Neni ndakanga ndisingamuzivi; asi akandituma kubhabhatidza nemvura, ndiye akati kwandiri, ‘Uyo waunoona Mweya achiburuka pamusoro pake, akagara pamusoro pake, ndiye anobhabhatidza noMweya Mutsvene.’

³⁴“Ini ndikaona, ndikapupura kuti uyu ndiye Mwanakomana waMwari.”

³⁵Ava mangwanazve Johani akanga amire navadzidzi vake vaviri;

³⁶akatarisisa Jesu achifamba, akati, “Tarirai, Hwayana yaMwari!”

³⁷Ivavo vadzidzi vaviri, vakamunzwa achitaura, vakatevera Jesu.

³⁸Jesu akatendeuka akavaona vachitevera, akati kwavari, “Munotsvakeiko?” Vakati kwaari, “Rabhi” (ndokuti, “Mudzidzisi, kana zvichishandurwa,”) munogarepiko?

³⁹Akati kwavari, “Uyai, muone.” Vakaenda, vakandoona kwaaigara, vakagara naye zuva iro; yakanga iri nguva inenge yegumi.

⁴⁰Mumwe waivavo vaviri, vakanga vanzwa Johani, vakamutevera, waiva Andireya, munun'una waSimoni Petirosi.

⁴¹Iye akatanga kuwana Simoni, mukoma wake, akati kwaari, “Tawana Mesiasi” (ndokuti, “Kristu, kana zvichishandurwa.”)

⁴²Akamuisa kuna Jesu. Jesu akamutarira, akati, “Ndiwe Simoni, mwanakomana waJona, uchanzi Kefasi zvinoshandurwa, dombo.”

⁴³Ava mangwana akada kuenda Gariria, akawana Firipi; Jesu akati kwaari, “Nditevere.”

⁴⁴Firipi akanga ari weBhetisaidha, guta raAndireya naPetirosi.

⁴⁵Firipi akawana Nataneri, akati kwaari, “Tamuwana iye, akanyorwa zvake naMosesi mumurayiro navaporofita, iye Jesu weNazareta, mwanakomana waJosefa.”

⁴⁶Nataneri akati kwaari, “Kune chinhu chakanaka chingabva Nazareta here?” Firipi akati kwaari, “Uya, uone.”

⁴⁷Jesu akaona Nataneri achiuya kwaari, akamuti, “Tarirai, muIsiraeri wechokwadi, asina kunyengera maari.”

⁴⁸Nataneri akati kwaari, “Mandizivirepiko?” Jesu akapindura, akati kwaari, “Firipi asati akudana, uri munyasi momuonde, ndakakuona.”

⁴⁹Nataneri akamupindura, akati, “Rabhi, ndimi Mwanakomana waMwari, ndimi Ishe waIsiraeri.”

⁵⁰Jesu akapindura, akati kwaari, “Unotenda iwe, nokuti ndakati kwauri, ndakakuona munyasi momuonde here? Uchazoona zvikuru kuna izvozvi.”

⁵¹Akati kwaari, “Zvirokwazvo, zvirokwazvo, ndinoti kwauri, uchaona kudenga kwazarurwa, navatumwa vaMwari vachikwira, nokuburukira pamusoro poMwanakomana womunhu.”