Read Shona Union Version 2002 JOHANI 10 Bible Online

JOHANI 10 - Shona Union Version 2002 bible

JOHANI 10

¹Zvirokwazvo, zvirokwazvo, ndinoti kwamuri, “Asingapindi napamusuo mudanga ramakwai, asi anokwira napamwe, imbavha negororo.

²Asi anopinda nopamusuo, ndiye mufudzi wamakwai.

³Murindi womusuo anomuzarurira iye, makwai anonzwa izwi rake, anodana makwai ake namazita awo, nokuaperekedzera kunze.

⁴Kana abudisa makwai ake ose, anoatungamirira; makwai anomutevera, nokuti anoziva izwi rake.

⁵Asi mweni haangatongomuteveri, asi anomutiza; nokuti haazivi izwi ravaeni.”

⁶Jesu akareva mufananidzo uyu kwavari, asi havana kunzwisisa, kuti zvaakavataurira ndezvei.

⁷Zvino Jesu akati kwavarizve, “Zvirokwazvo, zvirokwazvo, ndinoti kwamuri, ndini musuo wamakwai.

⁸Vose vakanditangira kuuya, imbavha namakororo, asi makwai haana kuvanzwa.

⁹“Ndini musuo kana munhu apinda neni, achaponeswa, achapinda, achabuda, achawana mafuro.

¹⁰Mbavha inongouya, kuti ibe nokuuraya nokuparadza. Ini ndakauya, kuti ave noupenyu, uye ave nohwakawanda.

¹¹“Ndini mufudzi akanaka; mufudzi akanaka anorasira makwai ake upenyu hwake.

¹²Muranda, asati ari mufudzi wamakwai, makwai asati ari ake, anoti kana achiona bere richiuya, anosiya makwai, ndokutiza; bere rinoabvuta, nokuaparadza;

¹³anotiza, zvaari muranda; haana hanya namakwai.

¹⁴Ndini mufudzi akanaka, ndinoziva makwai angu, namakwai angu anondiziva ini,

¹⁵Baba sezvavanondiziva, neni ndichiziva baba; ndinorashira makwai angu hupenyu hwangu.

¹⁶Namamwe makwai ndinawo, asati ari edanga rino. Naiwo ndinofanira kuuya nawowo, achanzwa inzwi rangu; richava boka rimwe, nomufudzi mumwe.

¹⁷“Saka baba vanondida, nokuti ndinorasha upenyu hwangu, ndigohutorazve.

¹⁸Hakuna munhu anganditorera upenyu; asi ndinohurasha ndimene. Ndine simba rokuhurasha, uye ndine simba rokuhutorazve. Uyu murayiro ndakaupiwa nababa vangu.”

¹⁹Ipapo kupesana kukamukazve pakati pavaJudha pamusoro pamashoko iwayo.

²⁰Vazhinji vavo vakati, “Ane mweya wakaipa, anopenga; munomuteerereiko?”

²¹Vamwe vakati, “Mashoko awa haati ari omunhu akabatwa nomweya wakaipa; ko mweya wakaipa ungagona kusvinudza meso amapofu here?”

²²Yaiva nguva yomutambo wokuvandudzwa kwetemberi paJerusaremu; chaiva chando.

²³Jesu akafamba mutemberi pabiravira raSoromoni.

²⁴Zvino vaJudha vakamukomba, vakati kwaari, “Uchatinetsa kusvikira ripiko? Kana uri Kristu iwe, tiudze pachena.”

²⁵Jesu akavapindura, akati, “Ndakakuudzai, mukasatenda. Mabasa andinoita nezita rababa, ndiwo anondipupurireni.

²⁶Asi imi hamutendi, nokuti hamusi vamakwai angu.

²⁷Makwai angu anonzwa izwi rangu; neni ndinoaziva, uye anonditevera.

²⁸Ndinoapa upenyu husingaperi; haangafi nokusingaperi, uye hakuna munhu angaabvuta muruoko rwangu.

²⁹Zvandakapiwa nababa vangu zvikuru kuna zvose; hakuna munhu ungaabvuta muruoko rwababa vangu.

³⁰“Ini nababa tiri vamwe.”

³¹Zvino vaJudha vakanongazve mabwe, kuti vamutake.

³²Jesu akavapindura, akati, “Ndakakuratidzai mabasa mazhinji akanaka akabva kuna baba; munonditakira basa ripiko kuna iwaya?”

³³VaJudha vakamupindura, vakati, “Hatikutakiri basa rakanaka; asi nokuti wamhura Mwari; uye, nokuti iwe munhu, unozviita Mwari.”

³⁴Jesu akavapindura, akati, “Hazvina kunyorwa here mumurayiro wenyu, zvichinzi, ndakati, ‘Muri vamwari?’

³⁵“Zvino kana akavaidza vamwari, ivo shoko raMwari rakasvika kwavari, (Rugwaro harungaputswi);

³⁶imi moti seiko kuna iye akaitwa mutsvene nababa, nokutumwa panyika, unomhura Mwari, zvandakati, ndiri Mwanakomana waMwari?

³⁷Kana ndisingaiti mabasa ababa vangu, regai kunditenda ini;

³⁸asi kana ndichiaita, kunyange musinganditendi ini, tendai mabasa, mugoziva nokunzwisisa, kuti baba vari mandiri, neni ndiri muna baba.”

³⁹Zvino vakatsvakazve kumubata, asi iye akapukunyuka pamaoko avo.

⁴⁰Zvino akaendazve mhiri kwaJorodhani, paya paibhabhatidza Johani pakutanga; akagarapo.

⁴¹Vazhinji vakauya kwaari, vakati, “Johani haana kuita chiratidzo, asi zvose zvakareva Johani pamusoro pouyu ndezvechokwadi.”

⁴²Vazhinji vakatenda kwaari ipapo.