Read Shona Union Version 2002 JOHANI 11 Bible Online

JOHANI 11 - Shona Union Version 2002 bible

JOHANI 11

¹Mumwe munhu wakanga achirwara, ainzi Razaro weBhetania, musha waMaria nomukoma wake Marita.

²Ndiye Maria uya, akazodza Ishe namafuta, akapukuta tsoka dzake nevhudzi rake; hanzvadzi yake Razaro, akanga achirwara.

³Zvino hanzvadzi dzake dzakatuma shoko kwaari, dzichiti, “Ishe, tarirai uyo anodikanwa nemi anorwara.”

⁴Jesu akati azvinzwa, akati, “Kurwara uku hakusi kwokufa, asi kuti Mwari akudzwe, noMwanakomana waMwari akudzwewo nazvo.”

⁵Jesu akanga achida Marita, nomun'un'una wake, naRazaro.

⁶Zvino akati anzwa kuti anorwara, akambogara mazuva maviri paakanga ari.

⁷Shure kwaizvozvo akati kuvadzidzi vake, “Hendeizve Judhea.”

⁸Vadzidzi vakati kwaari, “Rabhi, vaJudha vakanga vachikutsvakai ikozvino, kuti vakutakei namabwe; zvino moendazve ikoko here?”

⁹Jesu akapindura, akati, “Nguva hadzisi gumi nembiri pazuva here? Kana munhu achifamba masikati, haagumburwi, nokuti anoona chiedza chenyika ino.

¹⁰Asi kana munhu achifamba usiku, anogumburwa, nokuti hakuna chiedza maari.”

¹¹Ndizvozvo zvaakareva, akazoti kwavari, “Razaro, hama yedu, avata; asi ndinoenda, kuti ndimumutse pahope.”

¹²Zvino vadzidzi vakati kwaari, “Ishe, kana achivata, achanaya.”

¹³Jesu akanga areva kufa kwake, asi ivo vakanga vachiti anoreva kuvata hope.

¹⁴Ipapo Jesu akavaudza pachena, “Razaro afa.

¹⁵Ndinofara nokuda kwenyu, kuti ndakanga ndisipo, kuti mugotenda; asi zvino hendei kwaari.”

¹⁶Ipapo Tomasi, ainzi Dhidhimo, akati kuna vamwe vadzidzi, “Hendei nesuo, kuti tindofa naye.”

¹⁷Zvino Jesu akati achisvika, akamuwana atova mubwiro mazuva mana.

¹⁸Bhetania rakanga riri pedyo neJerusaremu, masitadhia anenge gumi namashanu;

¹⁹vazhinji vavaJudha vakanga vauya kuna Marita naMaria, kuti vavabate ruoko pamusoro pehanzvadzi yavo.

²⁰Zvino Marita akati achinzwa kuti Jesu wouya, akaenda kundomuchingamidza; asi Maria akagara mumba.

²¹Marita akati kuna Jesu, “Ishe, dai maiva pano, hanzvadzi yangu ingadai isina kufa.

²²Kunyange zvino ndinoziva, kuti zvose zvamunokumbira kuna Mwari, Mwari achakupai.”

²³Jesu akati kwaari, “Hanzvadzi yako ichamukazve.”

²⁴Marita akati kwaari, “Ndinoziva kuti achamukazve pakumuka nezuva rokupedzisira.”

²⁵Jesu akati kwaari, “Ndini kumuka noupenyu; anotenda kwandiri, kunyange akafa, achararama.

²⁶“Mumwe nomumwe ari mupenyu, anotenda kwandiri, haangatongofi. Unotenda izvozvo here?”

²⁷Akati kwaari, “Hongu, Ishe, ndakatenda kuti ndimi Kristu, Mwanakomana waMwari, uyo ainzi anouya panyika.”

²⁸Akati areva izvovo, akandodana Maria, munun'una wake, akati kwaari vari voga, “Mudzidzisi asvika, anokudana.”

²⁹Iye akati achizvinzwa, akakurumidza kusimuka, akaenda kwaari.

³⁰(Zvino Jesu akanga asati asvika pamusha, asi akanga achiri paya paakachingamidzwa naMarita.)

³¹Zvino vaJudha, vakanga vari mumba naye vachimubata ruoko, vakati vachiona Maria achikurumidza kusimuka achibuda, vakamutevera, vachiti unoenda kubwiro kundochemako.

³²Zvino Maria akati achisvika kuna Jesu, achimuona, akawira pasi patsoka dzake, akati kwaari; “Ishe, dai maiva pano, hanzvadzi yangu ingadai isina kufa.”

³³Zvino Jesu akati achimuona achichema, navaJudha vakanga vauya naye, vachichemawo, akafa neshungu mumweya, akatambudzika,

³⁴akati, “Mamuisepiko?” Vakati kwaari, “Ishe, uyai muone.”

³⁵Jesu akachema misodzi.

³⁶Ipapo vaJudha vakati, “Tarirai, aimuda sei!”

³⁷Asi vamwe vavo vakati, “Uyu akasvinudza meso ebofu, haasaigona kudzivisa kuti uyu munhu arege kufa here?”

³⁸Ipapo Jesu akafazve neshungu mukati make, akasvika pabwiro. Iro raiva bako, nebwe rakanga riri pamusoro paro.

³⁹Jesu akati, “Bvisai ibwe!” Marita, hanzvadzi yoakafa, akati kwaari, “Ishe, otonhuwa zvino, nokuti ava namazuva mana okufa kwake.”

⁴⁰Jesu akati kwaari, “Handina kukuudza here, kuti kana ukatenda, uchaona kubwinya kwaMwari?”

⁴¹Ipapo vakabvisa ibwe. Zvino Jesu akatarira kudenga, akati, “Baba, ndinovongai, nokuti mandinzwa.

⁴²Asi ndakanga ndichiziva, kuti munosindinzwa nguva dzose; asi ndakazvireva nokuda kwavazhinji vakandikomba, kuti vatende kuti makandituma.”

⁴³Akati areva izvozvo, akadanidzira nezwi guru, akati, “Razaro, buda!”

⁴⁴Akanga afa akabuda, akapombwa makumbo namaoko nemicheka yomubwiro, nechiso chake chakapombwa nomucheka. Jesu akati kwavari, “Musunungurei, aende.”

⁴⁵Naizvozvo vazhinji vavaJudha, vakanga vauya kuna Maria, vakati vaona zvaaita, vakatenda kwaari.

⁴⁶Asi vamwe vavo vakaenda kuvaFarisi, vakandovaudza zvakanga zvaitwa naJesu.

⁴⁷Naizvozvo vapristi vakuru navaFarisi vakaunganidza makurukota, vakati, “Todiniko? Nokuti uyu anoita zviratidzo zvizhinji.

⁴⁸Kana tikamurega achidaro, vanhu vose vachatenda kwaari; navaRoma vachauya vakatitorera nzvimbo yedu norudzi rwedu.”

⁴⁹Zvino mumwe wavo, Kaifasi, akanga ari mupristi mukuru gore iro, akati kwavari, “Hamuzivi chinhu, imi,

⁵⁰uye hamurangariri kuti zviri nani kwamuri, kuti munhu mumwe afire vanhu, rudzi rwose rurege kufa.”

⁵¹Haana kureva izvozvo pachake, asi zvaakanga ari mupristi mukuru gore iro, akaporofita kuti Jesu aifanira kufira rudzi;

⁵²rusati ruri rudzi rwoga, asi kuti aunganidze pamwechete vana vaMwari vakapararira.

⁵³Zvino kubva pazuva iro vakarangana, kuti vamuuraye.

⁵⁴Naizvozvo Jesu haana kuzofamba pachena pakati pavaJudha, asi akabvapo, akaenda kunyika iri pedyo nerenje, kuguta rainzi Efuremu; akagarako navadzidzi vake.

⁵⁵Zvino Pasika yavaJudha yakanga yava pedyo, vanhu vazhinji venyika iyo vakakwira Jerusaremu, Pasika isati yasvika, kuti vazvinatse.

⁵⁶Zvino vakatsvaka Jesu, vakataurirana vamire mutemberi, vachiti, “Munoti kudiniko? Munoti haangauyi kumutambo here?”

⁵⁷Zvino vapristi vakuru navaFarisi vakanga varayira, kuti, ani naani kana achiziva kwaari, avazivise, kuti vandomubata.