Read Shona Union Version 2002 JOHANI 12 Bible Online

JOHANI 12 - Shona Union Version 2002 bible

JOHANI 12

¹Zvino mazuva matanhatu Pasika ichigere kusvika, Jesu akasvika Bhetania, paiva naRazaro, wakadeya kumutswa naJesu kuvakafa.

²Vakamuitirapo chirariro; Marita akavashandira; naRazaro akanga ari mumwe wavakanga vagere naye pakudya.

³Zvino Maria akatora paundi yamafuta enaridho, anomutengo mukuru, akazodza tsoka dzaJesu, akapukuta tsoka dzake nevhudzi rake; imba ikazadzwa nokunhuwira kwamafuta.

⁴Ipapo mumwe wavadzidzi vake, Judhasi Isikarioti akanga achazomupandukira, akati,

⁵“Mafuta awa akaregereiko kutengeswa namadhenari mazana matatu, akapiwa varombo?”

⁶Asi haana kureva izvozvo kuri kuti akarangarira varombo, asi nokuti aiva mbavha; aigara nechikwama, achisiba zvaiiswamo.

⁷Asi Jesu akati, “Muregei, azvichengetere zuva rokuvigwa kwangu.

⁸Nokuti varombo munavo nguva dzose; asi ini hamuneni nguva dzose.”

⁹Zvino vanhu vazhinji-zhinji vokuvaJudha vakanzwa kuti aripo; vakauya, asi havana kuuya nokuda kwaJesu bedzi, asi kuti vaonewo Razaro, waakanga amutsa kuvakafa.

¹⁰Asi vapristi vakuru vakarangana kuti vauraye naRazarowo,

¹¹nokuti nokuda kwake vaJudha vazhinji vakanga vachibva kwavari, vachitenda kuna Jesu.

¹²Zvino ava mangwana vanhu vazhinji-zhinji, vakanga vauya kumutambo, vakati vanzwa kuti Jesu auya Jerusaremu,

¹³vakatora mashizha emichindwi, vakabuda kundomuchingamidza, vakadanidzira, vachiti, “Hosana! Ngaarumbidzwe anouya muzita raIshe, Mambo wavaIsiraeri.”

¹⁴Jesu akati awana mwana wembongoro, akagara pamusoro payo, sezvazvakanyorwa, zvichinzi,

¹⁵“Usatya, mukunda weZioni; tarira Mambo wako anouya, agere pamusoro pemhuru yembongoro.”

¹⁶Vadzidzi vake havana kunzwisisa izvozvi pakutanga; asi Jesu akati akudzwa, vakazoyeuka, kuti izvozvo zvakanga zvanyorwa pamusoro pake, uye kuti vakanga vamuitira izvozvo.

¹⁷Zvino vanhu vazhinji vaiva naye pakudana kwake Razaro kuti abve mubwiro, nokumumutsa kuvakafa, vakapupura.

¹⁸Saka vazhinji vakamuchingamidzawo, nokuti vakanga vanzwa, kuti akaita chiratidzo ichocho.

¹⁹Ipapo vaFarisi vakataurirana, vachiti, “Munoona henyu kuti hamugoni chinhu; tarirai, nyika yose yamutevera.”

²⁰Zvino kwaiva navamwe vaGiriki pakati pavakanga vakwira kumutambo kundonamatako;

²¹ivo vakauya kuna Firipi weBhetisaidha reGariria, vakakumbira kwaari, vachiti, “Ishe, tinoda kuona Jesu.”

²²Firipi akaenda, akandoudza Andireya; Andireya akaenda naFiripi, vakandoudza Jesu.

²³Jesu akavapindura, akati, “Nguva yasvika, kuti Mwanakomana womunhu akudzwe.

²⁴Zvirokwazvo, zvirokwazvo, ndinoti kwamuri, kana tsanga yezviyo ikasawira muvhu, ikafa, ichagara iri yoga; asi kana ikafa, inobereka zvibereko zvizhinji.

²⁵Anoda upenyu hwake, acharasikirwa nahwo; noanovenga upenyu hwake panyika ino, achahuchengeta kuupenyu husingaperi.

²⁶Kana munhu achindishumira, ngaanditevere; napandinenge ndiri, nomuranda wangu achavapowo. Kana munhu achindishumira, baba vachamukudza.

²⁷“Zvino mweya wangu unomanikidzwa; ndichatiiko? Baba ndiponesei panguva ino. Asi ndizvo zvandauyira panguva ino.

²⁸Baba, kudzai zita renyu.” Ipapo izwi rakauya, richibva kudenga, richiti, “Ndatorikudza, ndicharikudzazve.”

²⁹Zvino vanhu vazhinji, vakanga vamirepo, vachizvinzwa, vakati, “Kwatinhira.” Vamwe vakati, “Mutumwa ataura naye.”

³⁰Jesu akapindura, akati, “Izwi iri harina kuuya nokuda kwangu asi nokuda kwenyu.

³¹Zvino kutongwa kwenyika ino kwavapo, zvino muchinda wenyika ino achadzingwa.

³²Neni, kana ndasimudzwa panyika, ndichakwevera vose kwandiri.”

³³Wakareva izvozvi, achiratidza kufa, kwaaizofa nako.

³⁴Zvino vanhu vazhinji vakamupindura, vakati, “Isu takanzwa pamurayiro kuti Kristu uchagara aokusingaperi; zvino moreva seiko imi, kuti Mwanakomana womunhu anofanira kusimudzwa? Uyu Mwanakomana womunhu ndianiko?”

³⁵Ipapo Jesu akati kwavari, “Chiedza chichipo pakati penyu chinguva chiduku. Fambai muchine chiedza, kuti murege kukundwa nerima; anofamba murima haazivi kwaanoenda.

³⁶“Muchine chiedza, tendai kuchiedza, mugoitwa vana vechiedza.” Jesu akareva izvozvi, akabva, akazvivanza kwavari.

³⁷Zvino kunyange akanga aita zviratidzo zvizhinji zvakadaro pamberi pavo, havana kutenda kwaari;

³⁸kuti shoko romuporofita Isaya riitike, raakareva, achiti, “Ishe, ndianiko akatenda chavakanzwa kwatiri? Noruoko rwaIshe rwakaratidzwa kuna aniko?”

³⁹Saka vakanga vasingagoni kutenda, nokuti Isaya akatizve,

⁴⁰“Akapofumadza meso avo, akaomesa mwoyo yavo; Kuti varege kuona nameso avo, nokunzwisisa nemwoyo yavo, Vadzoke Ndivaporese.”

⁴¹Isaya akareva izvozvi, nokuti akaona kubwinya kwake; akamureva iye.

⁴²Asi kunyange zvakadaro vazhinji vavabati vakatenda kwaari; asi vakanga vasingamureururi nokuda kwavaFarisi, kuti varege kubudiswa musinagoge;

⁴³nokuti vakanga vachida kukudzwa navanhu kupfuura kukudzwa naMwari.

⁴⁴Zvino Jesu akadana, akati, “Anotenda kwandiri, haatendi kwandiri, asi kune akandituma.

⁴⁵Anondiona, anoona akandituma.

⁴⁶Ini ndakauya munyika, ndiri chiedza, kuti ani naani anotenda kwandiri arege kugara murima.

⁴⁷Kana munhu achinzwa mashoko angu, akasaachengeta, handimutongi ini, nokuti handina kuuya kuzotonga nyika, asi kuti ndiponese nyika.

⁴⁸Anondiramba, asingagamuchiri mashoko angu, anomumwe, anomutonga; shoko randakareva ndiro richamutonga nezuva rokupedzisira.

⁴⁹“Nokuti handina kureva pachangu, asi baba, vakandituma, ndivo vakandipa murayiro, zvandichareva nezvandichataura.

⁵⁰Ndinoziva kuti murayiro wavo ndihwo upenyu husingaperi; naizvozvi zvandinotaura, ndinotaura sezvandakaudzwa nababa.”