Read Shona Union Version 2002 JOHANI 13 Bible Online

JOHANI 13 - Shona Union Version 2002 bible

JOHANI 13

¹Zvino mutambo wePasika usati wasvika, Jesu akaziva kuti nguva yake yasvika, kuti abve munyika ino, aende kuna baba, zvaakanga aida vanhu vake vaiva munyika, akavada kusvikira pakuguma.

²Zvino vakati voravira, Dhiabhori atoisa mumwoyo maJudhasi Isikarioti, mwanakomana waSimoni, kuti amupandukire;

³Jesu achiziva kuti baba vakamupa zvinhu zvose mumaoko ake, uye kuti akabva kuna Mwari, uye kuti anoenda kuna Mwari;

⁴akasimuka pakurayira, akabvisa nguo dzake, akatora mucheka, akazvisunga chiuno.

⁵Zvino akadira mvura mumudziyo, akatanga kushambidza tsoka dzavadzidzi vake, akadzipukuta nomucheka, waakanga akazvisunga nawo.

⁶Akasvika kuna Simoni Petirosi, iye akati kwaari, “Ishe, imi moshambidza tsoka dzangu kanhi?”

⁷Jesu akapindura, akati kwaari, “Chandinoita hauchizivi zvino; asi uchazvinzwisisa pashure.”

⁸Petirosi akati kwaari, “Hamungatongoshambidzi tsoka dzangu nokusingaperi.” Jesu akamupindura, akati, “Kana ndisingakushambidzi, hauna mugove neni.”

⁹Simoni Petirosi akati kwaari, “Dzirege kuva tsoka dzangu dzoga, asi maoko angu nomusoro wanguo.”

¹⁰Jesu akati kwaari, “Akashambidzwa muviri wose, anofanira woga kuti ashambidzwe tsoka dzake, zvino wanaka kwazvo; imi makanaka, asi hamusi mose.”

¹¹Nokuti akanga achiziva uyo aizomupandukira saka akati, “Hamuna kunaka mose.”

¹²Zvino akati ashambidza tsoka dzavo, akatora nguo dzake, akagarazve, akati kwavari, “Munoziva zvandakakuitirai here?

¹³Munondiidza Mudzidzisi, uye Ishe; munoreva zvakanaka, nokuti ndini iye.

¹⁴Zvino kana ini, Ishe noMudzidzisi, ndakashambidza tsoka dzenyu, nemiwo munofanira kushambidzana tsoka dzenyu.

¹⁵“Ndakakuratidzai makwara kuti muite imi sezvandakakuitirai ini.

¹⁶Zvirokwazvo, zvirokwazvo, ndinoti kwamuri, Muranda haasi mukuru kuna ishe wake, uye wakatumwa mukuru kune akamutuma.

¹⁷Kana muchizviziva izvi, makaropafadzwa kana muchizviita.

¹⁸“Handirevi imi mose; ini ndinoziva avo vandakasanangura; asi kuti Rugwaro ruitike, runoti, ‘Anodya chingwa changu, akandisimudzira chitsitsinho chake.’

¹⁹Kubva zvino ndinokuudzai zvisati zvaitika, kuti kana zvichiitwa, mugotenda kuti ndini.

²⁰Zvirokwazvo, zvirokwazvo, ndinoti kwamuri, anogamuchira wandinotuma, unogamuchireni, noanondigamuchira ini, anogamuchira akandituma.”

²¹Zvino Jesu akati areva kudaro, akamanikidzwa mumweya, akapupura, akati, “Zvirokwazvo, zvirokwazvo, ndinoti kwamuri, mumwe wenyu achandipandukira.”

²²Vadzidzi vakatarirana, vasingazivi kuti wareva ani.

²³Zvino mumwe wavadzidzi vake akanga akasendamira pachipfuva chaJesu, aidikanwa naJesu.

²⁴Simoni Petirosi akamuninira, akati kwaari, “Tiudzei kuti ndianiko waanoreva.”

²⁵Iye akavata pachipfuva chaJesu, akati kwaari, “Ishe, ndianiko?”

²⁶Ipapo Jesu akapindura, akati, “Ndiye wandichapa chimedu, kana ndachiseva.” Zvino akati aseva chimedu, akachitora, akapa Judhasi, mwanakomana waSimoni Isikarioti.

²⁷Iye akati agamuchira chimedu, Satani akapinda maari. Ipapo Jesu akati kwaari, “Zvaunoita, ita uchikurumidza.”

²⁸Asi kwakanga kusina mumwe kuna vakanga vagere naye pakudya, akaziva kuti akareverei izvozvi kwaari.

²⁹Vamwe vakanga vachiti, Judhasi zvaaigara ane chikwama, kuti Jesu akati kwaari, “Tenga zvatinoda pamutambo; kana kuti ape varombo chinhu.”

³⁰Iye akati agamuchira chimedu, akabuda pakarepo; hwakanga huri usiku.

³¹Zvino akati abuda, Jesu akati, “Zvino Mwanakomana akudzwa maari;

³²kana Mwari akudzwa maari, Mwari achamukudza iye maari, uchamukudza pakarepo.

³³Vana vaduku, ndichiri nemi chinguva chiduku; muchanditsvaka, asi sezvandakareva kuvaJudha, ndichiti, ‘Pandinoenda, imi hamungauyipo, saizvozvo zvino ndinoreva kwamuriwo.’

³⁴“Ndinokupai murayiro mutsva, wokuti mudane; sezvandakakudai imi, nemi mudanewo saizvozvo.

³⁵Vose vachaziva naizvozvi kuti muri vadzidzi vangu, kana muno rudo pakati penyu.”

³⁶Simoni Petirosi akati kwaari, “Ishe, munoendepiko?” Jesu akapindura, akati, “Kwandinoenda, haunganditeveri zvino; asi uchanditevera pashure.”

³⁷Petirosi akati kwaari, “Ishe, handingakutevereyi zvino neiko? Ndichakufirai ini.”

³⁸Jesu akapindura, akati, “Uchandifira here? Zvirokwazvo, zvirokwazvo, ndinoti kwauri, Jongwe haringariri, usati wandiramba katatu.