Read Shona Union Version 2002 JOHANI 15 Bible Online

JOHANI 15 - Shona Union Version 2002 bible

JOHANI 15

¹“Ndini mudzambiringa wechokwadi, baba vangu murimi.

²Davi rimwe nerimwe riri mandiri, risingabereki michero, vanoribvisa; rimwe nerimwe, rinobereka michero, vanorinatsa, kuti riwedzere michero.

³Imi matonatswa neshoko randakareva kwamuri.

⁴Garai mandiri, neni mamuri. Sedavi risingagoni kubereka michero roga, kana risingagari mumudzambiringa; saizvozvo nemiwo, kana musingagari mandiri.

⁵“Ini ndiri mudzambiringa, imi muri matavi. Anogara mandiri, neni maari, ndiye anobereka michero yakawanda; nokuti kunze kwangu hamugoni kuita chinhu.

⁶Kana munhu asingagari mandiri, anoraswa kunze sedavi, ndokuoma; anounganidzwa, ndokukandirwa mumoto, atsve.

⁷Kana muchigara mandiri, namashoko angu achigara mamuri, kumbirai zvamunoda, muchazviitirwa.

⁸Baba vangu vanokudzwa naizvozvi, kuti mubereke michero yakawanda; uye muchava vadzidzi vangu.

⁹Baba sezvavakandida, neni ndakakudai; garai murudo rwangu.

¹⁰Kana muchichengeta mirayiro yangu, muchagara murudo rwangu, seni ndaichengeta mirayiro yababa vangu, ndichigara murudo rwavo.

¹¹“Zvinhu izvozvi ndakazvitaura kwamuri, kuti mufaro wangu ugare mamuri, nomufaro wenyu uzadzike.

¹²Uyu ndiwo murayiro wangu, kuti mudane, seni ndakakudai imi.

¹³Hakuna munhu ano rudo rukuru kune urwu, kuti munhu arasire hama dzake upenyu hwake.

¹⁴Imi muri hama dzangu, kana muchiita zvandinokurayirai ini.

¹⁵Handichakuidzii varanda; nokuti muranda haazivi zvinoitwa naishe wake; asi ndinokuidzai hama; nokuti zvose zvandakanzwa kuna baba vangu, ndakakuzivisai izvo.

¹⁶“Imi hamuna kundisanangura, asi ini ndakakusanangurai imi, ndikakuisai kuti muende mubereke michero, uye kuti michero yenyu igare; kuti chinhu chipi nechipi chamunenge muchikumbira kuna baba muzita rangu, vakupei icho.

¹⁷“Ndizvozvi zvandinokurayirai, kuti mudane.

¹⁸“Kana nyika ichikuvengai, muzive kuti yakandivenga ini, isati yakuvengai imi.

¹⁹Kana maiva venyika, nyika yaidana vayo; zvino zvamusati muri venyika, asi ini ndakakusanangurai panyika, saka nyika inokuvengai.

²⁰Rangarirai shoko randakareva kwamuri, ndichiti, ‘Muranda haasi mukuru kuna ishe wake.’ Kana vakanditambudza ini, vachakutambudzai nemiwo; kana vakachengeta shoko rangu, vachachengeta nerenyuwo.

²¹Asi izvi zvose vachakuitirai nokuda kwezita rangu, nokuti havazivi akandituma.

²²Dai ndisina kuuya, ndikataura navo, vangadai vasina zvivi; asi zvino havana pembedzo yezvivi zvavo.

²³Anondivenga, anovenga nababa vanguo.

²⁴“Dai ndisina kuita pakati pavo mabasa asina kumboitwa nomumwe munhu, vangadai vasina zvivi; asi zvino vakaona, nokundivenga ini nababa vangu.

²⁵“Asi zvakaitwa, kuti shoko rakanyorwa mumurayiro wavo, riitike, rinoti, ‘Vakandivenga ndisina mhosva.’

²⁶“Kana Munyaradzi auya, wandichatuma kwamuri, achibva kuna baba, iye Mweya wechokwadi, anobuda kuna baba, achandipupurira.

²⁷Nemiwo pupurai, nokuti maiva neni kubva pakutanga.