Read Shona Union Version 2002 JOHANI 17 Bible Online

JOHANI 17 - Shona Union Version 2002 bible

JOHANI 17

¹Jesu akataura izvozvi, akatarira kudenga, akati, “Baba, nguva yasvika; kudzai Mwanakomana wenyu, kuti Mwanakomana akukudzei imi,

²sezvamakamupa simba pamusoro pevanhu vose, kuti vose vamakamupa, avape upenyu husingaperi.

³Upenyu husingaperi ndihwo, kuti vakuzivei imi, Mwari ari oga wechokwadi, naJesu Kristu, wamakatuma.

⁴Ndakakukudzai panyika, ndapedza basa ramakandipa kuti ndiriite.

⁵Zvino imi baba, mundikudzei pamberi penyu nokukudzwa kwandaiva nako kwamuri, nyika isati yavapo.

⁶“Ndakaratidza vanhu, vamakandipa panyika, zita renyu. Vakanga vari venyu, mukandipa ivo, vakachengeta shoko renyu.

⁷Zvino vanoziva kuti zvose-zvose, zvamakandipa, zvinobva kwamuri.

⁸Nokuti ndakavapa mashoko amakandipa, vakaagamuchira, vakaziva zvirokwazvo kuti ndakabva kwamuri, vakatenda kuti ndakatumwa nemi.

⁹“Ndinovanyengeterera ivo; handinyengetereri nyika, asi ivo vamakandipa, nokuti ndivo venyu.

¹⁰Zvose zvangu ndezvenyu, nezvenyu ndezvangu; ndakudzwa mavari.

¹¹Ini handichiri munyika, asi ivo vari munyika; ini ndinouya kwamuri. Baba vatsvene, muvachengete muzita renyu, ramakandipa, kuti vave vamwe, sesu.

¹²Ndichiri navo, ini ndaivachengeta muzita renyu, ramakandipa; hapana mumwe wavo wakarasika, asi mwanakomana wokuraswa, kuti Rugwaro ruitike.

¹³Asi zvino ndouya kwamuri; ndinotaura izvi panyika, kuti vave nomufaro wangu, wakazadzika mavari.

¹⁴“Ini ndakavapa shoko renyu nyika ikavavenga, nokuti havasi venyika, seni ndisi wenyika.

¹⁵Handinyengeteri kuti muvabvise panyika, asi kuti muvachengete panowakaipa.

¹⁶Havasi venyika, seni ndisi wenyika.

¹⁷“Muvaite vatsvene muchokwadi; shoko renyu ichokwadi.

¹⁸Sezvamakandituma panyika imi, saizvozvo neni ndakavatuma panyika.

¹⁹Ndinozviita mutsvene nokuda kwavo, kuti naivo vaitwe vatsvene muchokwadi.

²⁰“Handinyengetereri ava bedzi, asi naivo vanotendawo kwandiri neshoko ravo,

²¹kuti vose vave vamwe; semi baba muri mandiri, neni mamuri; kuti naivo vave matiri, kuti nyika itende kuti makandituma.

²²“Neni ndakavapa kubwinya kwamakandipa; kuti vave vamwe, sesu tiri vamwe;

²³ini mavari, nemi mandiri, vakwaniswe kuva vamwe; kuti nyika izive kuti makandituma, uye kuti makavada sezvamakandida ini.

²⁴“Baba ndinoda kuti avo vamakandipa, vavewo neni apo pandiri, kuti vaone kubwinya kwangu, kwamakandipa, nokuti makandida nyika isati yavambwa.

²⁵“Baba vakarurama, nyika haina kukuzivai; asi ini ndakakuzivai, naivava vakaziva kuti makandituma.

²⁶Ndakavazivisa zita renyu, uye ndicharizivisa, kuti rudo, rwamakandida narwo, ruve mavari, neni ndive mavari.”