Read Shona Union Version 2002 JOHANI 4 Bible Online

JOHANI 4 - Shona Union Version 2002 bible

JOHANI 4

¹Zvino Ishe akati aziva kuti vaFarisi vakanga vanzwa kuti Jesu akaita nokubhabhatidza vadzidzi kupfuura Johani,

²kunyange Jesu akanga asingabhabhatidzi amene, asi vadzidzi vake,

⁵Zvino akasvika paguta reSamaria, rainzi Sikari, pedyo nemunda wakanga wapa Jakobho mwanakomana wake Josefa.

⁶Tsime raJakobho rakanga riripo. Zvino Jesu aneta nokufamba, ndokungogara zvake patsime. Yaiva nguva inenge yechitanhatu.

⁷Zvino mumwe mukadzi weSamaria akasvikapo kuzochera mvura. Jesu akati kwaari, “Ndipeiwo, ndinwe.”

⁸Nokuti vadzidzi vake vakanga vaenda muguta kundotenga zvokudya.

⁹Ipapo mukadzi muSamaria akati kwaari, “Ko iwe muJudha, unokumbira seiko kwandiri kunwa, ini mukadzi muSamaria?” (Nokuti vaJudha havafambidzani navaSamaria).

¹⁰Jesu akapindura, akati kwaari, “Dai waiziva chipo chaMwari, uye kuti ndiani anoti kwauri, ndipeiwo ndinwe, ungadai waikumbira kwaari, akakupa mvura mhenyu.”

¹¹Mukadzi akati kwaari, “Ishe, hamuna chamungachera nacho, tsime rakadzika, zvino mvura mhenyu mungaiwanepiko?

¹²Ko muri mukuru kuna baba vedu Jakobho, vakatipa tsime iri, vakanwa pariri vamene navanakomana vavo nezvipfuwo zvavo?”

¹³Jesu akapindura, akati kwaari, “Mumwe nomumwe, anonwa mvura iyi, achava nenyotazve.

¹⁴Asi ani naani, anonwa mvura yandichamupa ini, haachazovi nenyota nokusingaperi; asi mvura, yandichamupa, ichava mukati make tsime remvura, inovhaira kuupenyu husingaperi.”

¹⁵Mukadzi akati kwaari, “Ishe, ndipei mvura iyi, kuti ndirege kuzova nenyota, kana kuuya kuchera pano.”

¹⁶Jesu akati kwaari, “Enda, undodana murume wako, ugouya pano.”

¹⁷Mukadzi akapindura, akati kwaari, “Handina murume.” Jesu akati kwaari, “Wareva zvakanaka, zvawati, ‘Handina murume.’

¹⁸“Nokuti watova navarume vashanu; uyo waunaye zvino, haasi murume wako; apo wareva chokwadi.”

¹⁹Mukadzi akati kwaari, “Ishe, ndinoona kuti muri muporofita.

²⁰Madzibaba edu ainamata pagomo iri; imi munoti muJerusaremu ndimo munofanira kunamatwa.”

²¹Jesu akati kwaari, “Mai, nditende kuti nguva inouya, yamusingazonamati baba pagomo iri, kana muJerusaremu.

²²Imi munonamata chamusingazivi; isu tinonamata chatinoziva, nokuti ruponeso runobva kuvaJudha.

²³Asi nguva inouya, nazvino yatovapo, yokuti vanonamata nechokwadi vachanamata baba mumweya nechokwadi; nokuti baba vanotsvaka vakadaro kuzomunamata.

²⁴“Mwari ndiMweya; vanomunamata, vanofanira kumunamata mumweya nechokwadi.”

²⁵Zvino mukadzi akati kwaari, “Ndinoziva kuti Mesiasi anouya, anonzi Kristu; kana iye asvika, uchatiudza zvose.”

²⁶Jesu akati kwaari, “Ini, ndinotaura newe, ndini iye.”

²⁷Zvino vadzidzi vake vakasvika, vakashamiswa vachiona kuti anotaurirana nomukadzi; kunyange zvakadaro hakuna mumwe akati, “Munotsvakeiko kwaari?” Kana, “Munotaurireiko naye?”

²⁸Ipapo mukadzi akasiya chirongo chake, akaenda muguta, akati kuvanhu,

²⁹“Uyai muone munhu, akandiudza zvose zvandakaita. Ko uyu handiti ndiye Kristu here?”

³⁰Vakabuda muguta, vakaenda kwaari.

³¹Nenguva iyo vadzidzi vake vakafanomunyengetera, vachiti, “Rabhi, chidyai.”

³²Iye akati kwavari, “Ini ndine zvokudya, zvandinodya, zvamusingazivi.”

³³Zvino vadzidzi vakataurirana, vachiti, “Kasi mumwe amuvigira zvokudya kanhi?”

³⁴Jesu akati kwavari, “Zvokudya zvangu ndizvo, kuti ndiite kuda kwoakandituma, nokupedza basa rake.

³⁵Ko imi hamuti, ‘Kwasara mwedzi mina, kukohwa kwasvika?’ Tarirai, ini ndinoti kwamuri, simudzai meso enyu, onai minda, kuti yatochena kuti ikohwiwe.

³⁶Anocheka anopiwa mubayiro, anounganidza mbesanwa muupenyu husingaperi; kuti anokusha naanocheka vafare vose.

³⁷Nokuti tsumo ndeyechokwadi, inoti, ‘Mumwe anokusha, mumwe achikohwa.’

³⁸Ndakakutumai kundokohwa zvamusina kubindukira; vamwe vakabindukira, zvino imi mapinda pane zvavakabindukira ivo.”

³⁹Zvino vaSamaria vazhinji veguta iro vakatenda kwaari neshoko romukadzi, akapupura, achiti, “Andiudza zvose zvandakaita.”

⁴⁰Zvino vaSamaria vakati vachisvika kwaari, vakamunyengetera kuti agare navo; akagarapo mazuva maviri.

⁴¹Navamwe vazhinji vakatenda neshoko rake.

⁴²Vakati kumukadzi, “Hatichatendi nokureva kwako; tazvinzwira timene, tinoziva kuti uye ndiye Muponesi wapasi pose.”

⁴³Mazuva maviri akati apfuura, akabvapo; akaenda Gariria.

⁴⁴Nokuti Jesu amene akapupura, kuti muporofita haakudzwi munyika yake.

⁴⁵Zvino akati achisvika Gariria, vaGariria vakamugamuchira, nokuti vakanga vaona zvose zvaakaita Jerusaremu pamutambo wePasika, nokuti naivo vakanga vaendawo kumutambo wePasika.

⁴⁶Zvino Jesu akasvikazve paKana yeGariria, paakanga ashandura mvura ikaita waini. Ipapo pakanga panorimwe gurukota raishe, mwanakomana wake akanga achirwara paKapenaume.

⁴⁷Iye akati achinzwa kuti Jesu abva Judhea, asvika Gariria, akaenda kwaari, akamunyengetera kuti aburuke kundoporesa mwanakomana wake; nokuti akanga achitandadza.

⁴⁸Zvino Jesu akati kwaari, “Kana musingaoni zviratidzo nezvishamiso, hamungatongotendi.”

⁴⁹Gurukota raishe rakati kwaari, “Ishe, burukai henyu, mwana wangu asati afa.”

⁵⁰Jesu akati kwaari, “Enda hako, mwanakomana wako mupenyu.” Munhu uyu akatenda shoko rakarehwa naJesu kwaari, akaenda.

⁵¹Akati achaburuka, varanda vake vakasangana naye, vakati, “Mwana wenyu mupenyu.”

⁵²Zvino akavabvunza nguva yaakatanga kunaya nayo. Vakati kwaari, “Zuro nenguva yechinomwe fivha yakabva kwaari.”

⁵³Zvino baba vakaziva kuti ndiyo nguva Jesu yaakati kwaari, “Mwanakomana wako mupenyu.” Iye akatenda nemhuri yake yose.

⁵⁴Ichi ndicho chiratidzo chechipiri chakaitwa naJesu, abva Judhea, asvika Gariria.