Read Shona Union Version 2002 JOHANI 5 Bible Online

JOHANI 5 - Shona Union Version 2002 bible

JOHANI 5

¹Shure kwaizvozvo, mutambo wavaJudha waivapo; Jesu akakwira Jerusaremu.

²Zvino kuJerusaremu pedyo nesuo ramakwai kwaiva nedziva rainzi Bhetisaidha nechiHebheru, raiva namabiravira mashanu.

³Mukati mawo makanga muvete vazhinji vairwara namapofu, nezvirema, navakaonyana, [vaigarira kubvongodzwa kwemvura.

⁴Nokuti mutumwa waiburukira mudziva iro neimwe nguva, achibvongodza mvura; zvino uyo aitanga kupinda mumvura yabvongodzwa aiporeswa, kunyange akanga akabatwa nokurwara kupi nokupi.]

⁵Zvino kwaivapo mumwe munhu, akanga abatwa nokurwara kwake makore makumi matatu namasere.

⁶Jesu akati aona munhu uyo avete pasi, zvaaiziva kuti akanga akadaro nguva refu, akati kwaari, “Unoda kuporeswa here?”

⁷Murwere akamupindura, akati, “Ishe, ndinoshayiwa munhu anondiwisira mudziva, kana mvura ichibvongodzwa; asi ndinoti kana ndoenda, mumwe onditangira kupinda.”

⁸Jesu akati kwaari, “Simuka, tora nhoo dzako, ufambe.”

⁹Pakarepo munhu uyo akaporeswa, akatora nhoo dzake, akafamba. Musi uyo waiva weSabata.

¹⁰Zvino vaJudha vakati kune akaporeswa. “ISabata, hautenderwi kutakura nhoo dzako.”

¹¹Iye akapindura, akati, “Uyo andiporesa ndiye akati kwandiri, tora nhoo dzako, ufambe.”

¹²Vakamubvunza, vachiti, “Ndianiko munhu uyo akati kwauri, tora nhoo dzako, ufambe?”

¹³Zvino akanga aporeswa, haana kuziva kuti ndiani; nokuti Jesu akanga abva, zvakwaiva navanhu vazhinji panzvimbo iyo.

¹⁴Shure kwaizvozvo Jesu akamuwana mutemberi, akati kwaari, “Tarira, waporeswa; usatadzazve, kuti urege kubatwa nechinhu chakaipa chinokunda chichi.”

¹⁵Zvino munhu uyo akandoudza vaJudha, kuti ndiJesu akamuporesa.

¹⁶Saka vaJudha vakatambudza Jesu, nokuti wakazviita izvozvo neSabata.

¹⁷Asi iye akapindura, akati, “Baba vangu vachabata kusvikira zvino, neni ndinobatawo.”

¹⁸Saka zvino vaJudha vakatsvaka zvikuru kumuuraya, nokuti akanga asingatyori murayiro weSabata bedzi, asi akatiwo Mwari ndibaba vake, achizvienzanisa naMwari.

¹⁹Zvino Jesu akapindura, akati kwavari, “Zvirokwazvo, zvirokwazvo, ndinoti kwamuri, mwanakomana haagoni kuita chinhu oga, kana asingaoni baba vachichiita; nokuti zvose zvavanoita ivo, Mwanakomana unozviita saizvozvowo.

²⁰“Nokuti baba vanoda Mwanakomana, vanomuratidza zvose zvavanoita vamene; vachamuratidza mabasa makuru kuna iwawa, kuti mushamiswe.

²¹Nokuti baba sezvavanomutsa vakafa, vachivararamisa, saizvozvo Mwanakomana anoraramisawo vaanoda kuraramisa.

²²Nokuti nababa havatongi munhu, asi vakapa Mwanakomana kutonga kwose,

²³kuti vose vakudze Mwanakomana sezvavanokudza baba. Asingakudzi Mwanakomana, haakudzi nababa, vakamutuma.

²⁴“Zvirokwazvo, zvirokwazvo, ndinoti kwamuri, anonzwa shoko rangu, nokutenda akandituma, ano upenyu husingaperi; haauyi mukutongwa, asi abva murufu, aenda muupenyu.

²⁵Zvirokwazvo, zvirokwazvo, ndinoti kwamuri, nguva inouya, nazvino yatovapo, nayo vakafa vachanzwa izwi roMwanakomana waMwari; vanonzwa vachararama.

²⁶Nokuti baba sezvavano upenyu mavari, saizvozvowo vakapa Mwanakomana, kuti ave noupenyu maari.

²⁷Vakamupa simba rokutonga, zvaari Mwanakomana womunhu.

²⁸“Musashamiswa naizvozvo; nokuti nguva inouya, nayo vose vari mumabwiro vachanzwa izwi rake,

²⁹vachabuda; avo vakaita zvakanaka, kukumuka kwoupenyu, avo vakaita zvakaipa, kukumuka kwokutongwa.

³⁰“Handigoni kuita chinhu ndoga; ndinotonga sezvandinonzwa; kutonga kwangu kwakarurama, nokuti handitsvaki kuda kwangu, asi kuda kwoakandituma.

³¹Kana ndichizvipupurira, kupupura kwangu hakusi kwechokwadi.

³²“Mumwe aripo anondipupurira; ndinoziva kuti kupupura kwake kwaanondipupurira ndokwechokwadi.

³³Makatuma kuna Johani, iye akapupurira chokwadi.

³⁴Ini handigamuchiri kupupura kunobva kumunhu, asi ndinoreva izvozvo kuti muponeswe.

³⁵Iye akanga ari mwenje unopfuta nounovheneka; imi makanga muchida kufara nguva duku muchiedza chake.

³⁶Ini ndine chapupu chikuru kuna Johani; nokuti mabasa andakapiwa nababa kuti ndiapedze, iwo mabasa andinoita, ndiwo anondipupurira kuti baba vakandituma.

³⁷Naivo baba, vakandituma, ndivo vakandipupurirawo. Hamuna kutongonzwa izwi ravo, kana kuona mufananidzo wavo.

³⁸Shoko ravo harigari mukati menyu, nokuti hamutendi avakatuma.

³⁹Munonzvera Magwaro, nokuti munoti upenyu husingaperi munahwo maari; ndiwo anondipupurira ini.

⁴⁰“Asi hamudi kuuya kwandiri, kuti muve noupenyu.

⁴¹“Handigamuchiri kukudzwa kunobva kuvanhu;

⁴²asi ndinokuzivai, kuti hamuna rudo rwaMwari mukati menyu.

⁴³Ndakauya nezita rababa vangu, asi hamundigamuchiri; kana mumwe akasvika nezita rake amene, muchamugamuchira iye.

⁴⁴Mungatenda seiko imi, iyemi munogamuchira kukudzwa mumwe kune mumwe, asi kukudzwa kunobva kuna Mwari, ari oga, hamukutsvaki?

⁴⁵Musati ndichakupomerai mhosva kuna baba; mumwe ariko anokupomerai mhosva, ndiye Mosesi, wamakavimba naye.

⁴⁶Nokuti dai maitenda Mosesi, mungadai mainditenda ini, nokuti iye akanyora zvangu.

⁴⁷Asi kana musingatendi manyoro ake, mungatenda seiko mashoko angu?”