Read Shona Union Version 2002 JOHANI 6 Bible Online

JOHANI 6 - Shona Union Version 2002 bible

JOHANI 6

¹Shure kwaizvozvo Jesu akaenda mhiri kwegungwa reGariria, ndiro reTibheriasi.

²Vanhu vazhinji-zhinji vakamutevera, nokuti vakaona zviratidzo zvaaiita kuvarwere.

³Jesu akakwira mugomo, akagaramo navadzidzi vake.

⁴Pasika, mutambo wavaJudha, wakanga uri pedyo.

⁵Zvino Jesu akati achitarira, akaona vanhu vazhinji-zhinji vachiuya kwaari, akati kuna Firipi, “Tingatengepiko zvingwa, kuti vanhu ava vadye?”

⁶Akareva izvozvo kuti amuedze, nokuti iye akaziva amene zvaakanga achida kuita.

⁷Firipi akamupindura, achiti, “Zvingwa zvamadhenari ana mazana maviri hazvingavaringani, kuti mumwe nomumwe atore zvishoma.”

⁸Zvino mumwe wavadzidzi vake, Andireya, munun'una waSimoni Petirosi, akati kwaari,

⁹“Pano pano mukomana, ane zvingwa zvishanu zvebhari nehove mbiri; asi izvi zvingakwanira sei vanhu vazhinji?”

¹⁰Jesu akati, “Garisai vanhu pasi.” Zvino kwakanga kuno uswa huzhinji ipapo. Naizvozvo varume vakagara pasi, kuwanda kwavo kunenge zviuru zvishanu.

¹¹Zvino Jesu akatora zvingwa; akavonga, akazvipa vakanga vagere pasi; nehovewo saizvozvo pavaida napo.

¹²Zvino vakati vaguta, akati kuvadzidzi vake, “Unganidzai zvimedu zvakasara, kuti zvirege kurasika.”

¹³Ipapo vakazviunganidza, vakazadza matengu ane gumi namaviri nezvimedu zvezvingwa zvishanu zvebhari, zvakanga zvasara kuna vakadya.

¹⁴Zvino vanhu vakati vaona chiratidzo chaakaita, vakati, “Zvirokwazvo uyu muporofita, anouya panyika.”

¹⁵Zvino Jesu, zvaakaziva kuti voda kuuya kumubata nesimba kuzomuita mambo, akabvazve, akaenda mugomo ari oga.

¹⁶Zvino ava madekwana, vadzidzi vake vakaburukira kugungwa;

¹⁷vakapinda muigwa, vakatanga kuyambuka gungwa kuenda Kapenaume. Zvino kwakanga kwasviba, asi Jesu akanga asati asvika kwavari.

¹⁸Gungwa rikatanga kumutswa nemhepo huru yaivhuvhuta.

¹⁹Zvino vakati vakwasva zvikuru masitadhia anenge makumi maviri namashanu, kana makumi matatu, vakaona Jesu achifamba pamusoro pemvura, achiswedera pedyo negwa; vakatya.

²⁰Asi iye akati kwavari, “Ndini, musatya.”

²¹Zvino vakafara kumugamuchira muigwa, igwa rikasvika pakarepo kunyika kwavakanga vachienda.

²²Ava mangwana vanhu vazhinji, vakanga vamire mhiri kwegungwa, vakaona kuti pakanga pasina rimwe igwa duku ipapo, asi iro rimwe makanga mapinda vadzidzi vake, mariri, uye kuti Jesu haana kupinda muigwa navadzidzi vake, asi kuti vadzidzi vake vakanga vaenda voga.

²³(Asi mamwe magwa maduku akanga abva Tibheriasi, akasvika pedyo pavakadyira zvingwa, Ishe ambovonga).

²⁴Zvino vanhu vazhinji vakati vaona, kuti Jesu haapo, navadzidzi vake, vakapinda vamene mumagwa maduku, vakasvika Kapenaume, vachitsvaka Jesu.

²⁵Zvino vakati vamuwana mhiri kwegungwa, vakati kwaari, “Rabhi, mauya pano riniko?”

²⁶Jesu akavapindura, akati, “Zvirokwazvo, zvirokwazvo, ndinoti kwamuri, hamunditsvaki nokuti makaona zviratidzo, asi nokuti makadya zvingwa mukaguta.

²⁷Musabatira basa kutsvaka zvokudya zvinopera, asi batirai basa kuti muwane zvokudya zvinogara kuupenyu husingaperi, zvamuchapiwa naMwanakomana womunhu; nokuti baba, Mwari, vakaisa chisimbiso kwaari.”

²⁸Zvino vakati kwaari, “Tichaiteiko, kuti tibate mabasa aMwari?”

²⁹Jesu akapindura, akati kwavari, “Basa raMwari ndiro, kuti mutende kuna iye waakatuma.”

³⁰Zvino vakati kwaari, “Munoita chiratidzo chipiko, kuti tione, tikutendei?

³¹Madzibaba edu akadya mana murenje, sezvazvakanyorwa, zvichinzi, ‘Akavapa chingwa chikabva kudenga, kuti vadye.’ ”

³²Zvino Jesu akati kwavari, “Zvirokwazvo, zvirokwazvo ndinoti kwamuri, akanga asi iye Mosesi, akakupai chingwa chakabva kudenga, asi ndibaba vangu vanokupai chingwa chechokwadi, chinobva kudenga.

³³Nokuti chingwa chaMwari ndicho chinoburuka kudenga, chinopa pasi upenyu.”

³⁴Zvino vakati kwaari, “Ishe, tipei chingwa ichi misi yose.”

³⁵Jesu akati kwavari, “Ndini chingwa choupenyu; anouya kwandiri, haangatongovi nenzara, noanotenda kwandiri haangatongovi nenyota.

³⁶Asi ndakakuudzai, kuti makandiona, asi hamutendi.

³⁷“Zvose baba zvavanondipa zvichauya kwandiri; noanouya kwandiri, handingatongomurasiri kunze.

³⁸Nokuti handina kuburuka kudenga, kuti ndiite kuda kwangu, asi kuda kwoakandituma.

³⁹Kuda kwoakandituma ndiko, kuti pazvose zvaakandipa, ndirege kurasikirwa nomumwechete waakanditurira, asi kuti ndivamutse nezuva rokupedzisira.

⁴⁰Nokuti kuda kwababa vangu ndiko, kuti mumwe nomumwe, anotarira Mwanakomana, nokutenda kwaari, ave noupenyu husingaperi; neni ndichamumutsa nezuva rokupedzisira.”

⁴¹Zvino vaJudha vakagun'un'una pamusoro pake, nokuti akati, “Ndini chingwa chakaburuka kudenga.”

⁴²Vakati, “Uyu haasi Jesu, Mwanakomana waJosefa, watinoziva baba namai vake here? Zvino angagoti seiko, ndakaburuka kudenga?”

⁴³Jesu akapindura, akati kwavari, “Musagun'un'una pakati penyu.

⁴⁴“Hakuna munhu angauya kwandiri, kana baba, vakandituma, vasingamukwevi; neni ndichamumutsa nezuva rokupedzisira.

⁴⁵Muvaporofita makanyorwa, muchinzi, ‘Vachadzidziswa vose naMwari.’ Mumwe nomumwe akazvinzwa kuna baba, akadzidza, anouya kwandiri.

⁴⁶Handirevi kuti kune munhu akaona baba; asi uyo anobva kuna Mwari, ndiye akaona baba.

⁴⁷“Zvirokwazvo, zvirokwazvo, ndinoti kwamuri, anotenda, ano hupenyu usingaperi.

⁴⁸Ndini chingwa choupenyu.

⁴⁹“Madzibaba enyu akadya mana murenje, akafa.

⁵⁰Ichi ndicho chingwa, chinoburuka kudenga, kuti munhu achidye, arege kufa.

⁵¹Ndini chingwa chipenyu, chakaburuka kudenga; kana munhu achidya chingwa ichi, achararama nokusingaperi; chingwa chandichapa, inyama yangu, yandinopira upenyu hwapasi.”

⁵²Zvino vaJudha vakakakavara pakati pavo, vachiti, “Munhu uyu angatipa seiko nyama yake, tidye?”

⁵³Jesu akati kwavari, “Zvirokwazvo, zvirokwazvo, ndinoti kwamuri, kana musingadyi nyama yoMwanakomana womunhu, nokunwa ropa rake, hamuna upenyu mamuri.

⁵⁴“Anodya nyama yangu, naanonwa ropa rangu, ane upenyu husingaperi; ini ndichamumutsa nezuva rokupedzisira.

⁵⁵Nokuti nyama yangu ndicho chokudya chaicho, neropa rangu chokunwa chaicho.

⁵⁶Anodya nyama yangu, naanonwa ropa rangu, anogara mandiri, neni maari.

⁵⁷Baba vapenyu, sezvavakandituma, neni ndichirarama nababa; saizvozvo anondidya, achararama neni.

⁵⁸Ichi ndicho chingwa chakaburuka kudenga; hazvina kuita samadzibaba akadya, akafa; anodya chingwa ichi achararama nokusingaperi.”

⁵⁹Akareva zvinhu izvi musinagoge, achidzidzisa paKapenaume.

⁶⁰Zvino vazhinji vavadzidzi vake vakati vachizvinzwa, vakati, “Iri shoko igukutu; ndianiko angarinzwa?”

⁶¹Asi Jesu, zvaakanga achiziva mumwoyo make kuti vadzidzi vake vanogun'un'una neshoko irero, akati kwavari, “Iri shoko rinokugumbusai kanhi?

⁶²Muchagodiniko kana muchiona Mwanakomana womunhu achikwira kwaaiva pakutanga?

⁶³Mweya ndiye anoraramisa, nyama haina maturo; mashoko andakataura kwamuri, ndiwo mweya noupenyu.

⁶⁴Asi vamwe venyu variko vasingatendi;” nokuti Jesu akanga achiziva kubva pakutanga, kuti vaisatenda ndivanaani, uye kuti ndiani aizomupandukira.

⁶⁵Akati, “Nemhaka iyi ndakati kwamuri, kuti hakuna munhu angauya kwandiri, kana asina kuzvipiwa nababa.”

⁶⁶Ipapo vadzidzi vake vazhinji vakadzokera shure, vakasazofamba naye.

⁶⁷Jesu akati kuna vane gumi navaviri, “Nemi munoda kubvawo here?”

⁶⁸Simoni Petirosi akamupindura, akati, “Ishe, tichagoenda kuna aniko? Ndimi muna mashoko oupenyu husingaperi.

⁶⁹“Isu takatenda, tikaziva kuti ndimi Mutsvene waMwari.”

⁷⁰Jesu akapindura, akati, “Handina kukutsanangurai, imi muri gumi navaviri here? Asi mumwe wenyu ndowaDhiabhori.”

⁷¹Akareva Judhasi, mwanakomana waSimoni Isikarioti, nokuti ndiye aizomupandukira, aiva mumwe wavane gumi navaviri.