Read Shona Union Version 2002 JOHANI 7 Bible Online

JOHANI 7 - Shona Union Version 2002 bible

JOHANI 7

¹Shure kwaizvozvo Jesu akafamba muGariria; nokuti akanga asingadi kufamba muJudhea, nokuti vaJudha vakanga vachida kumuuraya.

²Zvino mutambo wavaJudha wamatumba wakanga uri pedyo.

³Naizvozvo vanun'una vake vakati kwaari, “Ibva pano, uende Judhea, kuti vadzidzi vako vaonewo mabasa ako aunoita.

⁴Nokuti hakuna munhu anoita chinhu chinyararire, kana iye amene achida kuzikanwa; kana iwe uchiita izvi, uzviratidze kunyika.”

⁵Nokuti navanun'una vake vakanga vasingatendi kwaari.

⁶Ipapo Jesu akati kwavari, “Nguva yangu ichigere kusvika; asi nguva yenyu inogara yakagadzirwa.

⁷“Nyika haingakuvengi imi; asi inondivenga ini, nokuti ndinoipupurira, kuti mabasa ayo akaipa.

⁸Kwirai kumutambo imi; ini handiti ndokwira kumutambo, nokuti nguva yangu ichigere kusvika kwazvo.”

⁹Akati areva izvozvo kwavari, akagara Gariria.

¹⁰Zvino vanun'una vake vakati vakwira kumutambo, iye akabva okwirawo, asingaendi pachena, asi panenge sapakavanda.

¹¹Zvino vaJudha vakamutsvaka pamutambo, vakati, “Aripiko iye?”

¹²Kugun'un'una kukuru kukavapo pakati pavazhinji pamusoro pake, vamwe vachiti, “Akanaka;” vamwe vachiti, “Kwete, anotsausa vanhu vazhinji.”

¹³Kunyange zvakadaro kwakanga kusina munhu aitaura pachena pamusoro pake, nokuti vakatya vaJudha.

¹⁴Zvino kwakati pava pakati pomutambo, Jesu akakwira kutemberi, akatanga kudzidzisa.

¹⁵Naizvozvo vaJudha vakashamiswa, vachiti, “Munhu uyu anoziva seiko mabhuku, zvaasina kumbodzidza?”

¹⁶Jesu akapindura, akati, “Kudzidzisa kwangu hakusi kwangu, asi ndokwoakandituma.

¹⁷Kana munhu achida kuita kuda kwake, achaziva kana kudzidzisa uku kuchibva kuna Mwari, kana ndichizvitaurira ndimene.

¹⁸“Anozvitaurira, anotsvaka kukudzwa kwake; asi anotsvaka kukudzwa kwoakamutuma, ndiye wechokwadi, hapana kusarurama maari.

¹⁹Mosesi haana kukupai murayiro here? Asi hakuna mumwe wenyu anoita murayiro. Munotsvakireiko kundiuraya?”

²⁰Vanhu vazhinji vakapindura, vachiti, “Uno mweya wakaipa iwe; ndianiko anotsvaka kukuuraya?”

²¹Jesu akapindura, akati kwavari, “Ndakaita basa rimwe, mukashamiswa mose.

²²Nemhaka iyi Mosesi akakupai dzingiso, (handiti ndeyaMosesi, asi yamadzibaba); zvino imi munodzingisa munhu neSabata.

²³“Zvino kana munhu angadzingiswa neSabata, kuti murayiro waMosesi urege kutyorwa, ko imi monditsamwira nokuti ndakaporesa munhu wose neSabata here?

²⁴Musatonga nezvinoonekwa, asi tongai nokutonga kwakarurama.”

²⁵Zvino vamwe veJerusaremu vakati, “Ko haasi iye avaitsvaka kuuraya here?

²⁶Tarirai, anotaura pachena, vasingarevi chinhu kwaari. Ko vakuru vanoziva kwazvo kanhi kuti ndiye Kristu?

²⁷Zvino uyu tinoziva kwaanobva, asi Kristu kana achisvika, hakuna munhu angaziva kwaanobva.”

²⁸Zvino Jesu akadanidzira mutemberi, akadzidzisa, achiti, “Munondiziva, munoziva napandakabva; handina kuuya ini ndimene, asi akandituma ndiye wechokwadi, wamusingazivi imi.

²⁹Ini ndinomuziva, nokuti ndinobva kwaari; ndiye akandituma.”

³⁰Naizvozvo vakatsvaka kumubata, asi kwakanga kusina munhu akaisa ruoko kwaari, nokuti nguva yake yakanga isati yasvika.

³¹Asi vamwe vazhinji vakatenda kwaari, vakati, “Kana Kristu achizosvika, angaita zviratidzo zvizhinji kunezvizvi zvakaitwa nouyu here?”

³²Zvino vaFarisi vakanzwa vanhu vazhinji vachigun'un'una izvozvo pamusoro pake; vapristi vakuru navaFarisi vakatuma mapurisa kundomubata.

³³Ipapo Jesu akati kwavari, “Ndichiri nemi nguva duku, ndigoenda kune akandituma.

³⁴Muchanditsvaka, asi hamungandiwani; uye apo pandiri, imi hamungasvikipo.”

³⁵Zvino vaJudha vakataurirana, vachiti, “Uyo anoda kuendepiko, kwatisingazomuwani? Ko anoda kuenda kuna vakapararira pakati pavaGiriki, kuti anodzidzisa vaGiriki here?

³⁶Rinoti kudiniko shoko iri raareva, rokuti, ‘Muchanditsvaka, asi hamungandiwani, uye, apo pandiri, imi hamungasvikipo?’ ”

³⁷Zvino nezuva rokupedzisira, zuva guru romutambo, Jesu akamira, akadanidzira, akati, “Ani naani, kana ane nyota, ngaauye kwandiri, anwe.

³⁸‘Anotenda kwandiri, sezvazvakarehwa noRugwaro, nzizi dzemvura mhenyu dzichayerera dzichibva mukati make.’ ”

³⁹Asi izvi akareva Mweya, aizopiwa avo vaitenda kwaari, nokuti Mweya akanga asati avapo, nokuti Jesu akanga asati akudzwa.

⁴⁰Zvino vamwe pakati pavanhu vazhinji vakati vachinzwa mashoko awa, vakati, “Zvirokwazvo uyu muporofita.”

⁴¹Vamwe vakati, “Uyu ndiye Kristu.” Asi vamwe vakati, “Ko Kristu angabva Gariria here?

⁴²Rugwaro haruna kureva here, kuti Kristu achabva kurudzi rwaDhavhidhi, napamusha weBheterehemu, paiva naDhavhidhi?”

⁴³Naizvozvo kupesana kwakamuka pamusoro pake pakati pavazhinji.

⁴⁴Vamwe vakanga vachida kumubata; asi kwakanga kusina akaisa maoko kwaari.

⁴⁵Zvino mapurisa akauya kuvapristi vakuru nokuvaFarisi, ivo vakati kwavari, “Makaregereiko kuuya naye?”

⁴⁶Mapurisa akapindura, akati, “Hakuna munhu akatongotaura nokutaura kwomunhu uyo.”

⁴⁷Naizvozvo vaFarisi vakavapindura, vakati, “Nemiwo matsauswa kanhi?

⁴⁸Kuvakuru nokuvaFarisi kuno mumwe akatongotenda kwaari here?

⁴⁹Asi vanhu ava vazhinji, vasingazivi murayiro, vakatukwa.”

⁵⁰Nikodhimo, (uya akambouya kwaari, aiva mumwe wavo), akati kwavari,

⁵¹“Murayiro wedu unotonga munhu, vasati vambomunzwa, nokuziva chaanoita here?”

⁵²Vakapindura, vakati kwaari, “Ko newewo uri weGariria here? Nzvera, uone kuti hakuna muporofita, anobva Gariria.” [

⁵³Ipapo mumwe nomumwe akaenda kumba kwake.