Read Shona Union Version 2002 JOHANI 9 Bible Online

JOHANI 9 - Shona Union Version 2002 bible

JOHANI 9

¹Akati achipfuura, akaona munhu akanga ari bofu kubva pakuberekwa kwake.

²Vadzidzi vake vakamubvunza, vachiti, “Rabhi, ndianiko akatadza, uyu kana vabereki vake, zvaakaberekwa riri bofu?”

³Jesu akapindura, akati, “Uyu haana kutadza, kunyange navabereki vake; asi izvi zvakaitwa kuti mabasa aMwari aoneswe maari.

⁴Ndinofanira kubata basa rowakandituma, achiri masikati; usiku hunouya, husingagoni munhu kubata basa nahwo.

⁵Ndichiri panyika, ndiri chiedza chenyika.”

⁶Akati areva izvozvo, akapfira mate pasi, akakanya dope namate, akazodza dope pameso pake,

⁷akati kwaari, “Enda undoshamba mudziva reSiroami,” (ndokuti, kana zvichishandurwa, “Kutumwa.”) Ipapo akaenda, akandoshamba, akadzoka achiona.

⁸Vakanga vagere naye, navaimuona kare, kuti ndiye waikumbira, vakati, “Ko uyu haasi iye aigara achikumbira here?”

⁹Vamwe vakati, “Ndiye;” vamwe vakati, “Kwete, asi akatodzana naye.” Iye akati, “Ndini.”

¹⁰Zvino vakati kwaari, “Meso ako akagosvinudzwa seiko?”

¹¹Akapindura, akati, “Munhu anonzi Jesu akakanya dope, akazodza meso angu, akati kwandiri, enda Siroami, undoshamba; naizvozvo ndakaenda, ndikashamba, ndikaona.”

¹²Vakati kwaari, “Iye aripiko?” Akati, “Handizivi.”

¹³Vakamuisa kuvaFarisi, iye akanga ari bofu kare.

¹⁴Zvino raiva Sabata zuva iro Jesu raakakanya dope naro, akasvinudza meso ake.

¹⁵Zvino vaFarisi vakamubvunzazve, kuti wakaoneswa sei. Akati kwavari, “Akaisa dope pameso pangu, ndikandoshamba, ndikaona.”

¹⁶Zvino vamwe vavaFarisi vakati, “Munhu uyu haasi waMwari, nokuti haachengeti Sabata.” Asi vamwe vakati, “Ko munhu mutadzi angaita seiko zviratidzo zvakadai?” Ipapo kupesana kwakamuka pakati pavo.

¹⁷Zvino vakatizve kubofu, “Iwe unoti kudiniko pamusoro pake, zvaakasvinudza meso ako?” Akati, “Muporofita.”

¹⁸Naizvozvo vaJudha havana kutenda pamusoro pake, kuti akanga ari bofu, akazoona, kusvikira vadana vabereki vowakaoneswa,

¹⁹vakavabvunza, vachiti, “Uyu ndiye mwanakomana wenyu, wamunoti akaberekwa riri bofu here? Zvino anogoona seiko?”

²⁰Vabereki vake vakapindura, vakati, “Tinoziva kuti uyu mwanakomana wedu, uye kuti akaberekwa riri bofu;

²¹asi hatizivi kuti zvino woona sei; noakasvinudza meso ake, hatimuzivi; mubvunzei henyu; ayaruka, achazvirevera hake.”

²²Vabereki vake vakareva izvozvo, nokuti vaitya vaJudha, nokuti vaJudha vakanga vatotenderana, kuti kana kuchinge kune munhu anotenda kuti ndiye Kristu, abudiswe musinagoge.

²³Naizvozvo vabereki vake vakati, “Ayaruka hake, mubvunzei henyu.”

²⁴Zvino vakamudanazve rwechipiri, iye munhu akanga ari bofu, vakati kwaari, “Rumbidza Mwari; isu tinoziva kuti munhu uyu mutadzi.”

²⁵Ipapo iye akapindura, akati, “Kana ari mutadzi ini handizivi; ndinoziva chinhu chimwe, kuti ndaiva bofu, zvino ndoona.”

²⁶Ipapo vakati kwaari, “Akakuiteiko? Akasvinudza meso ako sei?”

²⁷Akavapindura, akati, “Ndatokuudzai, mukasanzwa. Munoda kunzwazve nemhaka yeiko? Nemi munoda kuva vadzidzi vakewo kanhi?”

²⁸Vakamunyomba, vachiti, “Iwe ndiwe mudzidzi wake, asi isu tiri vadzidzi vaMosesi.

²⁹Tinoziva kuti Mwari wakataura naMosesi; asi uyu hatizivi kwaakabva.”

³⁰Iye munhu akapindura, akati kwavari, “Nyambera chinhu ichi chinoshamisa, kuti imi hamuzivi kwaanobva, kunyange akasvinudza meso angu.

³¹Tinoziva kuti Mwari haanzwi vatadzi; asi kana munhu achishandira Mwari, achiita kuda kwake, anomunzwa iye.

³²Kubvira pakutanga hakuna kumbonzwika, kuti mumwe akasvinudza meso omunhu, akaberekwa riri bofu.

³³Dai uyu asati ari waMwari, haasaigona kuita chinhu.”

³⁴Vakapindura, vakati kwaari, “Iwe wakaberekerwa muzvivi chose, zvino iwe wotidzidzisa isu?” Vakamudzingira kunze.

³⁵Jesu akanzwa kuti vamudzingira kunze; akati amuwana, akati kwaari, “Iwe unotenda kuMwanakomana waMwari here?”

³⁶Akapindura, akati, “Iye ndianiko Ishe, kuti nditende kwaari?”

³⁷Jesu akati kwaari, “Wamuona, uye, ndiye unotaura newe.”

³⁸Ipapo akati, “Ndinotenda, Ishe.” Akamupfugamira.

³⁹Jesu akati, “Kutonga ndiko kwandauyira panyika ino, kuti vasingaoni, vaone; navanoona vave mapofu.”

⁴⁰Avo vavaFarisi vaiva naye, vakazvinzwa, vakati kwaari, “Ko nesuo tiri mapofu here?”

⁴¹Jesu akati kwavari, “Dai maiva mapofu, hamusaiva nezvivi, asi zvino munoti, tinoona; zvivi zvenyu zvinoramba zviripo.”