Read Shona Union Version 2002 MABASA 12 Bible Online

MABASA 12 - Shona Union Version 2002 bible

MABASA 12

¹Zvino nenguva inenge iyeyo mambo Herodhi akatambanudza maoko ake kuti atambudze vamwe vekereke;

²akauraya Jakobho, mukuru waJohani, nomunondo.

³Zvino akati achiona kuti zvafadza vaJudha, ndokupfuura akabatawo Petirosi. Aiva mazuva ezvingwa zvisina mbiriso.

⁴Zvino akati amubata, akamusunga akamuisa mutorongo, kumapoka mana, rimwe nerimwe rina varwi vana, kuti vamurinde, achiti amuise pamberi pavanhu, kana Pasika yapfuura.

⁵Naizvozvo Petirosi akachengetwa mutorongo; asi akanga achinyengetererwa zvikuru nekereke kuna Mwari.

⁶Zvino Herodhi akati oda kumubudisa, usiku ihwohwo Petirosi akanga avete pakati pavarwi vaviri, akasungwa namangetani maviri; navarindi vakanga vachirinda torongo pamberi pomusuo.

⁷Ipapo tarira, mutumwa waIshe akamirapo, chiedza chikapenya mumba; akarova Petirosi parutivi, ndokumumutsa, achiti, “Muka, ukurumidze.” Ipapo ngetani dzakawa pamaoko ake.

⁸Mutumwa akati kwaari, “Zvisunge chiuno, usungire shangu dzako.” Akaita saizvozvo. Akati kwaari, “Fuka nguo yako, unditevere.”

⁹Akabuda, akamutevera, asingazivi kuti zvirokwazvo zvinoitwa nomutumwa; asi akati ndinoona chiratidzo.

¹⁰Zvino vakati vapfuura murindi wokutanga nowechipiri, vakasvika pasuo ramatare, pavaipinda napo paguta; rikangovazarukira roga; vakabuda, vakapfuura neimwe nzira, mutumwa ndokubva kwaari pakarepo.

¹¹Petirosi akati apengenuka, akati, “Zvino ndinoziva zvirokwazvo kuti Ishe akatuma mutumwa wake, akandirwira paruoko rwaHerodhi napazvose zvakanga zvichifungwa navanhu vavaJudha.”

¹²Zvino akati arangarira izvozvo, akaenda kumba kwaMaria, mai vaJohani, ainzi Mako; vazhinji vakanga vakaunganapo, vachinyengetera.

¹³Zvino akati agogodza pagonhi resuo, musikana ainzi Rhoda akauya kuzoteerera.

¹⁴Iye akati achinzwa izwi raPetirosi, akasazarura suo nomufaro, asi akamhanhyira mukati akavaudza kuti Petirosi amire pasuo.

¹⁵Ivo vakati kwaari, “Unopenga.” Asi iye akasimbisa achiti, “Ndizvozvo.” Ivo vakati, “Mutumwa wake.”

¹⁶Asi Petirosi akaramba achigogodza; vakazozarura, vakamuona, vakashamiswa.

¹⁷Zvino iye akavaninira noruoko kuti vanyarare, akavarondedzera mutoo waakabudiswa nawo naIshe patorongo. Akati, “Udzai Jakobho nehama zvinhu izvozvi; ndokubva akaenda kumwe.”

¹⁸Zvino kwakati kwaedza, bope guru rikavapo pakati pavarwi, vachiti, “Petirosi aitwa sei.”

¹⁹Herodhi akati amutsvaka, akamushayiwa, ndokubvunzisisa varindi, akarayira kuti vandourawa. Zvino akaburuka Judhea, akaenda Kesaria, akandogarako.

²⁰Zvino akatsamwira zvikuru vanhu veTire neSidhoni; ivo ndokuuya kwaari vose pamwechete, vakaita ushamwari naBhurasito, mutariri weimba yamambo, vakakaumbira rugare, nokuti nyika yavo yaipiwa zvokudya nenyika yamambo.

²¹Ipapo nezuva rakanga ratarwa, Herodhi akafuka nguo dzoumambo, akagara pachigaro chake choushe, akataura kwavari.

²²Ipapo vanhu vakadanidzira vachiti, “Izwi raMwari, harizi romunhu.”

²³Pakarepo mutumwa waIshe akamurova, nokuti akanga asina kukudza Mwari; akadyiwa nehonye, akafa.

²⁴Asi shoko raMwari rakakura, rikawanda.

²⁵Zvino Bhanabhasi naSauro, vakati vapedzisa basa ravo, vakadzokera Jerusaremu, vakaenda naJohani, ainzi Mako.