Read Shona Union Version 2002 MABASA 15 Bible Online

MABASA 15 - Shona Union Version 2002 bible

MABASA 15

¹Zvino vamwe vakaburuka Judhea, vakadzidzisa hama, vachiti, “Kana musingadzingiswi netsika yaMosesi, hamungaponeswi.”

²Asi Pauro naBhanabhasi vakapesana kwazvo navo, nokuita nharo navo, vakazotenderana kuti Pauro naBhanabhasi navamwe vavo vakwire Jerusaremu kuvapostori navakuru pamusoro peshoko iri.

³Naizvozvo vakaperekedzwa nekereke, vakagura neFonikia neSamaria, vakataura zvokutendeuka kwavahedheni; vakafadza zvikuru hama dzose.

⁴Zvino vakati vasvika Jerusaremu, vakagamuchirwa nekereke, navapostori, navakuru; vakarondedzera zvose zvakaitwa naMwari navo.

⁵Asi vamwe vedzidziso yavaFarisi, vaitenda, vakasimuka, vakati, “Vanofanira kudzingiswa nokurayirwa kuti vachengete murayiro waMosesi.”

⁶Ipapo vapostori navakuru vakaungana kuti varangane pamusoro peshoko iri.

⁷Zvino, nharo huru dzakati dzavapo, Petirosi akasimuka akati kwavari, “Varume, hama, munoziva kuti kubva pamazuva akare Mwari akanditsanangura pakati penyu, kuti vahedheni vanzwe shoko reVhangeri nomuromo wangu, vatende.

⁸Zvino Mwari, muzivi womwoyo, wakavapupurira, akavapa Mweya Mutsvene sesu;

⁹haana kutsaura pakati pedu navo, zvaakanatsa mwoyo yavo nokutenda.

¹⁰Naizvozvo zvino, munoedzireiko Mwari, muchiisa pamitsipa yavadzidzi joko, rakanga risingagoni kutakurwa namadzibaba edu kunyange nesu?

¹¹Asi tinotenda kuti isu tichaponeswa nenyasha dzaIshe Jesu nomutoo mumwe navo.”

¹²Ipapo vanhu vazhinji vose vakaramba vanyerere, vakateerera vanaBhanabhasi naPauro vachirondedzera zviratidzo nezvishamiso, zvakaitwa naMwari navo pakati pavahedheni.

¹³Zvino vakati vanyarara, Jakobho akapindura, akati, “Varume, hama, nditeererei.

¹⁴Simoni akarondedzera matangiro aMwari kumutsa vahedheni, kuti atore kwavari vanhu vezita rake.

¹⁵Naizvozvo mashoko avaporofita anobvumira izvozvi; sezvazvakanyorwa, zvichinzi,

¹⁶‘Shure kwaizvozvi ndichadzoka, Ndivake tabhenakeri yaDhavhidhi, yakawa; Ndichavakazve matongo ayo, Ndichiimutsa;

¹⁷Kuti vakasara kuvanhu vatsvake Ishe, Navahedheni vose vakadanwa nezita rangu,

¹⁸Ndizvo zvinotaura Ishe, unozivisa izvozvi zvose kubva pakutanga kwenyika.’

¹⁹“Naizvozvi ini ndinoti, ngatirege kugumbusa avo pakati pavahedheni vakatendeukira kuna Mwari;

²⁰asi tivanyorere kuti varege zvakashatiswa nezvifananidzo, noupombwe, nezvakadzipwa, neropa.

²¹Nokuti Mosesi kubva pamarudzi ekare, aiva navanomuparidza paguta rimwe nerimwe, achirawa mumasinagoge Sabata rimwe nerimwe.”

²²Ipapo vapostori, navakuru, nekereke yose, vakati zvakanaka kuti vatsanangure varume pakati pavo, vavatumire Andioki pamwechete naPauro naBhanabhasi, vaiti: Judhasi ainzi Bhasabhasi, naSirasi, vakuru pakati pehama.

²³Vakanyora tsamba, vakaituma navo, yaiti, “Vapostori navakuru pahama, kuhama dzokuvahedheni paAndioki, napaSiria, napaKirikia; mufaro!

²⁴Zvatakanzwa, kuti vamwe vakabva kwatiri, vatisina kurayira, vakakukanganisai namashoko, vachidziyanisa mweya yenyu,

²⁵takati nomwoyo mumwe zvakanaka kuti titsanangure varume, tivatumire kwamuri, pamwechete naBhanabhasi naPauro, vadikanwi vedu;

²⁶vanhu vakazvidza upenyu hwavo nokuda kwezita raIshe wedu, Jesu Kristu.

²⁷Zvino tatuma Judhasi naSirasi, ivo vanozokuudzai vamene izvozvi nomuromo.

²⁸Nokuti Mweya Mutsvene nesu takati zvakanaka, kuti tirege kukutakudzai mutoro mukuru kune zvinhu izvi zvakafanira,

²⁹zvinoti: Regai zvakabayirwa zvifananidzo, neropa, nezvakadzipwa, noupombwe; kana mukazvidzora pazviri, muchaita zvakanaka. Sarai zvakanaka.”

³⁰Zvino vakati vaendeswa, vakaburukira Andioki; vakaunganidza vanhu vazhinji, vakavapa tsamba.

³¹Ivo vakati vairava, vakafara zvikuru pamusoro pokuvaraidzwa.

³²Judhasi naSirasi, vaiva vaporofita vamene, vakavaraidza hama namashoko mazhinji, nokuvasimbisa.

³³Vakati vagarako nguva, vakaendeswa nehama nomufaro, vakaenda kuna vakanga vavatuma.

³⁴[Asi Sirasi akati zvakanaka kusarapo.]

³⁵Pauro naBhanabhasi vakagara Andioki, vachidzidzisa nokuparidza shoko raIshe, navamwe vazhinjiwo.

³⁶Zvino mamwe mazuva akati apfuura, Pauro akati kuna Bhanabhasi, “Ngatidzokezve tindoshanyira hama muguta rimwe nerimwe matakaparidza shoko raIshe, tione kuti vakadini.”

³⁷Zvino Bhanabhasi akanga achida kutora Johaniwo, ainzi Mako;

³⁸asi Pauro akati hazvina kunaka kumutora iye, akambovasiya Pamufiria, akasaenda navo kubasa.

³⁹Ipapo kutsamwirana kukavapo, nokudaro vakaparadzana, Bhanabhasi akatora Mako, akaenda Saipurasi nechikepe;

⁴⁰asi Pauro wakatsanangura Sirasi; akaenda, akaiswa nehama panyasha dzaIshe;

⁴¹akagura neSiria neKirikia, achisimbisa kereke.