Read Shona Union Version 2002 MABASA 18 Bible Online

MABASA 18 - Shona Union Version 2002 bible

MABASA 18

¹Shure kwaizvozvo, Pauro akabva Ateni, akasvika Korinde;

²akawana mumwe muJudha, ainzi Akwira, worudzi rwavePonto, achangobva Itariya, naPirisira mukadzi wake; (nokuti Kiraudhio akanga arayira kuti vaJudha vose vabve Roma); akaenda kwavari;

³zvino zvaakanga ane basa rimwe navo, akagara navo vachibata; nokuti basa ravo raiva rokuita matende.

⁴Sabata rimwe nerimwe akataurirana navo musinagoge, akaedza kugombedzera vaJudha navaGiriki.

⁵Zvino Sirasi naTimoti vakati vachizoburuka vachibva Makedhonia, Pauro akamanikidzwa neshoko, achipupurira vaJudha kwazvo kuti Jesu ndiye Kristu.

⁶Zvino vakati vachimudzivisa, nokumutuka, akazunza nguo dzake, akati kwavari, “Ropa renyu ngarive pamusoro penyu; ndakachena, kubva zvino ndichaenda kuvahedheni.”

⁷Akabvapo, akapinda mumba momumwe, ainzi Tito Jusuto, ainamata Mwari, imba yake yaiva pedyo nesinagoge.

⁸NaKirisipo, mukuru wesinagoge, akatenda kuna Ishe naveimba yake yose; navazhinji veKorinde vakanzwa, vakatenda, vakabhabhatidzwa.

⁹Zvino Ishe akati kuna Pauro usiku nechiratidzo, “Usatya hako, asi taura, usanyarara;

¹⁰nokuti ini ndinewe; hapana munhu angakumukira akakuitira zvakaipa, nokuti ndina vanhu vazhinji muguta rino.”

¹¹Akagarapo gore rimwe nemwedzi mitanhatu, achidzidzisa shoko raMwari pakati pavo.

¹²Zvino Gario akati ava mubati weAkaya, vaJudha vakamukira Pauro nomwoyo mumwe, vakauya naye pachigaro chokutonga,

¹³vachiti, “Uyu anogombedzera vanhu kuti vanamate Mwari nenzira isingatenderwi nomurayiro.”

¹⁴Zvino Pauro akati oda kushamisa muromo wake, Gario akati kuvaJudha, “Dai yaiva mhosva yezvisakarurama, kana kutadza kwakaipa, ndaifanira kuva nomwoyo murefu kwamuri, imi vaJudha.

¹⁵Asi kana dziri nharo pamusoro pamashoko namazita nomurayiro wenyu, tambai henyu imi mhosva iyo; ini handidi kuva mutongi waizvozvo.”

¹⁶Akavadzinga pachigaro chokutonga.

¹⁷Zvino vose vakabata Sositeni, mukuru wesinagoge, vakamurova pamberi pechigaro chokutonga; asi Gario haana kuva nehanya nechinhu chimwe chaizvozvo.

¹⁸Pauro akati agarapo mazuva mazhinji, akaonekana nehama, akabvapo, akaenda Siria nechikepe, ana Pirisira naAkwira, aveura musoro wake paKenikiria, nokuti akanga apika.

¹⁹Vakasvika Efeso, akavasiyapo; asi iye amene akapinda musinagoge akataurirana navaJudha.

²⁰Zvino vakati vachikumbira kuti agare navo nguva refu, haana kutenda;

²¹asi wakaonekana navo, achiti, “Ndichadzokerazve kwamuri, kana Mwari achida,” akabva Efeso nechikepe.

²²Akati asvika Kesaria, akakwira kundokwazisa kereke, akaburukira Andioki.

²³Akati agarapo nguva, akabva, akagura nenyika dzeGaratiya neFirigiya achidzitevedzanisa, achisimbisa vadzidzi vose.

²⁴Zvino mumwe muJudha ainzi Aporo, worudzi rwapaArekizandiria, murume akanga akadzidza zvikuru, akasvika Efeso; akanga ane simba pamagwaro.

²⁵Uyu akanga adzidziswa nzira yaIshe, akashingaira nomweya, achitaura nokunatsodzidzisa zvaJesu, achiziva rubhabhatidzo rwaJohani bedzi.

²⁶Iye akatanga kutaura musinagoge asingatyi. Zvino Pirisira naAkwira vakati vamunzwa, vakamutora, vakanatsomududzira nzira yaMwari.

²⁷Zvino akati achida kuyambukira Akaya, hama dzikamusimbisa, vakanyorera vadzidzi kuti vamugamuchire. Zvino akati asvika, akabatsira zvikuru ivo vakatenda nenyasha.

²⁸Nokuti akakunda vaJudha nesimba pachena, achiratidza naMagwaro, kuti Jesu ndiye Kristu.