Read Shona Union Version 2002 MABASA 24 Bible Online

MABASA 24 - Shona Union Version 2002 bible

MABASA 24

¹Zvino mazuva mashanu akati apfuura, Ananiasi, mupristi mukuru, akaburuka navamwe vakuru, nomumwe mureveri, ainzi Terituro; vakamhan'arira Pauro kumubati.

²Iye akati adanwa, Terituro akatanga kumupomera mhosva achiti, “Zvatinoona rugare rukuru nemi, norudzi urwu zvarunoruramisirwa mhosva nokubata kwenyu kwakanaka;

³tinozvigamuchira nemitoo yose napanzvimbo dzose nokuvonga kukuru, imi, Ferikisi akakurumbira zvikuru.

⁴Asi, zvandisingadi kukunonotsai, ndinokumbira kwamuri, kuti mutinzwe nengoni dzenyu zvishomanene.

⁵Nokuti takaona kuti murume uyu wakashata kwazvo, anomutsa bope pavaJudha vose panyika dzose, ari mutungamiriri weboka ravaNazareni.

⁶Iye akaidzawo kushatisa temberi, tikamubata, [tichida kumutonga nomurayiro wedu.

⁷Asi Risiya, mukuru wechiuru chamazana, ndokuuya, akamubvisa mumaoko edu nesimba guru,

⁸akarayira vanomupomera kuti vauye pamberi penyu.] Kana mukamubvunzisisa mumene, muchagona kuziva izvozvo zvose zvatakamukwirira nazvo.”

⁹NavaJudha vakabvumirawo pakumhan'ara, vakasimbisa kuti zvinhu izvozvo ndizvo.

¹⁰Zvino mubati akati amuninira, kuti ataure, Pauro akapindura, akati, “Zvandinoziva kuti mava mutongi wavanhu ava makore mazhinji, ndinozvidavirira nomufaro,

¹¹nokuti munzwe kuti mazuva achigere kupfuura gumi namaviri, kubvira panguva yandakakwira Jerusaremu kundonamata.

¹²“Havana kundiwana ndichiita nharo mutemberi nomunhu, kana muguta;

¹³havangagoniwo kusimbisa kwamuri izvo zvavanondipomera nazvo zvino.

¹⁴Asi ndinotenda hangu kwamuri, kuti ndinoshumira Mwari wamadzibaba edu neNzira, yavanoti idzidziso yakatsauka, ndichitenda zvose zvomurayiro nezvakanyorwa pavaporofita;

¹⁵ndine tariro kuna Mwari, iyo yavanotendawo vamene, kuti kuchavapo kumuka kwavakafa kwavakarurama navasakarurama.

¹⁶“Pachinhu ichi ndinoedza zvikuru kuti misi yose ndive nehana isina mhosva kuna Mwari nokuvanhu.

¹⁷“Zvino makore mazhinji akati apfuura, ndakauya nezvipo nezvibayiro kuvanhu vangu.

¹⁸“Ndizvozvo zvavakandiwana ndichiita mutemberi, ndanatswa, ndisina vanhu vazhinji, kana bopoto;

¹⁹asi vamwe vaJudha veAsia vaivapo, ivo vaifanira kuva pano pamberi penyu, kundipomera mhosva, kana vaiva nechinhu neni.

²⁰“Kunyange navava ngavareve vamene chisakarurama chavakawana, musi wandakamira pamberi pamakurukota,

²¹asi shoko iri bedzi, randakadanidzira, ndimire pakati pavo, ndichiti, ‘Ndinotongwa nhasi pamusoro pokumuka kwavakafa.’ ”

²²Asi Ferikisi, zvaakazivisisa zvakanaka Nzira iyo, akavavetsa, achiti, “Kana Risiya, mukuru wechiuru chamazana aburukira pano ndichanatsobvunzisisa mhaka yenyu.”

²³Akarayira mukuru wezana kuti Pauro achengetwe, arerusirwe, uye kuti varege kudzivisa mumwe wokwake kumushumira.

²⁴Zvino mamwe mazuva akati apfuura, Ferikisi akasvika, nomukadzi wake Dhurusira, aiva muJudha, akadana Pauro, akamunzwa pamusoro pokutenda kuna Kristu Jesu.

²⁵Zvino akati achitaura zvokururama, nokuzvidzora, nokutonga kunouya, Ferikisi akatya zvikuru, akapindura, akati, “Enda hako zvino; kana ndikazova nenguva yakanaka, ndichakudana.”

²⁶Akatiwo zvimwe achazopiwa mari naPauro; naizvozvo akamudana kazhinji, achitaura naye.

²⁷Asi makore maviri akati apera, Pokio Fesito akapinda panzvimbo yaFerikisi, zvino Ferikisi achida kufadza vaJudha, akasiya Pauro akasungwa.