Read Shona Union Version 2002 MABASA 26 Bible Online

MABASA 26 - Shona Union Version 2002 bible

MABASA 26

¹Zvino Agiripa akati kuna Pauro, “Unotenderwa kuzvidavirira.” Ipapo Pauro akatambanudza ruoko rwake, akazvidavirira, achiti,

²“Mambo Agiripa, ndinozvikorokotedza, zvandingazvidavirira nhasi pamberi penyu pamusoro pezvose zvandinokwirirwa nazvo navaJudha;

³zvikuru nokuti munoziva tsika dzose namashoko ose pakati pavaJudha; naizvozvo ndinokumbira kwamuri, kuti mundinzwe nomwoyo murefu.

⁴“VaJudha vose vanoziva mafambiro angu, kubva pauduku hwangu, aiva pakati porudzi rwangu napaJerusaremu, kubva pakutanga;

⁵vakandiziva kare, kana vachida kupupura, kuti ndaiva muFarisi, nedzidziso yokupira kwedu yakaisvorurama.

⁶Nazvino ndinomira pano, kuti nditongwe nokuda kwokutarira chipikirwa chakapikirwa madzibaba edu naMwari.

⁷Marudzi edu ane gumi namaviri anoshumira Mwari usiku namasikati, achiti achasvika pachipikirwa icho. Pamusoro pokutarira uku, imi mambo, ndinokwirirwa navaJudha.

⁸Munofungireiko imi kuti hazvingatendwi kuti Mwari angamutsa vakafa?

⁹“Zvino neni ndaiti ndinofanira kuita zvinhu zvizhinji zvinopesana nezita raJesu weNazareta.

¹⁰Ndakazviitawo paJerusaremu, ndikapfigira vatsvene vazhinji mutorongo, ndapiwa simba navapristi vakuru; uye kana vaiurawa, neni ndaibvumirawo.

¹¹Nomumasinagoge ose ndaivatambudza, ndichivaroverera kuti vashonhe Mwari; ndikanyanya kuvapengera, ndikavatambudza kusvikira kumaguta ari kure nenyika ino.

¹²“Ndakati ndichaita izvozvi, ndikaenda Dhamasiko nesimba uye nomurayiro wavapristi vakuru,

¹³zvino, mambo, masikati makuru, ndiri munzira, ndikaona chiedza chaibva kudenga, chaikunda kupenya kwezuva, chichindipenyera kumativi ose navandaifamba navo.

¹⁴Zvino takati tawira pasi tose, ndikanzwa izwi richiti kwandiri norurimi rwechiHebheru, ‘Sauro! Sauro! Unonditambudzireiko? Zvinokuremera kupfura zvibayiso.’

¹⁵“Ndikati, ‘Ndimi aniko, Ishe?’ Ishe akati, ‘Ndini Jesu, waunotambudza.

¹⁶Asi simuka, umire namakumbo ako; nokuti ndazviratidza kwauri nezvizvi, kuti ndikuite munyai nechapupu chezvawakaona, nezvandichazviratidza nazvo kwauri;

¹⁷ndichakurwira kuvanhu nokuvahedheni, vandinokutumira kwavari;

¹⁸kuti usvinudze meso avo, vabve murima, vaende kuchiedza, nokubva pasimba raSatani, vaende kuna Mwari, kuti vagamuchire ruregerero rwezvivi zvavo, nenhaka pakati pavakaitwa vatsvene, nokutenda kwandiri.’

¹⁹“Naizvozvo, mambo Agiripa handina kuramba kuteerera chiratidzo chokudenga;

²⁰asi ndakatanga kuparidza kuna veDhamasiko, nokuna veJerusaremu, nenyika yose yeJudhea, nokuvahedheni, kuti vatendeuke, varingire kuna Mwari, vaite mabasa akafanira kutendeuka.

²¹Pamusoro paizvozvi vaJudha vakandibata mutemberi, vakaedza kundiuraya.

²²Asi ndakabatsirwa naMwari, ndikamira kusvikira zuva ranhasi, ndichipupurira vaduku navakuru, ndisingarevi zvimwe zvinhu asi zvakataurwa navaporofita naMosesi, kuti zvichaitika;

²³zvokuti Kristu akafanira kutambudzika, nokutanga kumuka kuvakafa, aparidzire vanhu navahedheni chiedza.”

²⁴Zvino akati achizvidavirira saizvozvo, Fesito akati nezwi guru, “Pauro, unopenga; kudzidza kwako kukuru kunokupenza.”

²⁵Asi Pauro akati, “Handipengi, Fesito akakurumbira; asi ndinotaura mashoko amazvokwadi noouchenjeri.

²⁶Nokuti mambo andinotaura naye ndisingatyi, vanoziva izvozvi, nokuti chinhu ichi hachina kuitwa pakavanda.

²⁷“Mambo Agiripa, munotenda vaporofita here? Ndinoziva kuti munotenda.”

²⁸Agiripa akati kuna Pauro, “Unenge unoda kundiita muKristu nenguva duku.”

²⁹Pauro akati, “Ndinonyengetera kuna Mwari kana nenguva duku, kana nehuru, kuti musava imi moga, asi vose vanondinzwa nhasi, vaitwe seni, asi vasina zvisungo izvi.”

³⁰Ipapo mambo akasimuka, nomubati, naBherinike, navakanga vagere navo;

³¹vakabuda vakataurirana, vakati, “Munhu uyu haaiti chinhu chakafanira rufu kana kusungwa.”

³²Ipapo Agiripa akati kuna Fesito, “Munhu uyu dai asina kuzviisa kuna Kesari angadai asunungurwa.”