Read Shona Union Version 2002 MABASA 27 Bible Online

MABASA 27 - Shona Union Version 2002 bible

MABASA 27

¹Zvino kwakati kwatemwa kuti tiende Itaria nechikepe, vakaisa Pauro navamwe vasungwa kumukuru wezana, ainzi, “Jurio, wehondo yaAugusto.”

²Zvino takati tapinda muchikepe cheAdhiramiteni, chakanga choenda napamisha yemhenderekedzo dzeAsia, tikabva tina Arisitakusi muMakedhonia, aibva Tesaronika.

³Fume mangwana tikasvika Sidhoni, Jurio akaitira Pauro zvakanaka, akamutendera kuti aende kushamwari dzake, achengetwe navo.

⁴Tikabva ipapo, tikapfuura nenyasi kweSaipurasi, nokuti mhepo yakatidzivisa.

⁵Zvino tikayambuka gungwa reKirikia nePamufiria, tikasvika Mira, musha weRikiya.

⁶Mukuru wezana akawanapo chikepe cheArekizandiriya, chaienda Itaria, ndokutipinzamo.

⁷Zvino takanatsofamba mazuva mazhinji, tikasvika pakatarisana neKinidho tichitambudzika, mhepo zvayakanga isingatitenderi kufamba, tikapfuura nenyasi kweKiriti, pakatarisana neSarimoni.

⁸Tikapfuura napo tichitambudzika, ndokusvika pamwe painzi Zororo Rakanaka, pedyo neguta reRaseya.

⁹Zvino nguva huru yakati yapfuura, nokufamba negungwa kwava nenjodzi, nokuti nguva yokuzvinyima zvokudya yakanga yatopfuura, Pauro akavarayira,

¹⁰akati kwavari, “Varume, ndinoona kuti rwendo rwedu ruchava nokutambudzika nokurasikirwa kukuru, zvisati zviri zvomutoro nechikepe bedzi, asi nokwoupenyu hweduwo.”

¹¹Asi mukuru wezana akaterera mufambisi wechikepe, nomwene wacho, kupfuura zvakarehwa naPauro,

¹²nokuti zororo zvarakanga risina kunaka kuti vagarepo chando, vamwe vazhinji vakati zviri nani kuti vabvepo, kuti zvimwe vangasvika Fenika vagarepo chando; ndiro zororo reKiriti, rakanga rakatarira mabvazuva kumusoro nezasi.

¹³Zvino mhepo yezasi yakati ichirira zvishoma, vakati tawana zvatakanga tichivinga, vakabvapo, vakafamba pedyo neKiriti.

¹⁴Zvino gare-gare mhepo ine simba, yainzi, “Yurakuro,” ikaburuka ichibva kwairi, ikatiwira.

¹⁵Zvino chikepe chakati chichibatwa, tisingagoni kufamba takatarira mhepo, tikachirega, tikaramba tichingotorwa.

¹⁶Zvino tikafamba nyasi kwechimwe chiwi chiduku, chainzi Kiraudha, tikanga tokoniwa kusunga igwa.

¹⁷Vakati varisimudza, vakatora zvibatsiro, vakasunga chikepe nenyasi; zvino zvavakatya kuti vachakandirwa pajecha reSiritisi, vakaderedza masaira, ndokungotorwa.

¹⁸Fume mangwana, zvakatambura kwazvo nedutu remhepo, vakakandira nhumbi kunze;

¹⁹nezuva retatu, vakakandira zvinhu zvechikepe kunze namaoko avo.

²⁰Zvino zvatakanga tisina kubudirwa nezuva kana nyeredzi mazuva mazhinji, nedutu guru remhepo richirambira riripo, takatorerwa kutarira kwose kwokuti tichaponeswa.

²¹Zvino vakati vagara nguva refu vasingadyi, Pauro akamira pakati pavo, akati, “Varume, maifanira kunditeerera, mukasabva Kiriti, mukasawirwa nokutambudzika nokurasikirwa uku.

²²Asi zvino ndinokurayirai kuti mutsunge mwoyo; nokuti hakuna angarasikirwa noupenyu hwake pakati penyu, asi chikepe bedzi.

²³Nokuti usiku huno mutumwa waMwari, wandiri wake, nowandinoshumirawo, akamira neni,

²⁴akati, ‘Pauro, usatya; unofanira kumira pamberi paKesari; tarira, Mwari akakupa vose vanofamba newe muchikepe.’

²⁵Naizvozvo, varume, tsungai mwoyo, nokuti ndinotenda Mwari, kuti zvichaitika sezvandakaudzwa.

²⁶Asi tinofanira kukandirwa pane chimwe chiwi.”

²⁷Zvino usiku hwegumi nouna hwakati hwasvika, tichangotorwa-torwa mugungwa reAdhiria, pakati pousiku vafambisi vechikepe vakati voswedera kuneimwe nyika.

²⁸Vakayera kudzika kwemvura, vakawana pakaita mafadhomi makumi maviri; vakapfuura zvishoma, ndokuyerazve, vakawana pakaita mafadhomi ane gumi namashanu.

²⁹Zvino vakatya kuti zvimwe tichawira pamabwe, vakakanda zvimiso zvina neshure kwechikepe, vakachema vachiti kuedze.

³⁰Zvino vafambisi vakati vachida kutiza muchikepe, vakaburusira igwa mugungwa, vachiita savanenge vokanda zvimiso kumuromo wacho.

³¹Pauro akati kumukuru wezana navarwi, “Hamungararami kana ava vasingagari muchikepe.”

³²Ipapo varwi vakagura mabote egwa, vakarirega, rikawa.

³³Zvino kwakati kwoedza, Pauro akakumbira zvikuru kwavari vose kuti vadye, achiti, “Nhasi rava zuva regumi nerechina, ramakagara muchizvinyima kudya, musingadyi chinhu.

³⁴“Saka ndinokumbira zvikuru kuti mudye, nokuti ndizvo zvichakuponesai; nokuti hakuna ruvhudzi rumwe ruchaparadzwa pamusoro womumwe wenyu.”

³⁵Akati areva izvozvo, akatora chingwa, akavonga Mwari pamberi pavo vose, akachimedura, ndokutanga kudya iye.

³⁶Ipapo vakatsunga mwoyo vose, vakadyawo vamene.

³⁷Isu tose taiva muchikepe, taiva mazana maviri namakumi manomwe navatanhatu.

³⁸Zvino vakati vaguta, vakarerusa chikepe, vachikandira zviyo mugungwa.

³⁹Kwakati kwoedza, vakasaziva nyika; asi vakaona zororo raiva nejecha, vakarangana kana zvaibvira kuitika, kuti vaise chikepe pariri.

⁴⁰Ipapo vakagura zvimiso, vakazvisiya mugungwa, vakasunungura zvisungo zvaisunga zvokudzoresa nazvo, vakasimudzira seiri rapamberi kumhepo, vakaruramira kumhenderekedzo.

⁴¹Zvino vakati vachisvika paidira makungwa maviri, vakagumirisa chikepe pasi; muromo wacho ukabatwa kwazvo usingazununguki, asi rutivi rwacho rweshure rukavhunika nesimba remvura.

⁴²Zvino varwi vakati zviri nani kuti vasungwa vaurawe, kuti vamwe varege kutiza vachishambira.

⁴³Asi mukuru wezana akada kuponesa Pauro, akavadzivisa zvavakanga vachida kuita; akarayira kuti vanogona kushambira, vatange kuzviwisira mumvura, vabude kunyika;

⁴⁴vamwe, vasara, vabude vamwe pamatanda, vamwe panezvimwe zvinhu zvechikepe. Naizvozvo zvakaitika kuti vose vakasvika kunyika vari vapenyu.