Read Shona Union Version 2002 MABASA 28 Bible Online

MABASA 28 - Shona Union Version 2002 bible

MABASA 28

¹Zvino takati taponeswa, tikaziva kuti chiwi chinonzi Merita.

²Vanhu venyika iyo vakatiitira unyoro kwazvo; nokuti vakabatidza moto, vakatigamuchira tose, nokuda kwemvura yakanga ichinaya, uye nokuda kwechando.

³Zvino Pauro akati aunganidza svinga routsotso, akahuisa pamoto, kukabuda nyoka nokudziya, ikanamatira paruoko rwake.

⁴Vanhu venyika iyo vakati vachiona chikara chakaremberera paruoko rwake, vakataurirana, vachiti, “Zvirokwazvo munhu uyu muurayi, nokuti kunyange adoponeswa hake pagungwa, Kururama hakumutenderi kuti ave mupenyu.”

⁵Asi iye wakazunzira chikara mumoto, akasanzwa kurwadzwa.

⁶Ivo vakati achazvimba, kana kuwira pasi pakarepo, akafa; zvino vakati vatarira nguva refu, vakaona kuti haana kusvikirwa nenjodzi, vakashanduka voti, “Iye Mwari.”

⁷Zvino pedyo ipapo paiva neminda yomukuru wechiwi, ainzi Pubhuiryo; iye akatigamuchira, akatigarisa zvakanaka mazuva matatu.

⁸Zvino baba vaPubhuriyo vakanga vavete pasi, vakabatwa nefivha nokubudisa ropa; Pauro akapinda kwavari, akanyengetera, ndokuisa maoko ake pamusoro pake, akamuporesa.

⁹Izvo zvakati zvaitwa, navamwewo vechiwi, vairwara, vakauya, vakaporeswa.

¹⁰Vakatikudza nokukudza kukuru; tichizoenda, vakaisa pachikepe zvinhu zvatakanga tichishayiwa.

¹¹Mwedzi mitatu yakati yapfuura, tikaenda nechikepe cheArekizandiriya, chakanga chagara chando pachiwi, chaiva nechiratidzo chokuti “Dhiokuri.”

¹²Zvino tikaenda napaSirakuse, tikagarapo mazuva matatu.

¹³Tikabvapo, tikapota, ndokusvika Regio; zuva rimwe rikati rapfuura, mhepo yaibva zasi ikamuka, tikasvika Puteori nezuva repiri;

¹⁴tikawanapo hama, dzakakumbira zvikuru kuti tigare nadzo mazuva manomwe; naizvozvo tikasvika Roma.

¹⁵Zvino hama dzakati dzatinzwa, dzikabvapo, dzikauya kuzotichingamidza, dzikasvika Apio Foro napaTabherini Nhatu; Pauro akati adziona idzo, akavonga Mwari, akatsunga mwoyo.

¹⁶Zvino takati tapinda Roma, Pauro akatenderwa kugara ari oga, anomurwi aimurinda.

¹⁷Mazuva matatu akati apfuura, akakokera avo, vakanga vari vakuru vavaJudha. Vakati vaungana, akati kwavari, “Varume, hama, ini kunyange ndisina kuita chinhu chakatadzira vanhu, kana tsika dzamadzibaba edu, ndakabva Jerusaremu ndakasungwa, ndaiswa pamaoko avaRoma;

¹⁸ivo, vakati vandibvunzisisa, vakada kundisunungura, nokuti pakanga pasina mhosva yorufu kwandiri.

¹⁹Asi vaJudha vakaramba, ndikarovererwa kuzviisa kuna Kesari; kusi kuti ndaiva nechinhu chokupomera rudzi rwangu.

²⁰Zvino ndakakudanai pamusoro pemhosva iyi, kuti ndikuonei, nditaurirane nemi, nokuti ndakasungwa nengetani iyi nokuda kwetariro yavaIsiraeri.”

²¹Vakati kwaari, “Hatina kugamuchira tsamba pamusoro pako, dzaibva Judhea, uye hakuna mumwe wehama akasvika akatiudza zvako, kana kutaura zvakaipa pamusoro pako.

²²Asi tinoda kunzwa kwauri zvaunofunga; nokuti kana iri dzidziso iyi, tinoziva kuti inorambwa kwose-kwose.”

²³Zvino vakati vamutarira zuva, vakauya kwaari vari vazhinji, kwaakanga agere, akavadudzira, achivapupurira kwazvo ushe hwaMwari, akavagombedzera pamusoro paJesu, nomurayiro waMosesi navaporofita, kubva mangwanani kusvikira madekwana.

²⁴Vamwe vakatenda zvakataurwa, asi vamwe havana kutenda.

²⁵Zvino zvavakanga vasinganzwani, vakaenda, Pauro ataura shoko rimwechete kwavari rokuti, “Mweya Mutsvene akataura zvakanaka nomuporofita Isaya kuna madzibaba enyu,

²⁶achiti, ‘Enda kuvanhu ava uti, Nokunzwa muchanzwa, musingatongonzwisisi; Nokuona, muchaona, musingaonesesi.

²⁷Nokuti mwoyo yavanhu ava yava mikukutu, Nzeve dzavo hadzinzwi zvakanaka, Vakatsinzina meso avo; Kuti varege kutongoona nameso avo, Nokunzwa nenzeve dzavo, Nokunzwisisa nemwoyo yavo, Vatendeuke, Ndivaporese.’ ”

²⁸Zvino zivai imi, kuti ruponeso urwu rwakatumirwa vahedheni; ivo vachanzwawo.

²⁹[Akati ataura izvozvo, vaJudha vakaenda, vachiita nyaya huru pakati pavo.]

³⁰Iye akapedza makore maviri agere muimba yake yairipirwa mari, akagamuchira vose vaipinda kwaari,

³¹achiparidza ushe hwaMwari, achidzidzisa zvaIshe Jesu Kristu, asingatongotyi, asingadziviswi nomunhu.