Read Shona Union Version 2002 VAROMA 10 Bible Online

VAROMA 10 - Shona Union Version 2002 bible

VAROMA 10

¹Hama dzangu, kuda kwomwoyo wangu nokukumbira kwangu kuna Mwari pamusoro pavo ndiko, kuti vaponeswe.

²Nokuti ndinovapupurira kuti vanoshingairira Mwari, asi havaiti nokuziva.

³Nokuti, zvavakanga vasingazivi kururama kwaMwari, vakatsvaka kumisa kururama kwavo vamene, vakasazviisa pasi pokururama kwaMwari.

⁴Nokuti Kristu ndimugumo womurayiro, kuti mumwe nomumwe anotenda aruramiswe.

⁵Nokuti Mosesi anonyora achiti, “Munhu, anoita kururama, kunorehwa nomurayiro, achararama nazvo.”

⁶Asi kururama kunobva pakutenda, kunoreva kudai, “Usati mumwoyo mako, ndianiko achakwira kudenga?” (Ndiko kuburusa Kristu;)

⁷kana, “Ndianiko achaburukira kwakadzika-dzika?” (Ndiko kubudisa Kristu kuvakafa.)

⁸Asi kunoreveiko? “Shoko riri pedyo newe, mumuromo mako, ndiro shoko rokutenda ratinoparidza;”

⁹kana, kuti uchipupura nomuromo wako kuti Jesu ndiye Ishe, nokutenda mumwoyo mako, kuti Mwari akamumutsa kuvakafa, uchaponeswa;

¹⁰nokuti munhu anotenda nomwoyo, ndokururamiswa; anopupura nomuromo, ndokuponeswa.

¹¹Nokuti Rugwaro runoti, “Aninaani anotenda kwaari, haanganyadziswi.”

¹²Nokuti muJudha nomuGiriki havasiyani; nokuti mumwe ndiye Ishe wavose, akapfuma kuna vose vanodana kwaari;

¹³nokuti aninaani anodana kuzita raIshe, achaponeswa.

¹⁴Zvino vachagodana seiko kuna iye, wavasina kutenda kwaari? Vachatenda seiko kuna iye, wavasina kunzwa? Vachanzwa seiko kana kusina muparidzi?

¹⁵Vachaparidza seiko, kana vasingatumwi? Sezvazvakanyorwa, zvichinzi, “Dzakanaka sei tsoka dzavanouya namashoko omufaro ezvinhu zvakanaka?”

¹⁶Asi vose havana kuteerera mashoko omufaro. Nokuti Isaya anoti, “Ishe, ndianiko akatenda zvatakaparidza?”

¹⁷Naizvozvo kutenda kunouya nokunzwa, nokunzwa kunouya neshoko raKristu.

¹⁸Asi ndinoti, “Havana kunzwa here? Izwi ravo rakabuda kunyika yose, Namashoko avo kumigumo yenyika.”

¹⁹Asi ndinoti, VaIsiraeri havana kuziva here? Pakutanga Mosesi anoti, “Ndichamutsa godo renyu norudzi rusati ruri rudzi, Ndichamutsa kutsamwa kwenyu norudzi rusinganzwisisi.”

²⁰NaIsaya, asingatyi, anoti, “Ndakawanikwa navasina kunditsvaka, Ndakaonekwa navasina kundibvunza.”

²¹Asi kuvaIsiraeri anoti, “Ndakatambanudzira maoko angu zuva rose kuvanhu vasingateereri, navanokakavara.”