Read Shona Union Version 2002 VAROMA 12 Bible Online

VAROMA 12 - Shona Union Version 2002 bible

VAROMA 12

¹Naizvozvo ndinokumbira zvikuru kwamuri, hama dzangu, netsitsi dzaMwari, kuti muise miviri yenyu, chive chibayiro chipenyu, chitsvene, chinofadza Mwari, ndiko kunamata kwenyu kwomwoyo.

²Musaenzaniswa nenyika ino; asi mushandurwe murangariro wenyu uchivandudzwa, kuti muedze muzive kuda kwaMwari kwakanaka, kunofadza, kwakakwana.

³Nokuti nenyasha dzandakapiwa, ndinoudza mumwe nomumwe ari pakati penyu, kuti arege kuzvifunga mukuru kupfuura paanofanira kufunga napo; asi afunge nokufunga kwakachenjera, mumwe nomumwe nechiyero chokutenda, sezvaakagoverwa naMwari.

⁴Nokuti sezvatine mitezo mizhinji pamuviri mumwe, asi mitezo yose haina basa rimwechete;

⁵saizvozvo isu, tiri vazhinji, tiri muviri mumwechete munaKristu, mumwe nomumwe ari mutezo wavamwe.

⁶Tine zvipo zvakasiyana, patakapiwa nyasha napo; kana kuri kuporofita, ngatiporofite zvakaenzana nokutenda kwedu;

⁷kana kuri kushumira, ngazvionekwe pakushumira kwedu; kana kuri kudzidzisa, pakudzidzisa kwedu;

⁸kana kuri kurayira, pakurayira kwedu; anopa, ngaape nomwoyo wose; ari mukuru, ngaabate nokushingaira; anoitira ngoni, ngaaite nomufaro.

⁹Rudo ngarurege kuva nokunyengera. Vengai zvakaipa; namatirai zvakanaka.

¹⁰Kana ruri rudo pakati pavatendi, danai norudo rukuru; pakukudzana tungamiriranai.

¹¹Regai kuva nousimbe pakushingaira; pisai pamweya; batirai Ishe;

¹²farai patariro; tsungirirai pakutambudzika; rambai muchinyengetera;

¹³govanai navatsvene pakushayiwa kwavo; itirai vaeni rudo.

¹⁴Ropafadzai vanokutambudzai; ropafadzai, musatuka.

¹⁵Farai navanofara; chemai navanochema.

¹⁶Ivai nomwoyo mumwe pakati penyu. Musatsvaka zvinorumbidzwa, asi mufambidzane navanozvininipisa. Musati pamwoyo yenyu makachenjera.

¹⁷Musatsiva munhu chakaipa kana akuitirai chakaipa. Tsvakai zvakarurama pamberi pavanhu vose.

¹⁸Kana zvichibvira, pamunogona napo, ivai norugare navanhu vose.

¹⁹Musatsiva, vadikanwi, asi mudziurire kutsamwa; nokuti kwakanyorwa, kuchinzi, “Kutsiva ndokwangu, ini ndicharipira ndizvo zvinoreva Ishe.”

²⁰Asi kana muvengi wako aziya, umupe kudya; kana afa nenyota, umupe kunwa; nokuti kana uchiita izvozvo, uchatutira mazimbe omoto pamusoro wake.

²¹Usakundwa nezvakaipa, asi ukunde zvakaipa nezvakanaka.