Read Shona Union Version 2002 VAROMA 15 Bible Online

VAROMA 15 - Shona Union Version 2002 bible

VAROMA 15

¹Zvino isu, tine simba, tinofanira kutakura utera hwavasina simba, tisingazvifadzi.

²Mumwe nomumwe wedu ngaafadze wokwake pane zvakanaka zvinosimbisa.

³Nokuti Kristuwo haana kuzvifadza; asi sezvazvakanyorwa, zvichinzi, “Kuzvidza kwavakakuzvidza nako kwakawira pamusoro pangu.”

⁴Nokuti zvose zvakanyorwa kare, zvakanyorwa kuti isu tidzidze kuti tive netariro inobva pakutsungirira napakunyaradza kwaMagwaro.

⁵Zvino Mwari wokutsungirira nowokunyaradza ngaakupei mwoyo mumwe pakati penyu, sezvinoda Kristu Jesu;

⁶kuti mukudze Mwari, baba vaIshe wedu Jesu Kristu, nomwoyo mumwe uye nomuromo mumwe.

⁷Saka gamuchirai, Kristu sezvaakatigamuchira, kuti Mwari akudzwe.

⁸Nokuti ndinoti, Kristu akaitwa mushumiri wokudzingiswa kuratidza zvokwadi yaMwari, kuti asimbise zvakapikirwa madzibaba.

⁹Uye, kuti vahedheni vakudze Mwari nokuda kwengoni dzake; sezvazvakanyorwa, zvichinzi, “Naizvozvo ndichakurumbidzai pakati pavahedheni, Nokukuimbirai zita renyu.”

¹⁰Uyezve unoti, “Farai imi vahedheni, navanhu vake.”

¹¹Uyezve, “Rumbidzai Ishe, imi vahedheni vose; Marudzi ose ngaamukudze.”

¹²Uyezve, Isaya anoti, “Mudzi waJese uchavapo, Naiye unomuka, kuti abate vahedheni; Vahedheni vachamutarira iye.”

¹³Zvino Mwari wetariro ngaakuzadzei nomufaro wose norugare pakutenda kwenyu, kuti muve netariro yakawandisa, nesimba roMweya Mutsvene.

¹⁴Zvino, hama dzangu, ini ndimene ndinoziva kwazvo pamusoro penyu, kuti imi mumene muzere nokunaka, makazadzwa nokuziva kwose, munogonawo kurayirana.

¹⁵Asi ndinokunyorerai zvimwe ndichinyanya kutsunga, ndichiita sendinokuyeudzai nenyasha dzandakapiwa naMwari,

¹⁶kuti ndive muranda waKristu Jesu kuvahedheni, ndichiita basa roupristi muVhangeri yaMwari, kuti chibayiro chavahedheni chifadze Mwari, chakaitwa chitsvene noMweya Mutsvene.

¹⁷Naizvozvo ndingazvirumbidza muna Kristu Jesu pazvinhu zvaMwari.

¹⁸Nokuti ndingatya kutaura zvimwe zvinhu, asi izvo Kristu zvaakaita neni, kuti vahedheni vaterereswe neshoko namabasa,

¹⁹nesimba rezviratidzo nezvinoshamisa, nesimba roMweya Mutsvene; nokuda kubva Jerusaremu nenyika yakapoteredza, kusvikira Iririko, ndakaparidza kwazvo Vhangeri yaKristu;

²⁰ndichishingairira chinhu ichi kuti ndiparidze Vhangeri, apo pasina kumborehwa zita raKristu, kuti ndirege kuvaka pamusoro penheyo dzomumwe munhu;

²¹asi, sezvazvakanyorwa, zvichinzi, “Avo, vasina kuudzwa zvake, vachaona; Naivo vasina kunzwa vachanzwisisa.”

²²Naizvozvo ndakadziviswawo kazhinji kuuya kwamuri;

²³zvino zvandisina pokubata panyika idzi, uye zvaava makore mazhinji ndichida zvikuru kuuya kwamuri,

²⁴kana ndichienda Sipeini, ndichauya kwamuri; (nokuti ndinotarira kukuonai parwendo rwangu, ndiperekedzwe nemi ikoko, kana ndamboguta zvishoma kuonana nemi).

²⁵Asi zvino ndomboenda Jerusaremu kundoshumira vatsvene.

²⁶Nokuti veMakedhonia naveAkaya vakati zvakanaka kuti vagovane navarombo pavatsvene vari muJerusaremu.

²⁷Nokuti vakati zvakanaka; vane ngava navo. Nokuti kana vahedheni vakaitwa vagovani navo pazvinhu zvoMweya, vane ngavawo rokuvashumira pazvinhu zvenyama.

²⁸Naizvozvo kana ndapedza chinhu ichi, ndikavavigira chibereko ichi, ndichaenda Sipeini nokwenyu.

²⁹Ndinoziva kuti kana ndichiuya kwenyu, ndichauya nokuropafadza kwakazara kwaKristu.

³⁰Zvino ndinokumbira zvikuru, hama dzangu, naIshe wedu, Jesu Kristu, uye norudo rwoMweya, kuti murwe pamwechete neni pakunyengetera kwenyu kuna Mwari pamusoro pangu;

³¹kuti ndisunungurwe kuna vasingateereri muJudhea, uye kuti kushumira kwangu kuna veJerusaremu kufadze vatsvene;

³²kuti ndiuye kwamuri nomufaro nokuda kwaMwari, ndiwane zororo pamwechete nemi.

³³Zvino Mwari worugare ngaave nemi mose. Ameni.