Read Shona Union Version 2002 VAROMA 16 Bible Online

VAROMA 16 - Shona Union Version 2002 bible

VAROMA 16

¹Ndinoreverera kwamuri Fibhi, hanzvadzi yedu, mushandiri wekereke iri paKenikiria.

²Kuti mumugamuchire muna Ishe, sezvinofanira vatsvene, nokumubatsira pazvinhu zvose zvaangashayiwa; nokuti iye amene akabatsira vazhinji, neniwo ndimene.

³Ndikwazisirei Pirisika naAkwira, vanobata neni munaKristu Jesu,

⁴vakaisa mitsipa yavo kurwira upenyu hwangu; vandisingavongi ini ndoga, asi nekereke dzose dzavahedheni.

⁵Ndikwazisireiwo kereke iri paimba yavo. Ndikwazisirei Epeneto, mudikanwi wangu, ndiye chibereko chokutanga munaKristu paAsia.

⁶Ndikwazisirei Maria, akakubatsirai zvikuru.

⁷Ndikwazisirei Andironiko naJunia, worudzi rwangu, vakasungwa pamwechete neni, vakakurumbira pakati pavapostori, vakanditangirawo kuva muna Kristu.

⁸Ndikwazisirei Amupiriato, mudikanwi wangu muna Ishe.

⁹Ndikwazisirei Uribhano, anobata nesu muna Kristu, naSitako, mudikanwi wangu.

¹⁰Ndikwazisirei Apere, akatendwa muna Kristu. Ndikwazisirei vokwaArisitobhuro.

¹¹Ndikwazisirei Herodhio worudzi rwangu. Ndikwazisirei vokwaNarikiso, vari muna Ishe.

¹²Ndikwazisirei Tirifaina naTirifosa, vanobata muna Ishe. Ndikwazisirei Pesisi, mudikanwi, akabata zvikuru muna Ishe.

¹³Ndikwazisirei Rufosi, musanangurwi muna Ishe, naamai vake, navangu.

¹⁴Ndikwazisirei Asinikiroto, naFiregoni, naHerimesi, naPatirobhasi, naHerimasi, nehama dziri kwavari.

¹⁵Ndikwazisirei Firorogosi, naJuria, naNerea, nehanzvadzi yake, naOrimipasi, navatsvene vose vari kwavari.

¹⁶Kwazisanani nokutsvoda kutsvene. Kereke dzose dzaKristu dzinokukwazisai.

¹⁷Zvino ndinokumbira zvikuru kwamuri, hama dzangu, kuti mucherekedze avo vanopesanisa, navanogumbusa, vachiita zvinopesana nedzidziso yamakadzidza imi; muvanzvenge.

¹⁸Nokuti vakadaro havabatiri Ishe wedu Kristu, asi dumbu ravo; vanonyengera mwoyo yavasina zvakaipa namashoko avo akanaka, anobata kumeso.

¹⁹Nokuti kuteerera kwenyu kwakasvika kuvanhu vose. Naizvozvo ndinofara pamusoro penyu; asi ndinoda kuti muve vakachenjera kune zvakanaka, asi vasina njere kune zvakaipa.

²⁰Zvino Mwari worugare achakurumidza kupwanya Satani pasi petsoka dzenyu. Nyasha dzaIshe wedu Jesu ngadzive nemi.

²¹Timoti, anobata neni, anokukwazisai; naRukio, naJasoni, naSosipatirosi, vorudzi rwangu.

²²Ini Teritiosi, anonyora tsamba iyi, ndinokukwazisai muna Ishe.

²³Gayo, akandigamuchira ini nekereke yose, anokukwazisai. [

²⁴Erasitosi, muchengeti wemari yeguta, anokukwazisai, naKwaritosiwo, hama.]

²⁵Zvino iye, anogona kukusimbisai, sezvinoreva Vhangeri yangu, nokuparidzwa kwaJesu Kristu, nokuzarurwa kwezvakavanzika, zvisina kurehwa nguva dzisingaperi,

²⁶asi zvino zvinoratidzwa nokuziviswa kumarudzi ose, naMagwaro avaporofita, sezvakarayirwa naMwari asingaperi, kuti vateerere nokutenda;

²⁷iye Mwari wakachenjera oga, ngaave nokubwinya naJesu Kristu nokusingaperi. Ameni.