Read Shona Union Version 2002 1 VAKORINDE 11 Bible Online

1 VAKORINDE 11 - Shona Union Version 2002 bible

1 VAKORINDE 11

¹Ivai vateveri vangu, seni ndiri muteveri waKristu.

²Zvino, ndinokurumbidzai, nokuti munondirangarira pazvinhu zvose, muchichengeta tsika, sezvandakakupai idzo.

³Asi ndinoda kuti muzive kuti musoro womumwe nomumwe ndiye Kristu; uye musoro womukadzi ndiye murume; uye musoro waKristu ndiye Mwari.

⁴Murume mumwe nomumwe, anonyengetera kana kuporofita musoro wake wakafukidzwa, anoninipisa musoro wake.

⁵Asi mukadzi mumwe nomumwe, anonyengetera kana kuporofita musoro wake usina kufukidzwa, anoninipisa musoro wake; nokuti ndizvo zvimwe nokuveurwa.

⁶Nokuti kana mukadzi asingafukidzwi, ngaachekerwe vhudzi rakewo; asi kana zvisingafaniri kuti mukadzi achekerwe vhudzi, kana aveurwe, ngaafukidzwe.

⁷Nokuti murume haafaniri kufukidza musoro, zvaari mufananidzo nokubwinya kwaMwari; asi mukadzi ndiye kubwinya kwomurume.

⁸Nokuti murume haabvi kumukadzi; asi mukadzi anobva kumurume;

⁹uye murume haana kusikirwa mukadzi, asi mukadzi akasikirwa murume;

¹⁰nokuda kwaizvozvo mukadzi anofanira kuva nechiratidzo chesimba pamusoro wake, nokuda kwavatumwa.

¹¹Kunyange zvakadaro muna Ishe mukadzi haazi kunze kwomurume, nomurume haazi kunze kwomukadzi.

¹²Nokuti mukadzi seanobva kumurume, nokudarowo murume unoberekwa nomukadzi; asi zvose zvinobva kuna Mwari.

¹³Tongai imi mumene: Zvakafanira kuti mukadzi anyengetere kuna Mwari asina kufukidzwa here?

¹⁴Ko hamudzidziswi naiwo musikirwo wavanhu kuti kana murume ane vhudzi refu, anonyadziswa nazvo here?

¹⁵Asi kana mukadzi ane vhudzi refu, ndiko kubwinya kwake; nokuti akapiwa vhudzi rake chive chifukidzo.

¹⁶Zvino kana mumwe anenge achida kuita gakava, hatina tsika yakadaro isu, kunyange kereke dzaMwari.

¹⁷Zvino kana ndichikuudzai izvi, handikurumbidzii, nokuti hamuunganiri zvinopfuura nokunaka, asi zvakaipa.

¹⁸Nokuti shoko rokutanga, kana muchiungana mukereke, ndinonzwa kuti kupesana kuripo pakati penyu; pamwe ndinotenda kuti ndizvo.

¹⁹Nokuti dzidziso dzakatsauka dzinofanira kuva pakati penyu, kuti avo vakatendeka vaonekwe pakati penyu.

²⁰Zvino kana muchiungana pamwechete, hakuzi kuti mudye chirariro chaIshe;

²¹nokuti kana modya, mumwe nomumwe anotangira vamwe kudya chirariro chake; mumwe ane nzara, mumwe anodhakwa.

²²Ko hamuna dzimba kwamungadyira nokunwira here? Munozvidza kereke yaMwari, muchinyadzisa avo vasina chinhu here? Ndichaiteiko kwamuri? Ndingakurumbidzai here? Handingakurumbidzii.

²³Nokuti ini ndakagamuchira kuna Ishe icho chandakakupaiwo, kuti Ishe Jesu nousiku hwaakapandukirwa, akatora chingwa;

²⁴akati avonga, akachimedura, akati, “Uyu ndiwo muviri wangu unomedurirwa imi; itai izvi muchindirangarira.”

²⁵Saizvozvowo, vakati vapedza kurarira, akatora mukombe, akati, “Mukombe uyu ndiyo sungano itsva muropa rangu; itai izvi, nguva dzose kana muchinwa, muchindirangarira.”

²⁶Nokuti nguva dzose, kana muchidya chingwa ichi, kana kunwa mukombe uyu, munoparidza rufu rwaIshe, kusvikira achiuya.

²⁷Naizvozvo mumwe nomumwe anodya chingwa ichi, kana kunwa mukombe waIshe, nomutoo usina kufanira, achava nemhosva yomuviri neropa raIshe.

²⁸Zvino munhu ngaazviedze, kuti adye chingwa ichi achidaro, nokunwa mukombe uyu.

²⁹Nokuti anodya nokunwa, asinganatsi kunzwisisa muviri waIshe, anozvidyira nokuzvinwira kurohwa.

³⁰Nemaka iyi vazhinji varipo pakati penyu vasina simba, vanorwara; vazhinji vavete.

³¹Nokuti dai taizviedza isu timene, hatizairohwa.

³²Zvino kana tichitongwa, tinorangwa naIshe, kuti tirege kutongerwa kuraswa pamwechete nenyika.

³³Naizvozvo, hama dzangu, kana muchiunganira pakudya, miriranai.

³⁴Kana munhu anenzara, ngaadye kumusha kwake; kuti murege kuunganira kutongwa. Zvimwe zvakasara ndichazvigadzira kana ndichisvika.