Read Shona Union Version 2002 1 VAKORINDE 12 Bible Online

1 VAKORINDE 12 - Shona Union Version 2002 bible

1 VAKORINDE 12

¹Zvino, kana zviri zvipo zvoMweya, hama dzangu, handidi kuti muve vasingazivi.

²Munoziva kuti panguva yamaiva vahedheni, makanga muchikweverwa kuzvifananidzo, zvisingagoni kutaura, sezvamaitungamirirwa.

³Saka ndinokuzivisai kuti hakuna munhu anotaura naMweya waMwari, angati, “Jesu ngaatukwe!” Uye, hakuna munhu angati, “Jesu ndiye Ishe, asi naMweya Mutsvene.”

⁴Zvino marudzi mazhinji ezvipo aripo, asi Mweya ndomumwe.

⁵Marudzi mazhinji okushumira aripo, asi Ishe mumwe.

⁶Marudzi mazhinji amabasa aripo, asi Mwari mumwe, iye anobata zvose muna vose.

⁷Asi mumwe nomumwe anopiwa kuratidzwa kwoMweya, kuti vose vabatsirwe.

⁸Nokuti mumwe anopiwa naMweya shoko rouchenjeri, mumwe shoko rokuziva naMweya iwoyu;

⁹mumwe, kutenda muMweya iwoyu; mumwe, zvipo zvokuporesa muMweya iwoyu;

¹⁰mumwe, kuita mabasa esimba; mumwe; kuporofita; mumwe, kuzivisisa mweya; mumwe, marudzi endimi; mumwe, kududzira ndimi;

¹¹asi izvi zvose zvinoitwa naMweya iwoyu mumwechete, unogovera mumwe nomumwe sezvaanoda.

¹²Nokuti somuviri uri mumwe, une mitezo mizhinji, nemitezo yose yomuviri, kunyange iri mizhinji, muviri ndomumwechete; wakadarowo Kristu.

¹³Nokuti muMweya mumwe isu tose takabhabhatidzwa mumuviri mumwe; kana tiri vaJudha, kana vaGiriki, kana varanda, kana vakasununguka; isu tose takanwiswa paMweya mumwe.

¹⁴Nokuti muviri hauzi mutezo mumwe, asi mizhinji.

¹⁵Kana rutsoka rukati, “Zvandisati ndiri ruoko, handizi womuviri;” ko haruzi rwomuviri, zvarwadaro here?

¹⁶Nenzeve kana ikati, “Zvandisati ndiri ziso, handizi womuviri;” ko haizi yomuviri here?

¹⁷Kana muviri wose raiva ziso, kunzwa kwaivepiko? Kana wose kwaiva kunzwa, kunhuwidza kwaivepiko?

¹⁸Asi zvino Mwari akaisa mutezo mumwe nomumwe pamuviri sezvaakada.

¹⁹Kana yose waiva mutezo mumwe, muviri waivepiko?

²⁰Asi zvino kune mitezo mizhinji, asi muviri mumwe.

²¹Ziso haringati kuruoko, “Handikudi,” kana musorowo kutsoka, “Handikudiyi imi.”

²²Kwete, zvikuru mitezo iyo yomuviri inenge isina simba, ndiyo inodikanwa,

²³nemitezo iyo yomuviri yatinoti haikudzwi, ndiyo yatinokudza kwazvo; nemitezo iyo yedu isina kunaka, ndiyo yova nokunaka kunopfuurisa;

²⁴asi mitezo yedu yakanaka, haishaiwi kukudzwa. Asi Mwari akabatanidza muviri wose, akakudza nokupfuurisa mitezo inoshayiwa kunaka;

²⁵kuti pamuviri parege kuva nokupesana; asi kuti mitezo ichengetane zvakaenzana.

²⁶Kana mutezo mumwe uchitambudzika, mitezo yose inotambudzika pamwechete nawo; kana mutezo mumwe uchikudzwa, mitezo yose inofara pamwechete nawo.

²⁷Zvino, imi muri muviri waKristu, nomumwe nomumwe mitezo yawo.

²⁸Mwari akaisa vamwe pakereke, pakutanga vapostori, vechipiri vaporofita, vechitatu vadzidzisi, tevere vaiti vamabasa esimba, tevere zvipo zvokuporesa, navabatsiri, navabati, namarudzi mazhinji endimi.

²⁹Vose vapostori here? Vose vaporofita here? Vose vadzidzisi here? Vose vaiti vamabasa esimba here?

³⁰Vose vane zvipo zvokuporesa here? Vose vanotaura nendimi here? Vose vanodudzira here?

³¹Asi shingairirai zvipo zvikuru. Ndinokuratidzaiwo nzira yakaisvonaka inopfuura dzose.